തിരുവനന്തപുരം: സംസ്ഥാനത്ത് വരും ദിവസങ്ങളിൽ കടുത്ത വൈദ്യുതി പ്രതിസന്ധിക്ക് (Power Crisis) സാധ്യതയെന്ന് കെ.എസ്.ഇ.ബി (KSEB power crisis മുന്നറിയിപ്പ്. നിലവിൽ കേരളത്തിലെ പ്രധാന ഡാമുകളിലെല്ലാം കൂടി ആകെ 21.25 ശതമാനം വെള്ളം മാത്രമാണ് അവശേഷിക്കുന്നത്. കഴിഞ്ഞ വർഷം ഇതേ കാലയളവിൽ ഡാമുകളിൽ 47.22 ശതമാനം വെള്ളമുണ്ടായിരുന്ന സ്ഥാനത്താണിത്. വരും ദിവസങ്ങളിൽ മഴ സജീവമായില്ലെങ്കിൽ സംസ്ഥാനത്ത് വൈദ്യുതി നിയന്ത്രണം ഏർപ്പെടുത്തേണ്ടി വരുമെന്നാണ് ബോർഡ് നൽകുന്ന സൂചന.
ഈ മാസം സാധാരണ ലഭിക്കേണ്ടിയിരുന്ന പ്രീ-മൺസൂൺ, കാലവർഷ മഴ ഇതുവരെ കേരളത്തിൽ പരക്കെ ലഭിച്ചിട്ടില്ല. ഇതോടൊപ്പം മുൻപുണ്ടാക്കിയ കരാറുകൾ പ്രകാരം മാർച്ച്- ഏപ്രിൽ മാസങ്ങളിലെ കടുത്ത വേനലിൽ മറ്റ് സംസ്ഥാനങ്ങളിൽ നിന്നും ബാങ്കിങ് വ്യവസ്ഥയിൽ വാങ്ങിയ വൈദ്യുതി ഈ ജൂൺ മാസത്തിൽ തിരികെ നൽകേണ്ടതുണ്ട്. അതുകൊണ്ട് തന്നെ, നിലവിൽ ഡാമുകളിലുള്ള പരിമിതമായ വെള്ളം ഉപയോഗിച്ച് ഉത്പാദിപ്പിക്കുന്ന വൈദ്യുതിയിൽ നല്ലൊരു പങ്ക് പുറത്തേക്ക് കൊടുക്കേണ്ടി വരുന്നത് ആഭ്യന്തര വിതരണത്തെ ബാധിക്കുന്നുണ്ട്.
ജൂൺ 30-ന് ശേഷവും മഴ ലഭ്യത കുറഞ്ഞുനിന്നാൽ വലിയ തോതിലുള്ള പ്രതിസന്ധിയാകും വരാനിരിക്കുന്നത്. കഴിഞ്ഞ ദിവസം രാത്രിയിലെ പീക്ക് അവർ (Peak Hour) സമയങ്ങളിൽ സംസ്ഥാനത്ത് വലിയ തോതിൽ വൈദ്യുതി ദൗർലഭ്യം അനുഭവപ്പെട്ടിരുന്നു. രാത്രി 9.30 മുതൽ 10 മണി വരെ 130 മെഗാവാട്ട് വൈദ്യുതിയുടെ കുറവാണ് രേഖപ്പെടുത്തിയത്. തുടർന്നുള്ള സമയങ്ങളിൽ ഇത് വർദ്ധിക്കുകയും രാത്രി 10 മുതൽ 11 വരെ 430 മെഗാവാട്ടിന്റെയും, 11 മുതൽ 12 മണി വരെ 400 മെഗാവാട്ടിന്റെയും, അർദ്ധരാത്രി 12 മുതൽ പുലർച്ചെ 1 മണി വരെ 230 മെഗാവാട്ടിന്റെയും കടുത്ത കുറവ് പവർ ഗ്രിഡിൽ അനുഭവപ്പെട്ടു.
മഴ പെയ്യാതിരിക്കുകയും അന്തരീക്ഷ താപനില ഉയർന്നു നിൽക്കുകയും ചെയ്യുന്ന സാഹചര്യത്തിൽ എയർകണ്ടീഷണറുകളുടെയും കൂളറുകളുടെയും ഉപയോഗം കാരണം സംസ്ഥാനത്തെ പ്രതിദിന വൈദ്യുതി ഉപയോഗം ഇനിയും ഉയരാനാണ് സാധ്യത. മഴ നീണ്ടുപോകുകയാണെങ്കിൽ വരും മാസത്തിലും പവർ കട്ട് ഉൾപ്പെടെയുള്ള കർശനമായ വൈദ്യുതി നിയന്ത്രണങ്ങളിലേക്ക് കടക്കേണ്ടി വരുമെന്നാണ് കെ.എസ്.ഇ.ബി ഉന്നതതല യോഗത്തിന്റെ വിലയിരുത്തൽ.
Story Summary: Kerala is facing a looming power crisis as water levels in the state’s dams have dropped to 21.25%, compared to 47.22% during the same period last year. KSEB warned that a lack of rainfall, combined with the obligation to return power borrowed from other states during March-April, will worsen the shortage. Major power deficits were recorded during peak hours last night, and if the monsoon continues to be delayed beyond June 30, power restrictions may become unavoidable.
