പുണെ: ദൈവത്തിന്റെ അവതാരമാണെന്ന് വിശ്വസിപ്പിച്ച് യുവതിയെ വർഷങ്ങളോളം ക്രൂരമായ ലൈംഗിക-ശാരീരിക ചൂഷണങ്ങൾക്ക് ഇരയാക്കുകയും മൂത്രം കുടിപ്പിക്കുകയും ചെയ്ത കേസിൽ സ്വയം പ്രഖ്യാപിത ആൾദൈവവും കൂട്ടാളികളും പുണെ പോലീസിന്റെ പിടിയിലായി (Fake godman arrested0. പുണെ വാഗോളിയിലെ ഉബാലെ നഗറിൽ ‘മോഡേൺ ഗുരുകുലം’ എന്ന പേരിൽ സ്ഥാപനം നടത്തിവന്നിരുന്ന രാധേശ്യാം മിശ്ര എന്ന രാധാമോഹൻ മിശ്ര, ഇയാളുടെ അടുത്ത സഹായി സ്വാമി കൻവാൾ നയൻ എന്നിവരുൾപ്പെടെ എട്ട് പ്രതികളെയാണ് പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ വരും ശനിയാഴ്ച വരെ റിമാൻഡ് ചെയ്തു.
2010-ലാണ് ഇരയായ യുവതി പ്രതിയുടെ ചതിക്കുഴിയിൽ വീഴുന്നത്. 2010 മുതൽ 2016 വരെയുള്ള കാലയളവിൽ പ്രതി യുവതിയെ നിരന്തരം ലൈംഗികമായി പീഡിപ്പിക്കുകയും കടുത്ത ശാരീരിക ഉപദ്രവങ്ങൾക്ക് ഇരയാക്കുകയും ചെയ്തു. ഇതിനിടയിൽ പലതവണ യുവതിക്ക് വൈദ്യുതാഘാതം (Electric Shock) ഏൽപ്പിക്കുകയും അശ്ലീല വീഡിയോകൾ നിർബന്ധപൂർവ്വം ചിത്രീകരിക്കുകയും ചെയ്തു. ഈ ദൃശ്യങ്ങൾ കാണിച്ച് പിന്നീട് യുവതിയെയും കുടുംബത്തെയും പ്രതികൾ വൻതോതിൽ ബ്ലാക്ക് മെയിൽ ചെയ്യുകയായിരുന്നു. യുവതിയെ ഭർത്താവിൽ നിന്നും കുടുംബത്തിൽ നിന്നും പൂർണ്ണമായി ഒറ്റപ്പെടുത്തിയ പ്രതി, ഭർത്താവുമായി നിർബന്ധിച്ച് വിവാഹമോചനം നേടിക്കുകയും ചെയ്തു.
താൻ പുനരവതരിച്ച ദൈവമാണെന്ന് യുവതിയെയും മറ്റ് അനുയായികളെയും വിശ്വസിപ്പിച്ച മിശ്ര, യുവതിയെക്കൊണ്ട് സ്വന്തം മൂത്രം പോലും നിർബന്ധിച്ച് കുടിപ്പിച്ചു. കൂടാതെ, തന്റെ ആശ്രമത്തിന്റെ സാമ്പത്തിക വളർച്ചയ്ക്കായി യുവതിയെ ഉപയോഗിച്ച് വിവിധയിടങ്ങളിൽ മോഷണങ്ങൾ നടത്തിക്കുകയും ചെയ്തു. പീഡനം സഹിക്കവയ്യാതെ യുവതി പോലീസിനെ സമീപിച്ചതോടെയാണ് ആൾദൈവത്തിന്റെ ഞെട്ടിക്കുന്ന ക്രൂരതകൾ പുറംലോകമറിഞ്ഞത്.
പരാതിക്ക് പിന്നാലെ മിശ്രയുടെ ആശ്രമത്തിൽ പോലീസ് നടത്തിയ മിന്നൽ പരിശോധനയിൽ ഒരു രഹസ്യ ഭൂഗർഭ മുറി കണ്ടെത്തുകയും അവിടെനിന്ന് 12 ലാപ്ടോപ്പുകൾ, 11 മൊബൈൽ ഫോണുകൾ, 19 ഹാർഡ് ഡ്രൈവുകൾ, വൻതോതിൽ അശ്ലീല ദൃശ്യങ്ങൾ അടങ്ങിയ പെൻഡ്രൈവുകൾ എന്നിവ പിടിച്ചെടുക്കുകയും ചെയ്തു. കൂടാതെ 6.5 ലക്ഷം രൂപ പണവും, 15 ലക്ഷം രൂപ വിലമതിക്കുന്ന സ്വർണ്ണാഭരണങ്ങളും, വിവിധ തരത്തിലുള്ള മയക്കുമരുന്നുകളും മരുന്നുകളും ഇവിടെനിന്ന് കണ്ടെടുത്തു. പിടിച്ചെടുത്ത ഡിജിറ്റൽ ഉപകരണങ്ങൾ ഫോറൻസിക് പരിശോധനയ്ക്കായി അയച്ചിട്ടുണ്ടെന്നും വരുംദിവസങ്ങളിൽ കൂടുതൽ ഇരകൾ പരാതിയുമായി മുന്നോട്ട് വരുമെന്നാണ് പ്രതീക്ഷിക്കുന്നതെന്നും അന്വേഷണസംഘം അറിയിച്ചു.
Story Summary: Pune Police arrested self-proclaimed godman Radheshyam Mishra (alias Radhamohan Mishra) and seven accomplices, including his close aide Swami Kanwal Nayan, for brutally torturing and sexually exploiting a woman since 2010. Operating a center named ‘Modern Gurukul’ in Wagholi, Mishra blackmailed the victim using recorded videos, forced her to divorce her husband, commit thefts for his ashram, and even drink his urine under the guise of being a divine incarnation. Police raided a hidden underground room at the ashram, seizing cash, jewelry, narcotics, and numerous electronic devices.
