തിരുവനന്തപുരം: നിയമസഭാ തിരഞ്ഞെടുപ്പ് ഫലം വരാനിരിക്കെ മുഖ്യമന്ത്രി സ്ഥാനത്തെച്ചൊല്ലി കോൺഗ്രസിനുള്ളിൽ നടക്കുന്ന പരസ്യമായ ചേരിതിരിവിനെതിരെ കടുത്ത വിമർശനവുമായി കെ. മുരളീധരൻ രംഗത്ത്. നിലവിൽ അത്തരം ചർച്ചകളുടെ യാതൊരു ആവശ്യവുമില്ലെന്നും യുഡിഎഫ് വിജയിക്കുമെന്ന കാര്യത്തിൽ സംശയമില്ലെന്നും അദ്ദേഹം പറഞ്ഞു.(K Muraleedharan warns leaders in CM position dispute)
മുഖ്യമന്ത്രിയെ തീരുമാനിക്കുന്നതിന് വ്യക്തമായ നടപടിക്രമങ്ങളുണ്ടെന്ന് മുരളീധരൻ ഓർമ്മിപ്പിച്ചു. പാർട്ടിയിൽ ഇപ്പോൾ ആവശ്യം ‘സംഘനൃത്ത’മാണെന്ന് രാഹുൽ ഗാന്ധി പറഞ്ഞത് നേതാക്കൾ ഓർക്കണം. ഏതെങ്കിലും നേതാക്കളെ അനുകൂലിച്ച് ഇപ്പോൾ സാമൂഹ്യ മാധ്യമങ്ങളിൽ പോസ്റ്റിടുന്നത് ആര് ചെയ്താലും ശരിയല്ല.
വോട്ടെണ്ണലിന് ശേഷം പാർട്ടി യോഗം ചേർന്നാണ് മുഖ്യമന്ത്രിയെ തീരുമാനിക്കുക. ഹൈക്കമാൻഡ് ഇക്കാര്യത്തിൽ കൃത്യമായ നിർദ്ദേശം നൽകും. വെറുതെ നാട്ടുകാരെക്കൊണ്ട് പറയിപ്പിക്കരുതെന്നും അദ്ദേഹം കൂട്ടിച്ചേർത്തു. കോൺഗ്രസിനുള്ളിലെ ഇപ്പോഴത്തെ ‘കിടമത്സരം’ ആസൂത്രിതമാണെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
