ന്യൂഡൽഹി: പാർലമെന്റിന്റെ പ്രത്യേക സമ്മേളനം സ്ത്രീ ശാക്തീകരണത്തിലേക്കുള്ള ‘ചരിത്രപരമായ ചുവടുവെപ്പാണെന്ന്’ പ്രധാനമന്ത്രി നരേന്ദ്ര മോദി. സ്ത്രീകളുടെ അന്തസ്സ് രാജ്യത്തിന്റെ അന്തസ്സിന്റെ പ്രതിഫലനമാണെന്നും അദ്ദേഹം പറഞ്ഞു.(Historic step for empowerment to be taken today, PM Modi on Women’s Reservation Amendment Bill)
“നമ്മുടെ അമ്മമാരോടും സഹോദരിമാരോടുമുള്ള ആദരവ് രാജ്യത്തോടുള്ള ആദരവാണ്. ആ ബോധ്യത്തോടെയാണ് സർക്കാർ ഈ ദിശയിൽ ദൃഢനിശ്ചയത്തോടെ മുന്നോട്ട് പോകുന്നത്,” അദ്ദേഹം കുറിച്ചു. വനിതാ സംവരണ ഭരണഘടനാ ഭേദഗതി ബില്ലിന്മേൽ പ്രധാനമന്ത്രി നരേന്ദ്ര മോദി ഇന്ന് ലോക്സഭയെ അഭിസംബോധന ചെയ്യും. നിയമനിർമ്മാണവുമായി ബന്ധപ്പെട്ട വിശദമായ രൂപരേഖ അദ്ദേഹം സഭയിൽ അവതരിപ്പിക്കുമെന്നാണ് സൂചന. 2029-ന് മുമ്പ് ലോക്സഭയിലും നിയമസഭകളിലും 33 ശതമാനം വനിതാ സംവരണം നടപ്പിലാക്കാൻ ലക്ഷ്യമിട്ടാണ് കേന്ദ്രം മൂന്ന് ദിവസത്തെ പ്രത്യേക സമ്മേളനം വിളിച്ചിരിക്കുന്നത്.
ഭരണഘടനാ ഭേദഗതി ബില്ലിലെ മണ്ഡല പുനർനിർണ്ണയ വ്യവസ്ഥകളെ ചൊല്ലി ഭരണപക്ഷവും പ്രതിപക്ഷവും തമ്മിൽ ലോക്സഭയിൽ ഇന്ന് ശക്തമായ പോരാട്ടമുണ്ടായേക്കും. ഇതൊരു വലിയ പരിഷ്കരണമാണെന്ന് കേന്ദ്രം അവകാശപ്പെടുന്നു. മണ്ഡല പുനർനിർണ്ണയ വ്യവസ്ഥകൾ അംഗീകരിക്കില്ലെന്നാണ് പ്രതിപക്ഷ തീരുമാനം. ദക്ഷിണേന്ത്യൻ സംസ്ഥാനങ്ങളുടെ രാഷ്ട്രീയ പ്രാതിനിധ്യം കുറയ്ക്കാൻ ഇത് കാരണമാകുമെന്ന് പ്രതിപക്ഷം ആശങ്കപ്പെടുന്നു.
സമ്മേളനത്തിന് മുന്നോടിയായി കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ പ്രമുഖ പ്രതിപക്ഷ നേതാക്കൾ യോഗം ചേർന്ന് സംയുക്ത തന്ത്രങ്ങൾ രൂപീകരിച്ചു. രാഹുൽ ഗാന്ധി, കെ.സി. വേണുഗോപാൽ, ജയറാം രമേശ് (കോൺഗ്രസ്), ടി.ആർ. ബാലു (ഡിഎംകെ), തേജസ്വി യാദവ് (ആർജെഡി), സാഗരിക ഘോഷ് (തൃണമൂൽ), സഞ്ജയ് റാവത്ത് (ശിവസേന UBT), സുപ്രിയ സുലെ (എൻസിപി ശരദ് പവാർ), അഖിലേഷ് യാദവ് (എസ്.പി – വെർച്വൽ) തുടങ്ങിയവർ യോഗത്തിൽ പങ്കെടുത്തു.
