തിരുവനന്തപുരം: കോൺഗ്രസ് നിയമസഭാ കക്ഷി നേതാവിനെ തിരഞ്ഞെടുക്കുന്നതുമായി ബന്ധപ്പെട്ട് തെരുവിൽ നടക്കുന്ന പോസ്റ്റർ യുദ്ധങ്ങളിലും പ്രകടനങ്ങളിലും പ്രതികരണവുമായി കെ. മുരളീധരൻ (K. Muraleedharan). അധ്വാനിക്കുന്നവർക്ക് കൂലി കിട്ടണമെന്നും എന്നാൽ നേതാക്കളെ തീരുമാനിക്കുന്നത് ഫ്ളക്സുകളല്ലെന്നും അദ്ദേഹം പറഞ്ഞു.
നേതാക്കളെ തിരഞ്ഞെടുക്കുന്നതിന് പാർട്ടിക്കുള്ളിൽ ചില നടപടിക്രമങ്ങളുണ്ട്. അത് പൂർത്തിയാക്കി ഹൈക്കമാൻഡ് ഉചിതമായ തീരുമാനമെടുക്കും. പ്രവർത്തകർക്ക് ചില നേതാക്കളോട് പ്രത്യേക താൽപര്യമുണ്ടാകുന്നത് സ്വാഭാവികമാണ്. എന്നാൽ അതിന്റെ പേരിൽ മറ്റ് നേതാക്കളെക്കുറിച്ച് മോശമായി സംസാരിക്കുന്നത് ശരിയായ പ്രവണതയല്ല.
മുഖ്യമന്ത്രി പദത്തെക്കുറിച്ചുള്ള തന്റെ വ്യക്തിപരമായ അഭിപ്രായം ഇതിനോടകം തന്നെ ഹൈക്കമാൻഡിനെ അറിയിച്ചിട്ടുണ്ടെന്നും മുരളീധരൻ വ്യക്തമാക്കി. വി.ഡി. സതീശന് അനുകൂലമായി സംസ്ഥാനത്തിന്റെ വിവിധ ഭാഗങ്ങളിൽ നടക്കുന്ന പ്രകടനങ്ങൾ താൻ ശ്രദ്ധിക്കുന്നുണ്ടെന്നും, എന്നാൽ ഇതൊന്നും നേതാക്കൾ അറിഞ്ഞുകൊണ്ടുള്ളതല്ലെന്നും അദ്ദേഹം കൂട്ടിച്ചേർത്തു. ഓരോരുത്തരും അവരുടെ താൽപര്യം പ്രകടിപ്പിക്കുന്നതാണെങ്കിലും പാർട്ടി അച്ചടക്കം പാലിക്കണമെന്ന സൂചനയാണ് അദ്ദേഹം നൽകിയത്.
Story Summary: Senior Congress leader K. Muraleedharan reacted to the ongoing leadership tussle in the party, stating that posters and flex boards do not decide leaders. He emphasized that there are established procedures for selecting the CM candidate and urged workers not to disrespect other leaders while showing support for their favorites.
