തിരൂരിൽ കാർ കടയിലേക്ക് പാഞ്ഞ് കയറി; ആറ് പേർക്ക് പരിക്ക്
May 5, 2024, 19:51 IST
മലപ്പുറം: തിരൂർ ടൗണിൽ കാർ കടയിലേക്ക് പാഞ്ഞ് കയറി രണ്ട് കുട്ടികൾ ഉൾപ്പടെ ആറ് പേർക്ക് പരിക്കേറ്റു. പരിക്കേറ്റവരെ കോട്ടയ്ക്കലിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇതിൽ രണ്ട് പേരുടെ പരിക്ക് ഗുരുതരമാണ്. കടയിൽ എത്തിയവരും കടയുടെ വരാന്തയിൽ നിന്നവരുമാണ് അപകടത്തിൽപെട്ടത്. ഉച്ചകഴിഞ്ഞ് രണ്ടോടയായിരുന്നു അപകടം സംഭവിച്ചത്. തിരൂർ ടൗണിൽ പ്രവർത്തിക്കുന്ന ടെക്സ്റ്റയിൽസ് കടയിലേക്കാണ് വാഹനം ഇടിച്ചുകയറിയത്. ഓട്ടത്തിനിടെ നിയന്ത്രണം നഷ്ടമായ കാർ കടയിലേക്ക് പാഞ്ഞുകയറുകയായിരുന്നു. നാട്ടുകാരാണ് പരിക്കേറ്റവരെ ആശുപത്രിയിൽ എത്തിച്ചത്.