കൊച്ചി: മലയാളികൾ ആകാംക്ഷയോടെ കാത്തിരിക്കുന്ന 'ആട് 3' സിനിമയുടെ ചിത്രീകരണത്തിനിടെ നടൻ വിനായകന് പരിക്ക്. കൊച്ചിയിൽ വെച്ച് നടന്ന ഒരു സാഹസിക സംഘട്ടന രംഗം ചിത്രീകരിക്കുന്നതിനിടെയാണ് താരത്തിന് പരിക്കേറ്റത്. ചിത്രത്തിലെ ജീപ്പ് ഉപയോഗിച്ചുള്ള ആക്ഷൻ സീക്വൻസുകൾ ചിത്രീകരിക്കുന്നതിനിടെയാണ് അപകടമുണ്ടായത്. പരിക്കേറ്റ ഉടൻ തന്നെ വിനായകനെ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിച്ചു. പരിശോധനയിൽ പേശികൾക്ക് സാരമായ ക്ഷതം (Muscle Injury) സംഭവിച്ചതായി എം.ആർ.ഐ സ്കാനിംഗിലൂടെ കണ്ടെത്തി.
പരിക്ക് ഗുരുതരമായതിനാൽ ഡോക്ടർമാർ അദ്ദേഹത്തിന് ആറാഴ്ചത്തെ പൂർണ്ണ വിശ്രമം നിർദ്ദേശിച്ചിരിക്കുകയാണ്. ഇത് ചിത്രീകരണത്തെ ബാധിക്കുമോ എന്ന് വ്യക്തമല്ല. മിഥുൻ മാനുവൽ തോമസിന്റെ സംവിധാനത്തിൽ ഒരുങ്ങുന്ന 'ആട് 3' ഒരു ബിഗ് ബജറ്റ് എപ്പിക് ഫാന്റസി ചിത്രമായാണ് അണിയറയിൽ ഒരുങ്ങുന്നത്. ജയസൂര്യ നായകനാകുന്ന ചിത്രത്തിൽ 'ഡ്യൂഡ്' എന്ന ജനപ്രിയ കഥാപാത്രമായാണ് വിനായകൻ വീണ്ടുമെത്തുന്നത്. 2026 മാർച്ച് 19-നാണ് ചിത്രം തിയേറ്ററുകളിൽ എത്തിക്കാൻ പദ്ധതിയിട്ടിരിക്കുന്നത്.