തൃശൂർ: ഗുരുവായൂർ ദേവസ്വത്തിന്റെ പതിനാറാമത് ചെയർമാനായി എ.വി. ഗോപിനാഥ് ചുമതലയേറ്റു. ഡോ. വി.കെ. വിജയൻ സ്ഥാനമൊഴിഞ്ഞതിനെത്തുടർന്നാണ് പാലക്കാട് പെരിങ്ങോട്ടുകുറിശ്ശി സ്വദേശിയായ ഗോപിനാഥിനെ സർക്കാർ ചെയർമാനായി നാമനിർദ്ദേശം ചെയ്തത്. ഇതോടൊപ്പം എം.യു. ഷിനിജയും ഭരണസമിതി അംഗമായി സത്യപ്രതിജ്ഞ ചെയ്തു.(AV Gopinath and MU Shinija Took charge in Guruvayur Devaswom)
ഞായറാഴ്ച രാവിലെ പത്തേകാലോടെ ഗുരുവായൂർ തെക്കേ നടയിലെ വൈഷ്ണവം ഓഡിറ്റോറിയത്തിലായിരുന്നു സത്യപ്രതിജ്ഞാ ചടങ്ങുകൾ നടന്നത്. ദേവസ്വം കമ്മീഷണർ എം.ജി. രാജമാണിക്കം ഐ.എ.എസ് ചടങ്ങിൽ അധ്യക്ഷത വഹിക്കുകയും പുതിയ അംഗങ്ങൾക്ക് സത്യവാചകം ചൊല്ലിക്കൊടുക്കുകയും ചെയ്തു. മല്ലിശേരി പരമേശ്വരൻ നമ്പൂതിരിപ്പാട് ഭദ്രദീപം തെളിയിച്ചു. എം.എൽ.എ എൻ.കെ. അക്ബർ, നഗരസഭാ ചെയർപേഴ്സൺ സുനിത അരവിന്ദൻ തുടങ്ങിയ പ്രമുഖർ ചടങ്ങിൽ പങ്കെടുത്തു.
മുൻ ആലത്തൂർ എം.എൽ.എയായ ഇദ്ദേഹം പെരിങ്ങോട്ടുകുറിശ്ശി പഞ്ചായത്ത് പ്രസിഡന്റായി സേവനമനുഷ്ഠിച്ചിട്ടുണ്ട്. ഗുരുവായൂർ ദേവസ്വം ഭരണസമിതിയിലെ ആദ്യ വനിതാ അംഗം എന്ന ചരിത്രനേട്ടവുമായാണ് ഷിനിജ ചുമതലയേറ്റത്.
