വിദ്യാര്ഥിനിക്ക് നേരെ ലൈംഗികാതിക്രമം; മൂന്ന് അധ്യാപകര് കൂടി അറസ്റ്റില്
Nov 22, 2022, 10:35 IST
കൊച്ചി: തൃപ്പൂണിത്തറയില് പ്ലസ് വണ് വിദ്യാര്ഥിനിക്ക് നേരെ അധ്യാപകന് ലൈംഗികാതിക്രമം നടത്തിയ സംഭവത്തില് സ്കൂള് പ്രിന്സിപ്പല് അടക്കം മൂന്ന് അധ്യാപകര് കൂടി അറസ്റ്റില്. പ്രിന്സിപ്പല് ശിവകല, അധ്യാപകരായ ഷൈലജ, ജോസഫ് എന്നിവരെയാണ് അറസ്റ്റ് ചെയ്തത്.
വിദ്യാര്ഥിനി പരാതി നല്കിയിട്ടും പീഡനവിവരം മറച്ചുവച്ച് പ്രതിയെ സംരക്ഷിച്ചതിനാണ് ഇവര്ക്കെതിരെ കേസെടുത്തിരിക്കുന്നത്. തിങ്കളാഴ്ച വിദ്യാര്ഥിനിയോട് അപമര്യാദയായി പെരുമാറിയ അധ്യാപകന് കിരണ് പിടിയിലായിരുന്നു. നാഗര്കോവിലിലെ ബന്ധുവീട്ടില് നിന്നാണ് പ്രതിയെ അറസ്റ്റ് ചെയ്തത്.
നവംബര് 16 നാണ് കേസിനാസ്പദമായ സംഭവം നടന്നത്. കൊച്ചിയില് സ്വകാര്യ ബസ് സമരമായതിനാല് സ്കൂളില് ഗസ്റ്റ് അധ്യാപകനായി എത്തിയ കിരണിനൊപ്പം ഇരുചക്രവാഹനത്തില് കലോത്സവത്തില് പങ്കെടുക്കാന് പോയ വിദ്യാര്ഥിനിയോട് ഇയാള് അപമര്യാദയായി പെരുമാറുകയായിരുന്നു.