വർഷങ്ങളായി സിനിമാപ്രേമികൾ കാത്തിരിക്കുന്ന നിതേഷ് തിവാരിയുടെ ബ്രഹ്മാണ്ഡ ചിത്രം
‘രാമായണ’ ത്തിന്റെ ട്രെയിലർ പുറത്തിറങ്ങി. നേരത്തെ പുറത്തുവന്ന ടീസറിൽ രൺബീർ കപൂർ അവതരിപ്പിക്കുന്ന ശ്രീരാമനായിരുന്നു പ്രധാന ആകർഷണമെങ്കിൽ, പുതിയ ട്രെയിലറിൽ ശ്രദ്ധ മുഴുവൻ പിടിച്ചുപറ്റുന്നത് യാഷിന്റെ രാവണനാണ് (Ramayana Trailer). വ്യത്യസ്തമായ രൂപഭാവത്തിലും ഗംഭീരമായ അവതരണത്തോടെയും എത്തുന്ന രാവണ കഥാപാത്രം ട്രെയിലറിലെ ഏറ്റവും വലിയ ഹൈലൈറ്റായി മാറിയിരിക്കുകയാണ്.
മുഖം മൂടിയ നിലയിൽ രാവണനെ പരിചയപ്പെടുത്തിക്കൊണ്ടാണ് ട്രെയിലർ ആരംഭിക്കുന്നത്. പുരാതന ഇതിഹാസത്തിന്റെ പശ്ചാത്തലത്തെ സംവിധായകൻ നിതേഷ് തിവാരി തന്റെ ദൃശ്യഭാവനയുമായി ചേർത്തപ്പോൾ, ശക്തനും രാജകീയ പ്രൗഢിയുമുള്ള ഒരു രാവണനെയാണ് ചിത്രത്തിൽ അവതരിപ്പിച്ചിരിക്കുന്നത്. സ്വർഗം, ഭൂമി, പാതാളം എന്നീ ത്രിലോകങ്ങളിലേക്കും തന്റെ ആധിപത്യം വ്യാപിച്ചിട്ടുണ്ടെന്ന് രാവണൻ പ്രഖ്യാപിക്കുന്നതോടെയാണ് കഥയുടെ പ്രധാന സംഘർഷത്തിലേക്ക് ട്രെയിലർ കടക്കുന്നത്. രാവണന്റെ ക്രൂരതകളിൽ നിന്ന് മനുഷ്യരാശിയെ രക്ഷിക്കാനായി ശ്രീരാമൻ ജനിക്കുന്നതായാണ് ട്രെയിലർ സൂചിപ്പിക്കുന്നത്.
രൺബീർ കപൂർ ശ്രീരാമനായും സായ് പല്ലവി സീതയായും എത്തുന്നു. രാമ-സീത കഥാപാത്രങ്ങളുടെ ശാന്തവും ആത്മീയവുമായ ഭാവം ട്രെയിലറിൽ ശ്രദ്ധേയമാണ്. ഇതിഹാസ കഥാപാത്രങ്ങളുടെ ഗൗരവവും വൈകാരികതയും നിലനിർത്തിക്കൊണ്ട് പുതിയ തലമുറയിലെ താരങ്ങളെ അവതരിപ്പിക്കാനുള്ള ശ്രമമാണ് ചിത്രത്തിലൂടെ നടക്കുന്നതെന്നാണ് ട്രെയിലർ നൽകുന്ന സൂചന. ചിത്രത്തിലെ പ്രധാന കഥാപാത്രങ്ങളിൽ ഭൂരിഭാഗത്തെയും ട്രെയിലർ പരിചയപ്പെടുത്തുന്നുണ്ട്. കൈകേയിയായി ലാറ ദത്തയും ശൂർപ്പണഖയായി രാകുൽ പ്രീത് സിങ്ങും എത്തുന്നു. ശൂർപ്പണഖയുടെ ഭർത്താവും അസുരരാജകുമാരനുമായ വിദ്യുത്ജിഹ്വയുടെ വേഷത്തിൽ വിവേക് ഒബ്റോയിയും അഭിനയിക്കുന്നു. അതേസമയം, ഹനുമാനായി എത്തുന്ന സണ്ണി ഡിയോളിന്റെ കഥാപാത്രത്തെ ട്രെയിലറിൽ കാണിച്ചിട്ടില്ല. ചിത്രത്തിലെ പ്രധാന കഥാപാത്രങ്ങളിലൊന്നായ ഹനുമാനെ ട്രെയിലറിൽ നിന്ന് ഒഴിവാക്കിയത് ആരാധകരിൽ കൂടുതൽ ആകാംക്ഷ സൃഷ്ടിച്ചിട്ടുണ്ട്.
ഇന്ത്യൻ ടെലിവിഷനിലെ എക്കാലത്തെയും ശ്രദ്ധേയമായ ‘രാമായണ’ പരമ്പരയിൽ ശ്രീരാമനെ അവതരിപ്പിച്ച അരുണ് ഗോവിലും ചിത്രത്തിന്റെ ഭാഗമാണ്. ശ്രീരാമന്റെ പിതാവായ ദശരഥ മഹാരാജാവിന്റെ വേഷത്തിലാണ് അദ്ദേഹം എത്തുന്നത്. പഴയ തലമുറയുടെ രാമായണ ഓർമ്മകളെയും പുതിയ തലമുറയുടെ സിനിമാനുഭവത്തെയും ബന്ധിപ്പിക്കുന്ന ഘടകമായാണ് അരുണ് ഗോവിലിന്റെ സാന്നിധ്യത്തെ വിലയിരുത്തുന്നത്. വിപുലമായ സിജിഐ, വിഎഫ്എക്സ് ദൃശ്യങ്ങളിലൂടെ ഒരു വലിയ ദൃശ്യവിരുന്നാണ് ചിത്രം വാഗ്ദാനം ചെയ്യുന്നത്. നൂറ്റാണ്ടുകളായി ഇന്ത്യൻ ജനതയുടെ സാംസ്കാരിക ജീവിതത്തിന്റെ ഭാഗമായ രാമായണ കഥയെ ആധുനിക സിനിമാ സാങ്കേതികവിദ്യയുടെ സഹായത്തോടെ പുതിയ തലമുറയ്ക്ക് മുന്നിലെത്തിക്കുകയാണ് നിതേഷ് തിവാരി. ഗംഭീരമായ ദൃശ്യങ്ങളും വമ്പൻ കഥാപാത്രനിരയും ഇതിഹാസത്തിന്റെ വൈകാരികതയും ഒരുമിക്കുന്ന ചിത്രമായിരിക്കും ‘രാമായണ’മെന്ന പ്രതീക്ഷയാണ് ട്രെയിലർ ഉയർത്തുന്നത്. ‘രാമായണ പാർട്ട് 1’ ഈ വർഷം ദീപാവലി റിലീസായി തിയേറ്ററുകളിലെത്തും. ട്രെയിലർ പുറത്തിറങ്ങിയതോടെ രൺബീറിന്റെ ശ്രീരാമനും സായ് പല്ലവിയുടെ സീതയും ശ്രദ്ധ നേടുമ്പോൾ, യാഷിന്റെ രാവണ അവതാരമാണ് സമൂഹമാധ്യമങ്ങളിൽ ഏറ്റവും കൂടുതൽ ചർച്ചയാകുന്നത്.
Summary: The trailer of Nitesh Tiwari’s Ramayana introduces Ranbir Kapoor as Rama, Sai Pallavi as Sita and Yash as a powerful Ravana. With grand CGI, VFX and a star-studded cast, Ramayana Part 1 is set for a Diwali release this year.
