കൊച്ചി: പൃഥ്വിരാജിനെ നായകനാക്കി ഒരുങ്ങുന്ന ബ്രഹ്മാണ്ഡ ചിത്രം ‘ഖലീഫ’യുടെ പുതിയ സ്റ്റിൽ സോഷ്യൽ മീഡിയയിൽ രസകരമായ ചർച്ചകൾക്ക് വഴിവെച്ചു. ചിത്രത്തിൽ പൃഥ്വിരാജിന്റെ മാതാപിതാക്കളുടെ വേഷത്തിൽ രഞ്ജി പണിക്കരും മോഹിനിയും എത്തുന്നുവെന്ന തരത്തിലുള്ള അനുമാനങ്ങളാണ് ചിലർ പങ്കുവെക്കുന്നത് (Khalifa Movie Mohanlal Ranji Panicker Casting). ഇതിനെ തുടർന്നാണ് മോഹൻലാലും രഞ്ജി പണിക്കരും തമ്മിലുള്ള കഥാപാത്രബന്ധത്തെ ചൊല്ലി സോഷ്യൽ മീഡിയയിൽ തമാശ നിറഞ്ഞ പോസ്റ്റുകൾ പ്രത്യക്ഷപ്പെട്ടത്.
കഴിഞ്ഞ ദിവസം പുറത്തിറങ്ങിയ ചിത്രത്തിലെ ഗാനത്തിന്റെ ഒരു സ്റ്റില്ലിലാണ് പൃഥ്വിരാജും നായിക മാളവിക ശർമയും വിവാഹവേഷത്തിൽ പ്രത്യക്ഷപ്പെട്ടത്. ഇവർക്കൊപ്പം രഞ്ജി പണിക്കരും മോഹിനിയും നിൽക്കുന്ന ചിത്രമാണ് ആരാധകരുടെ ശ്രദ്ധ നേടിയത്. സ്റ്റില്ലിലെ കഥാപാത്രങ്ങളുടെ സ്ഥാനത്തെ അടിസ്ഥാനമാക്കി, രഞ്ജി പണിക്കരും മോഹിനിയും പൃഥ്വിരാജിന്റെ മാതാപിതാക്കളായിരിക്കാമെന്ന അനുമാനത്തിലേക്കാണ് ചില സോഷ്യൽ മീഡിയ ഉപയോക്താക്കൾ എത്തിയത്.
ചിത്രത്തിൽ മോഹൻലാൽ അവതരിപ്പിക്കുന്ന അധോലോക നായകൻ മാമ്പറക്കൽ അഹമ്മദ് അലിയുടെ കൊച്ചുമകനാണ് പൃഥ്വിരാജിന്റെ കഥാപാത്രമായ അമീർ അലി എന്നാണ് നേരത്തെ പുറത്തുവന്ന വിവരങ്ങൾ. ഇതോടെ രഞ്ജി പണിക്കർ പൃഥ്വിരാജിന്റെ പിതാവായാൽ അദ്ദേഹം മോഹൻലാലിന്റെ മകനായി എത്തുമോയെന്ന തരത്തിലുള്ള തമാശകളും സോഷ്യൽ മീഡിയയിൽ പ്രചരിച്ചു. ‘രഞ്ജി പണിക്കരുടെ മകനായി പൃഥ്വിരാജ് എത്തുന്നത് അംഗീകരിക്കാം. എന്നാൽ മോഹൻലാലിന്റെ മകനായി രഞ്ജി പണിക്കർ എത്തുന്നതോ? എന്തൊരു മോശം കാസ്റ്റിങ്’ എന്ന തരത്തിൽ ഒരു സിനിമാ ഗ്രൂപ്പിൽ പങ്കുവെച്ച പോസ്റ്റാണ് ചർച്ചയ്ക്ക് തുടക്കമിട്ടത്. ‘ജസ്റ്റ് ഖലീഫ തിങ്സ്’ എന്ന കുറിപ്പോടെയായിരുന്നു പോസ്റ്റ്.
എന്നാൽ കഥാപാത്രങ്ങളുടെ ബന്ധം ഒരു സ്റ്റിൽ മാത്രം കണ്ട് തീരുമാനിക്കാനാകില്ലെന്നാണ് നിരവധി ആരാധകരുടെ മറുപടി. രഞ്ജി പണിക്കർ നായികയുടെ പിതാവായിരിക്കാമെന്നും, പൃഥ്വിരാജ് മോഹൻലാലിന്റെ മകളുടെ മകനായിരിക്കാമെന്നും ചിലർ ചൂണ്ടിക്കാട്ടി. ചിത്രം പുറത്തിറങ്ങും മുമ്പ് കഥാപാത്രങ്ങളുടെ പ്രായവും കുടുംബബന്ധങ്ങളും വിലയിരുത്തി വിമർശിക്കുന്നത് അനാവശ്യമാണെന്നും അഭിപ്രായങ്ങൾ ഉയർന്നു. സിനിമയിൽ കഥാപാത്രങ്ങളുടെ പ്രായത്തേക്കാൾ പ്രധാനപ്പെട്ടത് അഭിനയമികവാണെന്നും ആരാധകർ പ്രതികരിച്ചു. മുൻപ് വിവിധ സിനിമകളിൽ താരങ്ങൾ യഥാർഥ പ്രായവ്യത്യാസം മറികടന്ന് അച്ഛൻ-മകൻ ബന്ധങ്ങളിലുള്ള കഥാപാത്രങ്ങളെ അവതരിപ്പിച്ചിട്ടുണ്ടെന്നും അവർ ചൂണ്ടിക്കാട്ടി.
അതേസമയം, ‘ഖലീഫ’യിലെ കഥാപാത്രങ്ങളുടെ കൃത്യമായ കുടുംബബന്ധങ്ങളെക്കുറിച്ച് ചിത്രത്തിന്റെ അണിയറപ്രവർത്തകർ ഔദ്യോഗിക വിശദീകരണം നൽകിയിട്ടില്ല. വൻ ബജറ്റിൽ ഒരുങ്ങുന്ന ചിത്രത്തിൽ അതിഥി വേഷത്തിൽ മോഹൻലാലും എത്തുന്നുണ്ട്. പൃഥ്വിരാജ് അവതരിപ്പിക്കുന്ന അമീർ അലി എന്ന കഥാപാത്രത്തെ ചുറ്റിപ്പറ്റിയാണ് സിനിമയുടെ കഥ വികസിക്കുന്നതെന്നാണ് സൂചന. ചിത്രം ഓഗസ്റ്റ് 20ന് തിയേറ്ററുകളിലെത്തും.
Summary: A still from Prithviraj’s upcoming film Khalifa has sparked a humorous discussion on social media over the possible relationship between the characters played by Mohanlal, Ranji Panicker and Prithviraj. Fans defended the casting, pointing out that the film’s character relationships have not yet been officially revealed.
