സോഷ്യൽ മീഡിയയിൽ തന്നെ ‘പുരുഷവിദ്വേഷി’ എന്ന് വിളിച്ച് അധിക്ഷേപിച്ചവർക്ക് ചുട്ട മറുപടിയുമായി ഗായികയും ഡബ്ബിങ് ആർട്ടിസ്റ്റുമായ ചിന്മയി ശ്രീപദ. പുരുഷന്മാരെ വെറുക്കുന്നവളാണ് താനെന്നും വിവാഹം കഴിക്കരുതെന്ന് ഉപദേശിക്കുന്നുവെന്നും ആരോപിച്ച എക്സ് (ട്വിറ്റർ) യൂസറുടെ പോസ്റ്റിന് മറുപടിയായാണ് ഗായിക തന്റെ നിലപാട് വ്യക്തമാക്കിയത് (Chinmayi Sripada Misandry Controversy). താൻ പുരുഷ വിരോധിയല്ലെന്നും, പകരം ലിംഗഭേദമില്ലാതെ ലൈംഗിക അതിക്രമങ്ങൾക്കെതിരെ പ്രതികരിക്കുന്ന ഒരാളാണെന്നും ചിന്മയി വ്യക്തമാക്കി.
18 വയസ്സിന് മുകളിൽ പ്രായമുള്ള പുരുഷന്മാർ നേരിടുന്ന ലൈംഗിക അതിക്രമങ്ങൾക്കെതിരെയും, അവർക്ക് ഇന്ത്യയിൽ വേണ്ടത്ര നിയമപരിരക്ഷ ലഭിക്കുന്നില്ലെന്നതിനെക്കുറിച്ചും സംസാരിക്കുന്ന ചുരുക്കം ചിലരിൽ ഒരാളാണ് താനെന്ന് ചിന്മയി പറഞ്ഞു. സ്ത്രീകൾക്കെതിരെയുള്ള അതിക്രമങ്ങൾക്കൊപ്പം തന്നെ പുരുഷന്മാർ നേരിടുന്ന ബുദ്ധിമുട്ടുകളെക്കുറിച്ചും താൻ സംസാരിക്കാറുണ്ട്. എന്നിട്ടും തന്നെ പുരുഷവിരോധിയായി ചിത്രീകരിക്കുന്നത് പ്രതികാരബുദ്ധിയോടെയാണെന്നും ഗായിക കൂട്ടിച്ചേർത്തു. അടിച്ചമർത്തപ്പെടുന്ന സ്ത്രീകളുടെ ശബ്ദത്തെയും കോപത്തെയും നിശ്ശബ്ദരാക്കാനുള്ള ഒരു തന്ത്രമാണ് ഇത്തരം ആരോപണങ്ങളെന്ന് ചിന്മയി മുൻപും വ്യക്തമാക്കിയിട്ടുണ്ട്.
2018-ലെ #മിടൂ (Me Too) ക്യാമ്പെയ്നിന്റെ ഭാഗമായി ഗാനരചയിതാവ് വൈരമുത്തുവിനെതിരെ ലൈംഗികാരോപണം ഉന്നയിച്ചതോടെയാണ് ചിന്മയി ഇത്തരം ആക്രമണങ്ങൾക്ക് കൂടുതൽ പാത്രമായത്. ഇതിനെത്തുടർന്ന് തനിക്ക് പല തൊഴിലവസരങ്ങളും നഷ്ടപ്പെട്ടുവെന്ന് ഗായിക നേരത്തെ വെളിപ്പെടുത്തിയിരുന്നു. നടനും സംവിധായകനുമായ രാഹുൽ രവീന്ദ്രനാണ് ചിന്മയിയുടെ ഭർത്താവ്. ഇവർക്ക് ഇരട്ടക്കുട്ടികളുമുണ്ട്. വിമർശനങ്ങൾക്കു മുന്നിൽ തളരാതെ, സാമൂഹിക വിഷയങ്ങളിൽ തന്റെ നിലപാടുകൾ ഉറക്കെ പറയുന്ന ചിന്മയിയുടെ രീതി വലിയൊരു വിഭാഗം പിന്തുണയ്ക്കുന്നുമുണ്ട്.
Summary: Singer and dubbing artist Chinmayi Sripada has hit back at social media trolls who labeled her a “misandrist” for her views on gender and justice. Responding to claims that she hates men, Chinmayi asserted that she is among the few voices actively speaking up about the lack of legal protections for men over 18 who face sexual abuse, alongside her advocacy for women. She emphasized that such labels are merely tactics used to silence voices against oppression and reiterated her commitment to addressing sexual violence impartially, regardless of gender.
