കൊച്ചി: നീറ്റ് പരീക്ഷാ ക്രമക്കേടുമായി ബന്ധപ്പെട്ട് രാജ്യത്ത് ശക്തമാകുന്ന വിദ്യാർഥി പ്രതിഷേധങ്ങൾക്കിടെ നടി അഹാന കൃഷ്ണ തന്റെ നിലപാട് വ്യക്തമാക്കി. അച്ഛനും നടനും ബിജെപി നേതാവുമായ കൃഷ്ണകുമാർ പങ്കുവെച്ച അഭിപ്രായത്തിൽ നിന്ന് വ്യത്യസ്തമായ പ്രതികരണമാണ് അഹാന സമൂഹമാധ്യമത്തിലൂടെ നടത്തിയത് (Ahaana Krishna NEET Protest Statement). പ്രധാനമന്ത്രി നരേന്ദ്ര മോദിയുടെ ചിത്രം പങ്കുവെച്ച് ഡൽഹിയിലെ പ്രതിഷേധങ്ങളെ വിമർശിക്കുന്ന തരത്തിൽ കൃഷ്ണകുമാർ നടത്തിയ പരാമർശം സമൂഹമാധ്യമങ്ങളിൽ വലിയ ചർച്ചയ്ക്ക് വഴിവെച്ചിരുന്നു. ഇതിന് പിന്നാലെയാണ് വിദ്യാർഥികളുടെ മാനസിക സംഘർഷങ്ങളെയും വിദ്യാഭ്യാസ സംവിധാനത്തിലെ വീഴ്ചകളെയും ചൂണ്ടിക്കാട്ടി അഹാന ഇൻസ്റ്റഗ്രാം സ്റ്റോറിയിലൂടെ പ്രതികരിച്ചത്.
“ഓരോ പരീക്ഷയ്ക്കും പിന്നിൽ നമ്മൾ കാണാത്ത ഒരു കഥയുണ്ട്. വർഷങ്ങളുടെ തയ്യാറെടുപ്പും ത്യാഗവും കഠിനാധ്വാനവും ഒരുനാൾ ഫലം കാണുമെന്ന വിശ്വാസവുമാണ് ഓരോ വിദ്യാർഥിയുടെയും യാത്ര. വാർത്തകളുടെ തലക്കെട്ടുകൾക്ക് പിന്നിൽ സ്വപ്നങ്ങളുള്ള യുവാക്കളും പ്രതീക്ഷയോടെ കാത്തിരിക്കുന്ന കുടുംബങ്ങളുമുണ്ട്,” എന്നാണ് അഹാന കുറിച്ചത്.
പരീക്ഷയ്ക്ക് വർഷങ്ങളോളം തയ്യാറെടുത്ത ശേഷം അവസാന നിമിഷം പരീക്ഷ റദ്ദായതിന്റെ ആഘാതം നേരിട്ട സുഹൃത്തുക്കളെ താൻ നേരിട്ട് കണ്ടിട്ടുണ്ടെന്നും, അത്തരം അനുഭവങ്ങൾ ഒരു വിദ്യാർഥിയുടെ ഭാവി പദ്ധതികളെയും നീതിയിലുള്ള വിശ്വാസത്തെയും തകർക്കുന്നതാണെന്നും അവർ പറഞ്ഞു.
സാമ്പത്തികമായി പിന്നാക്കം നിൽക്കുന്ന കുടുംബങ്ങളിലെ കുട്ടികൾക്ക് വിദ്യാഭ്യാസം മാത്രമാണ് ജീവിതം മാറ്റിമറിക്കാനുള്ള ഏറ്റവും വലിയ പ്രതീക്ഷയെന്നും അഹാന ചൂണ്ടിക്കാട്ടി. “സാമ്പത്തികമായി സുരക്ഷിതമായ കുടുംബങ്ങളിലെ കുട്ടികൾക്ക് ഇത് ഒരു തിരിച്ചടിയായി മാത്രം തോന്നാം. എന്നാൽ പരിമിത സാഹചര്യങ്ങളിൽ ജീവിക്കുന്ന കുടുംബങ്ങളിലെ കുട്ടികൾക്ക് വിദ്യാഭ്യാസമാണ് ജീവിതം മാറ്റാനുള്ള ഏക പ്രതീക്ഷ. ആ പ്രതീക്ഷ നഷ്ടപ്പെടുമ്പോൾ നഷ്ടമാകുന്നത് ഒരു പരീക്ഷ മാത്രമല്ല, ഒരു കുടുംബത്തിന്റെ മുഴുവൻ സ്വപ്നങ്ങളുമാണ്,” എന്നും അവർ വ്യക്തമാക്കി.
വിദ്യാഭ്യാസ സംവിധാനത്തിലെ വീഴ്ചകൾക്ക് ഉത്തരവാദികളായവർക്കെതിരെ കർശന നടപടി സ്വീകരിക്കണമെന്നും അഹാന ആവശ്യപ്പെട്ടു. “ഉത്തരവാദികൾ ആരായാലും യാതൊരു ഇളവുമില്ലാതെ നിയമത്തിന് മുന്നിൽ കൊണ്ടുവരണം. സുതാര്യവും നീതിയുക്തവും വിദ്യാർഥികളുടെ വിശ്വാസം നേടുന്നതുമായ ഒരു വിദ്യാഭ്യാസ സംവിധാനം നമ്മുടെ കുട്ടികൾക്ക് ലഭിക്കേണ്ടത് അനിവാര്യമാണ്,” എന്നും അവർ കൂട്ടിച്ചേർത്തു. ഇനിയും ഒരു വിദ്യാർഥിക്കും ഇത്തരം മാനസിക ഭാരങ്ങൾ വഹിക്കേണ്ടി വരാതിരിക്കട്ടെയെന്ന പ്രത്യാശയും അഹാന തന്റെ കുറിപ്പിൽ പങ്കുവെച്ചു. അഹാനയുടെ പ്രതികരണം സമൂഹമാധ്യമങ്ങളിൽ വ്യാപകമായി ശ്രദ്ധ നേടുകയും നിരവധി പേർ പിന്തുണ അറിയിക്കുകയും ചെയ്തു.
Summary: Actress Ahaana Krishna has expressed support for students amid the ongoing NEET protest, sharing an emotional note on the struggles behind every examination. Her statement differs from the views expressed by her father, actor and BJP leader Krishna Kumar, and calls for a transparent and fair education system.
