കൊച്ചി: താരസംഘടനയായ ‘അമ്മ’യുടെ എക്സിക്യൂട്ടീവ് അംഗം ടിനി ടോം, ലക്ഷ്മിപ്രിയ എന്നിവർക്കെതിരെ താൻ ഉന്നയിച്ച പരാതികൾ കേൾക്കാൻ നിഷ്പക്ഷമായ പ്രത്യേക സമിതി രൂപീകരിക്കണമെന്ന ആവശ്യവുമായി നടി അൻസിബ ഹസൻ രംഗത്ത് (Ansiba Hassan Complaint Against Tini Tom). അൻസിബയുടെ വെളിപ്പെടുത്തലുകളെ തുടർന്ന് സംഘടനയ്ക്കുള്ളിൽ വലിയ ചേരിതിരിവും തർക്കങ്ങളും ഉടലെടുത്ത പശ്ചാത്തലത്തിൽ, നേരിട്ടെത്തി തെളിവുകൾ ഹാജരാക്കാൻ എക്സിക്യൂട്ടീവ് കമ്മിറ്റി നടിക്ക് കത്ത് നൽകിയിരുന്നു. ജൂൺ ഒന്ന് മുതൽ മൂന്ന് വരെയുള്ള തീയതികളിൽ ഹാജരാകാനായിരുന്നു സംഘടനയുടെ നിർദ്ദേശം. എന്നാൽ ഇതിന് മറുപടിയായി അയച്ച ഇമെയിലിലാണ്, തനിക്കെതിരെ നിൽക്കുന്ന എക്സിക്യൂട്ടീവ് കമ്മിറ്റിക്ക് മുന്നിൽ ഹാജരാകില്ലെന്ന നിലപാടും അന്വേഷണത്തിനായുള്ള കർശന നിബന്ധനകളും അൻസിബ വ്യക്തമാക്കിയത്. ജുൺ ഒന്നാം തീയതിയോ അല്ലെങ്കിൽ ഏഴാം തീയതിക്ക് ശേഷമോ മാത്രമേ തനിക്ക് വരാൻ സാധിക്കൂ എന്നും നടി അറിയിച്ചിട്ടുണ്ട്.
തന്റെ ആരോപണങ്ങൾ എക്സിക്യൂട്ടീവ് കമ്മിറ്റി അംഗങ്ങൾക്ക് എതിരെയായതിനാൽ അവർ തന്നെ പരാതി കേട്ടാൽ നീതി ലഭിക്കില്ലെന്ന് അൻസിബ ചൂണ്ടിക്കാണിക്കുന്നു. ഇതിന് പകരമായി രമേഷ് പിഷാരടി, മാലാ പാർവതി, ധ്യാൻ ശ്രീനിവാസൻ എന്നിവരടങ്ങുന്ന ഒരു നിഷ്പക്ഷ സമിതി വേണമെന്നാണ് അൻസിബയുടെ പ്രധാന ആവശ്യം. സമിതിക്ക് മുൻപിൽ പരാതി ബോധിപ്പിക്കുന്ന നടപടികൾ പൂർണ്ണമായും വീഡിയോയിൽ ചിത്രീകരിക്കണമെന്നും അതിന്റെ ഒരു പകർപ്പ് തനിക്ക് നൽകണമെന്നും ഇമെയിലിൽ ആവശ്യപ്പെടുന്നുണ്ട്. കുറ്റാരോപിതരായ ടിനി ടോം ഉൾപ്പെടെയുള്ളവരുടെ ഭാഗം കൂടി കേട്ട ശേഷം മാത്രമേ അന്തിമ തീരുമാനം എടുക്കാവൂ എന്നും പൂർണ്ണമായ നീതി ഉറപ്പാക്കുന്ന സംവിധാനത്തിലൂടെ മാത്രമേ മുന്നോട്ട് പോകൂ എന്നും അൻസിബ കത്തിലൂടെ വ്യക്തമാക്കി.
Summary: Actress Ansiba Hassan has demanded an independent committee to hear her complaint against AMMA executive members Tini Tom and Lakshmipriya. In response to the association’s official letter, Ansiba stated that hearing the complaint by the executive committee itself would deny her justice. She proposed a new panel consisting of Ramesh Pisharody, Maala Parvathi, and Dhyan Sreenivasan, along with a strict condition to video-record the entire proceeding.
