കൊച്ചി: മിനിസ്ക്രീനിലും ബിഗ് സ്ക്രീനിലും ഒരുപോലെ തിളങ്ങി നിൽക്കുന്ന, മലയാളികളുടെ പ്രിയപ്പെട്ട നടിമാരിൽ ഒരാളാണ് സ്വാസിക (Actress Swasika Interview). മലയാളത്തിന് പുറമെ ഇന്ന് തമിഴ് സിനിമാ ലോകത്തും താരം ഏറെ സജീവമാണ്. താൻ വിവാഹം കഴിക്കാൻ പോകുന്ന ആളെ കാണാൻ നല്ല ഭംഗിയുണ്ടാകണമെന്ന് താൻ ആഗ്രഹിച്ചിരുന്നുവെന്നും അതിൽ യാതൊരു തെറ്റുമില്ലെന്നും തുറന്നുപറഞ്ഞിരിക്കുകയാണ് താരം ഇപ്പോൾ. ‘ജെ.എഫ്.ഡബ്ല്യു’ എന്ന യൂട്യൂബ് ചാനലിന് നൽകിയ അഭിമുഖത്തിലാണ് തന്റെ വ്യക്തിപരമായ ആഗ്രഹങ്ങളെക്കുറിച്ചും മുൻകാല പ്രണയ തകർച്ചയെക്കുറിച്ചും താരം മനസ്സ് തുറന്നത്.
ലുക്കിൽ ഒന്നും കാര്യമില്ലെന്നും മനുഷ്യന്റെ മനസ്സാണ് നോക്കേണ്ടതെന്നുമൊക്കെ ഒരുപാട് പേർ തന്നോട് പറയാറുണ്ടായിരുന്നുവെന്ന് സ്വാസിക വ്യക്തമാക്കുന്നു. “അത് സത്യമാണ്, അതിൽ കാര്യമില്ലെന്ന് ഞാൻ പറയില്ല. പക്ഷേ എനിക്കെപ്പോഴും ലുക്കും പ്രധാനമാണ്. എനിക്ക് വരുന്ന ആൾ സൗന്ദര്യമുള്ള ഒരാളായിരിക്കണമെന്ന് എനിക്കുണ്ടായിരുന്നു. അത് എന്റെ വലിയൊരു ആഗ്രഹമായിരുന്നു. മറ്റുള്ളവർക്ക് അത് ഒരുപക്ഷേ തെറ്റായി തോന്നാം, പക്ഷെ ഞാൻ അങ്ങനെതന്നെയാണ് ആഗ്രഹിച്ചത്. സ്വപ്നം കാണുന്നതിന് ആർക്കും ഒന്നിനും നിയന്ത്രണമില്ലല്ലോ. ഞാനൊരു കടുത്ത ശിവഭക്തയാണ്. ‘ഓം നമഃ ശിവായ’ സീരിയലിലെയൊക്കെ ശിവനെ കാണുമ്പോൾ അതുപോലെ നല്ല ലുക്കുള്ള ഒരാൾ വേണമെന്നുണ്ടായിരുന്നു,” സ്വാസിക ചിരിച്ചുകൊണ്ട് പറഞ്ഞു.
പങ്കാളിക്ക് വേണ്ട ഗുണങ്ങളും പ്രണയ തകർച്ചയും
ബാഹ്യസൗന്ദര്യത്തിന് പുറമെ തന്റെ ഭർത്താവാകാൻ പോകുന്ന ആൾക്ക് ഉണ്ടായിരിക്കണമെന്ന് താൻ ആഗ്രഹിച്ച ഏറ്റവും പ്രധാനപ്പെട്ട ഗുണം മറ്റുള്ളവരെ ബഹുമാനിക്കുക എന്നതാണെന്നും സ്വാസിക കൂട്ടിച്ചേർത്തു. സ്ത്രീ എന്നോ പുരുഷനെന്നോ ഭേദമില്ലാതെ എല്ലാ മനുഷ്യരെയും ബഹുമാനിക്കുന്ന, മറ്റുള്ളവരുടെ വികാരങ്ങൾക്ക് കൃത്യമായ വില കൊടുക്കുന്ന ഒരാളായിരിക്കണം പങ്കാളിയെന്ന് ആഗ്രഹിച്ചിരുന്നു. അതോടൊപ്പം തന്നെ, തന്റെ ഭർത്താവാകുന്ന ആൾ തന്നെ നോക്കുന്നതു പോലെ തന്നെ തന്റെ അച്ഛനെയും അമ്മയെയും ഒരുപോലെ നോക്കണമെന്നതും താരത്തിന്റെ പ്രധാന നിബന്ധനയായിരുന്നു.
തനിക്ക് ഇതിന് മുൻപുണ്ടായിരുന്ന ഒരു റിലേഷൻഷിപ്പിനെക്കുറിച്ചും അഭിമുഖത്തിൽ സ്വാസിക ആദ്യമായി വെളിപ്പെടുത്തി. “അത് ഒരിക്കലും ഒരു തെറ്റായ ചോയ്സ് ആയിരുന്നില്ല. ഞാൻ ആഗ്രഹിച്ചതുപോലെ നല്ല സൗന്ദര്യമുള്ള ആളായിരുന്നു അദ്ദേഹം. നന്നായി ബഹുമാനിക്കുകയും നന്നായി സംസാരിക്കുകയും ചെയ്യുമായിരുന്നു. അങ്ങനെ എല്ലാ രീതിയിലും നല്ലതായിരുന്നു. പക്ഷേ പെട്ടെന്ന് അദ്ദേഹത്തിന്റെ കുടുംബത്തിൽ ചില അപ്രതീക്ഷിത പ്രശ്നങ്ങളുണ്ടായി. കടുത്ത സാമ്പത്തിക പ്രശ്നങ്ങളൊക്കെ വന്നപ്പോൾ പ്രണയവും കുടുംബവും ഒരേസമയം ഒന്നിച്ച് ഹാൻഡിൽ ചെയ്യാൻ അദ്ദേഹത്തിന് പറ്റാതായി. കുടുംബ പ്രശ്നങ്ങൾ അദ്ദേഹത്തെ മാനസികമായി കടുത്ത രീതിയിൽ തളർത്തിയിരുന്നു. അങ്ങനെയാണ് അദ്ദേഹം എന്നിൽ നിന്നും സാവധാനം അകന്നു പോകുന്നത്,” സ്വാസിക മുൻകാല ജീവിതത്തെക്കുറിച്ച് ഓർത്തു.
പ്രമുഖ നടനും മോഡലുമായ പ്രേം ജേക്കബ് ആണ് നിലവിൽ സ്വാസികയുടെ ഭർത്താവ്. ‘മനംപോലെ മാംഗല്യം’ എന്ന സീരിയലിന്റെ സെറ്റിൽ വെച്ചുള്ള പരിചയമാണ് ഇരുവരുടെയും വിവാഹത്തിലേക്ക് നയിച്ചത്. ഏറെ നാളത്തെ പ്രണയത്തിന് ശേഷം 2024 ജനുവരി 26-നായിരുന്നു ഇരുവരും വിവാഹിതരായത്. സോഷ്യൽ മീഡിയയിൽ അതീവ സജീവമായ ഈ ദമ്പതികളുടെ വിശേഷങ്ങളെല്ലാം ആരാധകർ ഇരുകൈയും നീട്ടിയാണ് സ്വീകരിക്കാറുള്ളത്.
Story Summary: Popular South Indian actress Swasika shared her thoughts on relationships and her checklist for a life partner in a recent interview with the JFW YouTube channel. Swasika admitted that looks were highly important to her and, being a devotee of Lord Shiva, she wished for a handsome partner resembling the divine depiction. She emphasized that mutual respect and caring for parents equally were vital traits. She also opened up about a past relationship that ended due to financial and family crisis on the partner’s side. Swasika tied the knot with actor-model Prem Jacob on January 26, 2024.
