പുനെ: കനത്ത മഴയെത്തുടർന്ന് നഗരത്തിൽ ഗതാഗതം സ്തംഭിക്കുകയും പലയിടങ്ങളിലും വെള്ളക്കെട്ട് രൂപപ്പെടുകയും ചെയ്ത സാഹചര്യത്തിൽ, വീട്ടിലിരുന്ന് ജോലി ചെയ്യാൻ അനുവാദം ചോദിച്ച ജീവനക്കാരനോട് ഓഫീസിൽ ഹാജരാകാൻ നിർബന്ധം പിടിച്ച് മാനേജർ (Work From Home Denied). പുനെയിൽ നിന്നുള്ള ഈ സംഭവം സമൂഹമാധ്യമങ്ങളിൽ വലിയ പ്രതിഷേധത്തിന് വഴിവെച്ചിരിക്കുകയാണ്. ജീവനക്കാരൻ ഓഫീസിലെത്താൻ ബുദ്ധിമുട്ട് അറിയിച്ചപ്പോൾ, ഉബർ പോലുള്ള ടാക്സികൾ ഉപയോഗിച്ചോ പൊതുഗതാഗത സംവിധാനങ്ങൾ വഴിയോ ഓഫീസിലെത്തണമെന്നായിരുന്നു മാനേജരുടെ മറുപടി.
തനിക്ക് ഓഫീസിലെത്താൻ കഴിയില്ലെന്ന് ജീവനക്കാരൻ വ്യക്തമാക്കിയെങ്കിലും, മറ്റ് ജീവനക്കാർ പലരും കഷ്ടപ്പെട്ട് ഓഫീസിൽ എത്തിയിട്ടുണ്ടെന്നും അതിനാൽ വർക്ക് ഫ്രം ഹോം അനുവദിക്കാനാവില്ലെന്നുമാണ് മാനേജർ അറിയിച്ചത്. മഴയുടെ പേരിൽ ജോലിയിൽ ഇളവ് നൽകാൻ കഴിയില്ലെന്നും, എങ്ങനെയെങ്കിലും ഓഫീസിലെത്താനുമായിരുന്നു അദ്ദേഹത്തിന്റെ നിർദ്ദേശം. ഈ വാട്സ്ആപ്പ് സംഭാഷണത്തിന്റെ സ്ക്രീൻഷോട്ട് ജീവനക്കാരന്റെ സുഹൃത്ത് ‘റെഡ്ഡിറ്റ്’ പോലുള്ള പ്ലാറ്റ്ഫോമുകളിൽ പങ്കുവെച്ചതോടെയാണ് സംഭവം പുറംലോകമറിയുന്നത്.
ജീവനക്കാരുടെ സുരക്ഷയേക്കാൾ ഓഫീസിലെ ഹാജറിന് മുൻഗണന നൽകുന്ന മാനേജരുടെ നിലപാടിനെതിരെ സോഷ്യൽ മീഡിയയിൽ വ്യാപകമായ വിമർശനമാണ് ഉയരുന്നത്. തീവ്രമായ കാലാവസ്ഥാ മുന്നറിയിപ്പുകൾ നിലനിൽക്കുമ്പോൾ പോലും ജീവനക്കാരുടെ ക്ഷേമം പരിഗണിക്കാത്ത ഇത്തരം പെരുമാറ്റം അംഗീകരിക്കാനാവില്ലെന്നാണ് ഭൂരിഭാഗം പേരും അഭിപ്രായപ്പെടുന്നത്. എട്ടു മണിക്കൂർ ഓഫീസിൽ തന്നെയിരുന്ന് ജോലി ചെയ്യിക്കണമെന്ന മാനേജ്മെന്റുകളുടെ ഈ മനോഭാവം മാറണമെന്നും, പ്രതികൂല കാലാവസ്ഥകളിൽ വർക്ക് ഫ്രം ഹോം എന്നത് അവകാശമായി കാണണമെന്നും അഭിപ്രായങ്ങൾ ഉയരുന്നുണ്ട്.
തീവ്ര കാലാവസ്ഥാ സാഹചര്യങ്ങളിൽ ജോലിസ്ഥലങ്ങളിൽ കൃത്യമായ നയങ്ങൾ നടപ്പിലാക്കണമെന്ന ആവശ്യവും ശക്തമാകുന്നുണ്ട്. ഇത്തരം തീരുമാനങ്ങൾ ഓരോ മാനേജർമാരുടെ വ്യക്തിപരമായ ഇഷ്ടാനിഷ്ടങ്ങൾക്ക് വിട്ടുനൽകുന്നത് ജീവനക്കാർക്ക് വലിയ പ്രയാസമുണ്ടാക്കുന്നുവെന്ന് പലരും ചൂണ്ടിക്കാട്ടുന്നു. എന്തായാലും വിവാദമായ ഈ സംഭാഷണത്തെക്കുറിച്ച് ബന്ധപ്പെട്ട കമ്പനിയോ മാനേജരോ ഇതുവരെ ഔദ്യോഗികമായി പ്രതികരിച്ചിട്ടില്ല.
Summary: A Pune employee’s request for work-from-home due to severe rain and flooding was rejected by his manager, who insisted he travel to the office using public transport or cabs. The incident went viral on social media, sparking a fierce debate about workplace flexibility and the need for companies to prioritize employee safety during extreme weather conditions.
