മുംബൈ: ബോളിവുഡ് താരം അക്ഷയ് കുമാറിന്റെ പ്രായപൂർത്തിയാകാത്ത മകളോട് ഓൺലൈൻ ഗെയിമിംഗിനിടെ അശ്ലീല ചിത്രങ്ങൾ ആവശ്യപ്പെട്ട സംഭവത്തിൽ ഒരാളെ മുംബൈ പോലീസ് അറസ്റ്റ് ചെയ്തു. സോഷ്യൽ മീഡിയയും ഓൺലൈൻ ഗെയിമിംഗ് പ്ലാറ്റ്ഫോമുകളും വഴി കുട്ടികളെ ലക്ഷ്യം വയ്ക്കുന്ന സൈബർ കുറ്റകൃത്യങ്ങൾക്കെതിരെയുള്ള കർശന നടപടിയുടെ ഭാഗമായാണ് അറസ്റ്റ്.
ഓൺലൈൻ ഗെയിം കളിക്കുന്നതിനിടെയാണ് പ്രതി പെൺകുട്ടിയുമായി സൗഹൃദം സ്ഥാപിച്ചത്. തുടർന്ന് സ്വകാര്യ ചിത്രങ്ങളും നഗ്നചിത്രങ്ങളും അയച്ചുനൽകാൻ പെൺകുട്ടിയെ നിർബന്ധിക്കുകയും സമ്മർദ്ദം ചെലുത്തുകയും ചെയ്യുകയായിരുന്നു. വിവരം പെൺകുട്ടി വീട്ടുകാരെ അറിയിച്ചതോടെയാണ് സംഭവം പുറത്തറിഞ്ഞത്.
പെൺകുട്ടിയുടെ കുടുംബം നൽകിയ പരാതിയുടെ അടിസ്ഥാനത്തിൽ മുംബൈ സൈബർ പോലീസ് നടത്തിയ ശാസ്ത്രീയ അന്വേഷണത്തിലാണ് പ്രതി കുടുങ്ങിയത്. ഡിജിറ്റൽ തെളിവുകളുടെയും ഐപി അഡ്രസ്സുകളുടെയും സഹായത്തോടെ പ്രതിയെ തിരിച്ചറിയുകയും പിടികൂടുകയും ചെയ്തു. പ്രായപൂർത്തിയാകാത്ത പെൺകുട്ടിയായതിനാൽ പ്രതിക്കെതിരെ പോക്സോ (POCSO) നിയമപ്രകാരവും ഐടി ആക്ട് പ്രകാരവുമാണ് കേസെടുത്തിരിക്കുന്നത്.
കുട്ടികൾ ഓൺലൈൻ പ്ലാറ്റ്ഫോമുകൾ ഉപയോഗിക്കുമ്പോൾ രക്ഷിതാക്കൾ അതീവ ജാഗ്രത പുലർത്തണമെന്നും അപരിചിതരുമായുള്ള ഇടപെടലുകൾ ശ്രദ്ധിക്കണമെന്നും പോലീസ് മുന്നറിയിപ്പ് നൽകി.
Story Summary: Mumbai Police arrested a man for allegedly seeking nude images from actor Akshay Kumar’s minor daughter during an online gaming session. Following a complaint, the cyber police tracked the accused using digital footprints. He has been booked under the POCSO Act and relevant sections of the IT Act.
