മുംബൈ: നടി തമന്ന ഭാട്ടിയയെക്കുറിച്ച് നടത്തിയ അശ്ലീല പരാമർശത്തിൽ ഖേദം പ്രകടിപ്പിച്ച് നടൻ അന്നു കപൂർ (Annu Kapoor-Tamannaah Bhatia). ‘സ്ത്രീ 2’ എന്ന ചിത്രത്തിലെ തമന്നയുടെ ‘ആജ് കി രാത്ത്’ എന്ന ഹിറ്റ് ഗാനത്തെക്കുറിച്ച് സംസാരിക്കവെ താരം നടത്തിയ ചില പ്രയോഗങ്ങളാണ് വലിയ വിമർശനങ്ങൾക്ക് വഴിവെച്ചത്. എന്നാൽ തന്റെ വാക്കുകൾ തെറ്റായി വ്യാഖ്യാനിക്കപ്പെട്ടതാണെന്നും നടിയെ അപമാനിക്കാൻ താൻ ഉദ്ദേശിച്ചിട്ടില്ലെന്നും അദ്ദേഹം പറഞ്ഞു.
കഴിഞ്ഞ വർഷം അമേരിക്കയിൽ നടന്ന ഒരു പരിപാടിക്കിടെയാണ് അന്നു കപൂർ വിവാദമായ അഭിപ്രായം പ്രകടിപ്പിച്ചത്. മത്സരത്തിനായി നല്ലൊരു പാട്ട് തിരഞ്ഞെടുക്കാൻ പറഞ്ഞപ്പോൾ സംഘാടകർ തമന്നയുടെ പാട്ട് കാണിച്ചുകൊടുക്കുകയായിരുന്നു. വീഡിയോ കണ്ടപ്പോൾ നടി നന്നായി നൃത്തം ചെയ്യുന്നതായി തനിക്ക് തോന്നിയെന്നും അന്നു കപൂർ പറഞ്ഞു.
തമന്നയെ ‘മിൽക്കി ബ്യൂട്ടി’ എന്ന് ഇംഗ്ലീഷിൽ വിളിക്കുമ്പോൾ ആർക്കും പരാതിയില്ലെന്നും എന്നാൽ അത് മാതൃഭാഷയിൽ (ഹിന്ദിയിൽ) പറഞ്ഞാൽ വലിയ പ്രശ്നമാകുന്നത് എന്തുകൊണ്ടാണെന്നും അദ്ദേഹം ചോദിച്ചു. തമന്നയ്ക്ക് തന്റെ മക്കളുടെ പ്രായമേയുള്ളൂവെന്നും അവരെ മോശമായി ചിത്രീകരിക്കാൻ താൻ ഒരിക്കലും ആഗ്രഹിക്കില്ലെന്നും അദ്ദേഹം വ്യക്തമാക്കി.
“തമന്നയ്ക്ക് എന്റെ വാക്കുകൾ മൂലം വിഷമമുണ്ടായെങ്കിൽ അവരുടെ കാലിൽ വീണ് മാപ്പുചോദിക്കാൻ എനിക്ക് മടിയില്ല. ഒരു 71-കാരൻ കാലിൽ വീണാൽ അവർ എന്ത് പറയും? എന്റെ ഉള്ളിൽ ഒരു ദുരുദ്ദേശ്യവുമില്ലായിരുന്നു,” അന്നു കപൂർ പറഞ്ഞു.
താൻ ഒരു കലാകാരിയെന്ന നിലയിൽ തമന്നയെ അഭിനന്ദിക്കുക മാത്രമാണ് ചെയ്തതെന്നും വിമർശിക്കുന്നവർ തന്റെ വാക്കുകളിലെ ഉദ്ദേശ്യശുദ്ധി മനസ്സിലാക്കണമെന്നും അദ്ദേഹം കൂട്ടിച്ചേർത്തു.
Story Summary: Veteran Bollywood actor Annu Kapoor has clarified his controversial remarks about actress Tamannaah Bhatia. Responding to the backlash over his comments on her song ‘Aaj Ki Raat’, Kapoor stated that he intended to praise her beauty and dance skills. He expressed readiness to apologize by falling at her feet if his words hurt her, emphasizing that he views her like a daughter.
