റിപ്പോർട്ട് : അൻവർ ഷരീഫ്
എടവണ്ണപ്പാറ: മലപ്പുറം-കോഴിക്കോട് അതിർത്തിയിലെ എളമരം കടവ് പാലത്തിന് സമീപം കഴിഞ്ഞ വെള്ളിയാഴ്ച വൈകുന്നേരം പുഴയിൽ കണ്ടെത്തിയ അജ്ഞാത മൃതദേഹം തിരിച്ചറിഞ്ഞു (NIT Calicut student dead body Elamaram). കോഴിക്കോട് ചാത്തമംഗലത്തെ നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (NIT Calicut) പി.ജി. (Postgraduate) വിദ്യാർത്ഥിയായ മന്തർ പ്രമോദ് ബാമൻ (28) ആണ് മരണപ്പെട്ടതെന്ന് ക്യാമ്പസിലെ സഹപാഠികൾ നേരിട്ടെത്തി സ്ഥിരീകരിച്ചു.
കഴിഞ്ഞ വ്യാഴാഴ്ച മുതൽ മന്തറിനെ ഹോസ്റ്റലിൽ നിന്നും ക്യാമ്പസിൽ നിന്നും കാണാതായിരുന്നു. തുടർന്ന് പോലീസും, സുഹൃത്തുക്കളും, സഹപാഠികളും വിവിധ സ്ഥലങ്ങളിൽ വ്യാപകമായ അന്വേഷണം നടത്തിവരികയായിരുന്നു. അതിനിടയിലാണ് എളമരം കടവ് പാലത്തിന് സമീപം പുഴയിൽ ഒരു യുവാവിന്റെ മൃതദേഹം കണ്ടെത്തിയെന്ന വാർത്ത സോഷ്യൽ മീഡിയയിലൂടെ പുറത്തുവരുന്നത്. ഇതറിഞ്ഞ എൻ.ഐ.ടി വിദ്യാർത്ഥികൾ ഉടൻ തന്നെ സംഭവസ്ഥലത്തേക്ക് തിരിക്കുകയായിരുന്നു.
പ്രദേശത്തെ സജീവ പൊതുപ്രവർത്തകനായ സലാം എളമരം സോഷ്യൽ മീഡിയയിൽ പങ്കുവെച്ച വിവരങ്ങളുടെയും അടയാളങ്ങളുടെയും അടിസ്ഥാനത്തിലാണ് സുഹൃത്തുക്കൾക്ക് മന്തറിനെ എളുപ്പത്തിൽ തിരിച്ചറിയാൻ സാധിച്ചത്. ഇൻക്വസ്റ്റ് നടപടികൾക്കിടെ മന്തറിനൊപ്പം മുറിയിൽ താമസിച്ചിരുന്ന അടുത്ത സുഹൃത്ത് മൃതദേഹം കണ്ട് വികാരാധീനനായി പൊട്ടിക്കരഞ്ഞത് കണ്ടുനിന്നവർക്കും നൊമ്പരമായി.
പഠനത്തിൽ ഏറെ മിടുക്കനായിരുന്ന മന്തറിന് ക്യാമ്പസ് സെലക്ഷൻ വഴി ജോലി ലഭിക്കാത്തതിൽ കടുത്ത മാനസിക വിഷമം ഉണ്ടായിരുന്നതായി സുഹൃത്തുക്കൾ വെളിപ്പെടുത്തി. കാണാതായതിന് പിന്നാലെ സുഹൃത്തുക്കൾ അദ്ദേഹത്തിന്റെ ലാപ്ടോപ്പ് പരിശോധിച്ചപ്പോഴാണ്, ക്യാമ്പസ് ഇന്റർവ്യൂവിൽ ജോലി ലഭിക്കാത്തതിലുള്ള കടുത്ത നിരാശയും മാനസിക സങ്കടങ്ങളും രേഖപ്പെടുത്തിയ ചില കുറിപ്പുകൾ കണ്ടെത്തിയത്. ഇതാണ് മരണത്തിലേക്ക് നയിച്ചതെന്നാണ് പ്രാഥമിക നിഗമനം. മുംബൈയിലുള്ള മന്തറിന്റെ സഹോദരൻ വിവരമറിഞ്ഞ് നാട്ടിൽ നിന്ന് പുറപ്പെട്ടിട്ടുണ്ടെന്നും, അദ്ദേഹം എത്തിച്ചേരുന്ന മുറയ്ക്ക് പോസ്റ്റ്മോർട്ടം ഉൾപ്പെടെയുള്ള തുടർനടപടികൾ സ്വീകരിക്കുമെന്നും വാഴക്കാട് പോലീസ് അറിയിച്ചു.
Story Summary: The body found near Elamaram Kadavu bridge was identified as Manthar Pramod Baman, a 28-year-old PG student at NIT Calicut. His friends identified him through social media posts after he went missing, and notes reflecting job rejection distress were found on his laptop.
