പാരീസ്: മുൻ പങ്കാളിയെ ഏഴുവർഷത്തോളം ക്രൂരമായ ലൈംഗിക പീഡനങ്ങൾക്കും ശാരീരിക പീഡനങ്ങൾക്കും ഇരയാക്കിയ കേസിൽ ഫ്രഞ്ച് ബാങ്ക് മാനേജർക്ക് 25 വർഷം കഠിനതടവ് വിധിച്ച് ഫ്രാൻസിലെ കോടതി. ഗില്ലൂം ബുച്ചി (51)യെയാണ് കോടതി ശിക്ഷിച്ചതെന്ന് അന്താരാഷ്ട്ര വാർത്താ ഏജൻസി റിപ്പോർട്ട് ചെയ്തു. നാല് കുട്ടികളുടെ അമ്മയായ ലെറ്റീഷ്യ ആർ (42) എന്ന മുൻ പങ്കാളിയെയാണ് മൃഗീയമായ പീഡനങ്ങൾക്ക് ഇരയാക്കിയത്.(French Bank Manager Sentenced To 25 Years In Prison For Long Term Abuse Of Former Partner)
2015 മുതൽ 2022 വരെയുള്ള കാലയളവിൽ ഭീഷണിയെത്തുടർന്ന് തനിക്ക് 487-ലധികം പുരുഷന്മാരുമായി ലൈംഗികബന്ധത്തിൽ ഏർപ്പെടേണ്ടി വന്നതായി ഇരയായ സ്ത്രീ കോടതിയിൽ കണ്ണീരോടെ വെളിപ്പെടുത്തി. ഓൺലൈൻ വഴിയും തന്റെ സുഹൃദ് വലയത്തിൽ നിന്നും കണ്ടെത്തുന്ന അപരിചിതർക്കും ട്രക്ക് ഡ്രൈവർമാർക്കും ഒപ്പം ലൈംഗികമായി ബന്ധപ്പെടാൻ നിർബന്ധിച്ചിരുന്നതായി ഇവർ സാക്ഷ്യപ്പെടുത്തി. ക്രൂരമായ ശാരീരിക മർദ്ദനങ്ങൾ, കഴുത്തു ഞെരിക്കൽ, മൃഗങ്ങളുമായുള്ള ലൈംഗികത എന്നിവയ്ക്ക് പുറമെ അങ്ങേയറ്റം വിചിത്രവും അന്തസ്സില്ലാത്തതുമായ കാര്യങ്ങൾക്കും പ്രതി ഇരയെ നിർബന്ധിച്ചിരുന്നു.
താൻ ചെയ്ത ക്രൂരതകൾ കോടതിയിൽ സമ്മതിച്ചെങ്കിലും, അവയെല്ലാം പരസ്പര സമ്മതത്തോടെയുള്ള ‘ലൈംഗിക വിനോദങ്ങൾ’ മാത്രമായിരുന്നു എന്നായിരുന്നു പ്രതിയുടെ വാദം. താൻ അവളെ വേദനിപ്പിക്കുകയാണെന്ന് കരുതിയിരുന്നില്ലെന്നും പ്രതി കോടതിയിൽ പറഞ്ഞു. എന്നാൽ അനുസരിച്ചില്ലെങ്കിൽ കൊന്നുകളയുമെന്ന് അയച്ച ഭീഷണി സന്ദേശങ്ങൾ പ്രൊസിക്യൂഷൻ കോടതിയിൽ ഹാജരാക്കി. താൻ നിരന്തരമായ ഭയത്തിലാണ് ജീവിച്ചിരുന്നതെന്നും ഓരോ പീഡനമുറകൾക്ക് ശേഷവും തന്റെ ഉള്ളിലെ മനുഷ്യൻ മരവിക്കുകയായിരുന്നെന്നും ലെറ്റീഷ്യ കോടതിയിൽ പറഞ്ഞു. 2017-ൽ ഇവർക്ക് ഒരു പെൺകുഞ്ഞ് ജനിച്ച ശേഷവും പീഡനം തുടർന്നു. പ്രസവം കഴിഞ്ഞ് ആശുപത്രിയിൽ നിന്ന് ഡിസ്ചാർജ് ചെയ്തതിന്റെ തൊട്ടടുത്ത ദിവസം പോലും ഒരു ട്രക്ക് ഡ്രൈവർക്കൊപ്പം ലൈംഗികമായി ബന്ധപ്പെടാൻ നിർബന്ധിച്ചതായി കോടതി കണ്ടെത്തി.
പ്രതിക്ക് ജീവപര്യന്തം ശിക്ഷ നൽകണമെന്നായിരുന്നു പ്രൊസിക്യൂഷന്റെ ആവശ്യം. എന്നാൽ കോടതി 25 വർഷത്തെ തടവ് ശിക്ഷ വിധിക്കുകയായിരുന്നു. ശിക്ഷാ കാലാവധിയുടെ മൂന്നിൽ രണ്ട് ഭാഗമെങ്കിലും പൂർത്തിയാക്കാതെ പ്രതിക്ക് പരോളിന് അർഹതയുണ്ടായിരിക്കില്ല. ഭർത്താവ് ലഹരിമരുന്ന് നൽകി ബോധം കെടുത്തി വർഷങ്ങളോളം അപരിചിതർക്ക് പീഡിപ്പിക്കാൻ വിട്ടുകൊടുത്ത ഫ്രാൻസിലെ ജിസെൽ പെലിക്കോട്ട് കേസ് അടുത്തിടെ ലോകമെമ്പാടും വലിയ ചർച്ചയായിരുന്നു.
Story Summary
A French court has sentenced 51-year-old bank manager Guillaume Bucci to 25 years in prison for torturing and forcing his former partner to sleep with over 487 men between 2015 and 2022. Inspired by the landmark Gisele Pelicot case, the survivor spoke out against the years of horrific abuse she endured in constant fear.
