തിരുവനന്തപുരം: കേരള ക്രിക്കറ്റ് ആരാധകർ കാത്തിരുന്ന കേരള ക്രിക്കറ്റ് ലീഗിന്റെ (KCL) മൂന്നാം സീസണിന്റെ മത്സരക്രമം പ്രഖ്യാപിച്ചു (Kerala Cricket League). ഓഗസ്റ്റ് 20 മുതൽ സെപ്റ്റംബർ 5 വരെ നീളുന്ന ടൂർണമെന്റിൽ ആറ് ഫ്രാഞ്ചൈസികൾ കിരീടത്തിനായി പോരാട്ടത്തിനിറങ്ങും.
ഓഗസ്റ്റ് 20-ന് ഉച്ചയ്ക്ക് 2.30ന് കാലിക്കറ്റ് ഗ്ലോബ് സ്റ്റാർസും തൃശൂർ ടൈറ്റൻസും തമ്മിലുള്ള മത്സരത്തോടെയാണ് ലീഗിന് തുടക്കമാകുക. ഉദ്ഘാടന ദിനത്തിലെ രണ്ടാം മത്സരത്തിൽ വൈകിട്ട് 7.30ന് നിലവിലെ ചാമ്പ്യന്മാരായ കൊച്ചി ബ്ലൂ ടൈഗേഴ്സ് കൊല്ലം സെയിലേഴ്സിനെ നേരിടും.
ലീഗ് ഘട്ടത്തിലെ മത്സരങ്ങൾക്ക് ശേഷം സെപ്റ്റംബർ 4-ന് സെമിഫൈനലുകൾ നടക്കും. പോയിന്റ് പട്ടികയിൽ രണ്ടാം സ്ഥാനത്തെത്തുന്ന ടീം മൂന്നാം സ്ഥാനക്കാരെയും ഒന്നാം സ്ഥാനക്കാർ നാലാം സ്ഥാനക്കാരെയും നേരിടും. സെപ്റ്റംബർ 5-ന് നടക്കുന്ന ഫൈനലിൽ വിജയികൾ കിരീടത്തിനായി ഏറ്റുമുട്ടും.
വെറും രണ്ട് സീസണുകൾക്കുള്ളിൽ തന്നെ രാജ്യത്തെ ശ്രദ്ധേയമായ പ്രാദേശിക ടി20 ലീഗുകളിലൊന്നായി കെസിഎൽ വളർന്നിട്ടുണ്ട്. കഴിഞ്ഞ സീസണുകളിൽ സ്റ്റാർ സ്പോർട്സിലൂടെ നാല് കോടിയിലധികം പ്രേക്ഷകരാണ് മത്സരങ്ങൾ വീക്ഷിച്ചത്. ഫാൻകോഡിൽ 70 ലക്ഷത്തിലധികം പേരും ഏഷ്യാനെറ്റ് പ്ലസിലൂടെ 1.34 കോടിയിലധികം പ്രേക്ഷകരും ലീഗ് തത്സമയം പിന്തുടർന്നു.
വ്യൂവർഷിപ്പിന്റെ കാര്യത്തിൽ തമിഴ്നാട് പ്രീമിയർ ലീഗും കർണാടക മഹാരാജ ട്രോഫിയും പോലുള്ള പ്രമുഖ ആഭ്യന്തര ടി20 ലീഗുകളെ പോലും പിന്നിലാക്കാൻ കെസിഎല്ലിന് സാധിച്ചുവെന്നത് ശ്രദ്ധേയമാണ്. കേരള ക്രിക്കറ്റ് അസോസിയേഷന്റെ ദീർഘവീക്ഷണത്തിന്റെയും മികച്ച സംഘാടന മികവിന്റെയും ഫലമായാണ് ലീഗിന്റെ വളർച്ച വിലയിരുത്തപ്പെടുന്നത്.
മൂന്നാം പതിപ്പും മുൻ സീസണുകളെപ്പോലെ ആവേശകരമാകുമെന്ന പ്രതീക്ഷയിലാണ് ക്രിക്കറ്റ് ആരാധകർ. ആഭ്യന്തര ക്രിക്കറ്റിൽ കേരളത്തിന്റെ വളർച്ചയ്ക്ക് കൂടുതൽ കരുത്തേകുന്ന വേദിയായി കെസിഎൽ മാറുമെന്നാണ് വിലയിരുത്തൽ.
Story Summary:
The Kerala Cricket League (KCL) Season 3 will be held from August 20 to September 5, featuring six franchises. The tournament opens with Calicut Globe Stars taking on Thrissur Titans, while the final is scheduled for September 5.
