ആലപ്പുഴ: കോൺഗ്രസ് നേതാവ് രമേശ് ചെന്നിത്തലയുടെ പാർട്ടിയും സിപിഎമ്മിലെ ചില നേതാക്കളും തമ്മിലുള്ള “കൂട്ടുകച്ചവടം” അവസാനിപ്പിക്കണമെന്ന് മുൻ മന്ത്രിയും സിപിഎം നേതാവുമായ ജി. സുധാകരൻ. ആലപ്പുഴയിൽ നടന്ന ഖാദി ഓണം റിബേറ്റ് മേളയുടെ ജില്ലാതല ഉദ്ഘാടന ചടങ്ങിൽ, രമേശ് ചെന്നിത്തല വേദിയിലിരിക്കെയായിരുന്നു സുധാകരന്റെ പരസ്യ വിമർശനം. (CPM Congress controversy Alappuzha)
ആലപ്പുഴ നഗരസഭയുടെ നേതൃത്വത്തിൽ കഴിഞ്ഞ ദിവസം എംഎൽഎമാർക്ക് നൽകിയ സ്വീകരണച്ചടങ്ങിൽ ഉണ്ടായ വിവാദ സംഭവങ്ങളാണ് പരാമർശത്തിന് കാരണമെന്ന് സുധാകരൻ പറഞ്ഞു. ചടങ്ങിന് താൻ കൃത്യസമയത്ത് എത്തിയിരുന്നുവെങ്കിലും എൽഡിഎഫ് പ്രവർത്തകർ പ്രതിഷേധവുമായി അവിടെയുണ്ടായിരുന്നുവെന്നും നഗരസഭാ അധ്യക്ഷ മോളി ജേക്കബിനെതിരെ കൗൺസിലർമാർ പ്ലക്കാർഡുകൾ ഉയർത്തിയിട്ടും പ്രതിഷേധക്കാരെ നീക്കം ചെയ്യാനോ അറസ്റ്റ് ചെയ്യാനോ പൊലീസ് തയ്യാറായില്ലെന്നും അദ്ദേഹം ആരോപിച്ചു.
ഈ പ്രതിഷേധത്തെക്കുറിച്ച് പൊലീസിനും നഗരസഭാ അധ്യക്ഷയ്ക്കും കോൺഗ്രസ് പ്രവർത്തകർക്കും മുൻകൂട്ടി അറിവുണ്ടായിരുന്നുവെന്നാണ് തന്റെ വിലയിരുത്തലെന്നും സുധാകരൻ പറഞ്ഞു. ചടങ്ങിൽ തുടർന്നിരുന്നെങ്കിൽ ക്രമസമാധാന പ്രശ്നങ്ങളും സംഘർഷവും ഉണ്ടാകുമെന്നതിനാലാണ് താൻ വേദി വിട്ടതെന്നും അദ്ദേഹം വ്യക്തമാക്കി.
“ഞാൻ അവിടെ ഉണ്ടായിരുന്നെങ്കിൽ അടി നടക്കുമായിരുന്നു. എന്നെ ആരെങ്കിലും അടിച്ചാൽ കരണക്കുറ്റിക്ക് തിരിച്ചടിക്കുകയാണ് എന്റെ ശീലം. അതുകൊണ്ട് മടങ്ങിപ്പോയത് നന്നായി,” എന്ന് സുധാകരൻ പറഞ്ഞു. സംഭവത്തിൽ പ്രാദേശിക പൊലീസിന് ഗുരുതര വീഴ്ച സംഭവിച്ചിട്ടുണ്ടെന്നും വിഷയത്തിൽ സമഗ്ര അന്വേഷണം നടത്തണമെന്നും അദ്ദേഹം ആവശ്യപ്പെട്ടു.
ചടങ്ങിൽ പ്രസംഗിച്ച എൽഡിഎഫ് നേതാവിന്റെ പ്രസംഗത്തെയും സുധാകരൻ വിമർശിച്ചു. സ്ത്രീകളെ സംരക്ഷിക്കണമെന്ന് പ്രസംഗിക്കുന്നവർ യഥാർത്ഥത്തിൽ എത്ര സ്ത്രീകളെയാണ് സംരക്ഷിക്കുന്നതെന്ന് ആത്മപരിശോധന നടത്തണമെന്നും അദ്ദേഹം പറഞ്ഞു. ആലപ്പുഴ നഗരസഭാ സ്വീകരണച്ചടങ്ങിനെ ചൊല്ലിയുണ്ടായ വിവാദം രാഷ്ട്രീയ തലത്തിൽ ചർച്ചയായിരിക്കെയാണ് ജി. സുധാകരന്റെ ഈ വിമർശനവും ശ്രദ്ധേയമായത്.
Summary: Senior CPM leader G. Sudhakaran alleged that some CPM leaders in Alappuzha have political dealings with the Congress and demanded an end to such ties. He made the remarks in the presence of Congress leader Ramesh Chennithala while also criticizing the police response during a recent civic reception controversy.
