ന്യൂഡൽഹി: കേന്ദ്ര വിദ്യാഭ്യാസ മന്ത്രാലയത്തിന്റെ ചുമതലയേറ്റതിന് പിന്നാലെ പ്രധാനമന്ത്രി നരേന്ദ്ര മോദിക്ക് നന്ദി അറിയിച്ച് പുതിയ വിദ്യാഭ്യാസ മന്ത്രി പ്രൾഹാദ് ജോഷി. രാജ്യത്തെ ഏറ്റവും പ്രധാനപ്പെട്ട മന്ത്രാലയങ്ങളിലൊന്നിന്റെ ഉത്തരവാദിത്തമാണ് ലഭിച്ചതെന്നും, ഈ മേഖലയിൽ ഇനിയും ഏറെ പഠിക്കാനുണ്ടെന്നും അദ്ദേഹം പ്രതികരിച്ചു (Pralhad Joshi Education Minister). വിദ്യാഭ്യാസ മന്ത്രാലയത്തിന്റെ ഭാവി പ്രവർത്തനങ്ങളും മുൻഗണനാ വിഷയങ്ങളും സംബന്ധിച്ച് മുതിർന്ന ഉദ്യോഗസ്ഥരുമായി വിശദമായ ചർച്ചകൾ നടത്തിവരികയാണെന്ന് ജോഷി വ്യക്തമാക്കി. ഇത്രയും സുപ്രധാനമായ ചുമതല ഏൽപ്പിച്ചതിന് പ്രധാനമന്ത്രി നരേന്ദ്ര മോദിയോട് കടപ്പാടും നന്ദിയും അറിയിക്കുന്നതായും അദ്ദേഹം പറഞ്ഞു.
നീറ്റ്-യുജി പരീക്ഷാ ക്രമക്കേടുകളെ തുടർന്നുണ്ടായ വിദ്യാർഥി-യുവജന പ്രതിഷേധങ്ങൾക്കൊടുവിൽ മുൻ വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെച്ചതോടെയാണ് മന്ത്രാലയത്തിൽ മാറ്റമുണ്ടായത്. രാജിക്ക് പിന്നാലെ പ്രൾഹാദ് ജോഷിക്ക് വിദ്യാഭ്യാസ മന്ത്രാലയത്തിന്റെ അധിക ചുമതല നൽകിക്കൊണ്ട് കേന്ദ്ര സർക്കാർ ഉത്തരവിറക്കുകയായിരുന്നു. കർണാടകയിൽ നിന്നുള്ള കേന്ദ്ര മന്ത്രിയായ ജോഷിയാണ് ഇനി വിദ്യാഭ്യാസ മന്ത്രാലയത്തിന്റെ പ്രവർത്തനങ്ങൾക്ക് നേതൃത്വം നൽകുക.
അതേസമയം, വിദ്യാർഥി സമരത്തിന് നേതൃത്വം നൽകിയ അഭിജീത് ദീപ്കേ ആശുപത്രിയിൽ നിന്ന് പ്രതികരണവുമായി രംഗത്തെത്തി. സമരം വിജയിപ്പിക്കാൻ ഒപ്പമുണ്ടായ എല്ലാവർക്കും അദ്ദേഹം നന്ദി അറിയിച്ചു. വിമർശിച്ചവർക്കും തങ്ങളെ നേർവഴിയിൽ നയിക്കാൻ ശ്രമിച്ചവർക്കും നന്ദിയുണ്ടെന്നും അദ്ദേഹം പറഞ്ഞു. സമരത്തിലൂടെ മുന്നോട്ടുവച്ച വാഗ്ദാനങ്ങൾ പൂർണമായും നടപ്പാക്കാൻ തുടർന്നും പ്രവർത്തിക്കുമെന്നും, ഇത് ഒരു തുടക്കം മാത്രമാണെന്നും ഇനിയും ഏറെ ദൂരം മുന്നോട്ടുപോകാനുണ്ടെന്നും അഭിജീത് ദീപ്കേ വ്യക്തമാക്കി. ടൈഫോയ്ഡ് ബാധിച്ച് ചികിത്സയിലായിരുന്ന അദ്ദേഹം കഴിഞ്ഞ ദിവസം ആശുപത്രിക്കിടക്കയിൽ നിന്നാണ് സമരവേദിയിലെത്തിയത്.
Summary: Pralhad Joshi assumed charge as India’s new Education Minister and thanked Prime Minister Narendra Modi for reposing faith in him. Following Dharmendra Pradhan’s resignation, Joshi said he has much to learn while student leader Abhijit Deepke thanked supporters after the protest movement’s success.
