കൊച്ചി: നടൻ ജോജു ജോർജ് ഉന്നയിച്ച ആരോപണങ്ങൾക്ക് പിന്നാലെ നടിയും സോഷ്യൽ മീഡിയ ഇൻഫ്ലുവൻസറുമായ ലക്ഷ്മി മേനോൻ പങ്കുവെച്ച ഇൻസ്റ്റഗ്രാം സ്റ്റോറി പുതിയ ചർച്ചകൾക്ക് വഴിവെച്ചു. തന്റെ പുതിയ ചിത്രത്തിനെതിരെ മലയാള സിനിമയിലെ ഒരു പ്രമുഖ നടനും ഭാര്യയും ചേർന്ന് പെയ്ഡ് പി.ആർ. ക്യാംപെയ്ൻ നടത്തുന്നുവെന്നായിരുന്നു ജോജുവിന്റെ ആരോപണം (Lakshmi Menon on Joju George PR Allegation). എന്നാൽ ആരുടേയും പേര് അദ്ദേഹം വെളിപ്പെടുത്തിയിരുന്നില്ല. ഈ വിവാദത്തിനിടെയാണ് ലക്ഷ്മി മേനോൻ ഇൻസ്റ്റഗ്രാമിൽ പങ്കുവെച്ച പ്രതികരണം സമൂഹമാധ്യമങ്ങളിൽ വൈറലായത്. “ഇത് ആ പെൺകോന്തനായ ഭർത്താവിന്റേയും അവളുടേയും സ്ഥിരം കലാപരിപാടി അല്ലേ… നമ്മൾ അതിലും മുകളിലാണ് ചേട്ടാ,” എന്നായിരുന്നു ലക്ഷ്മിയുടെ കുറിപ്പ്. ഈ പരാമർശം ജോജുവിന്റെ ആരോപണവുമായി ബന്ധപ്പെട്ടതാണെന്നാണ് സോഷ്യൽ മീഡിയയിലെ വിലയിരുത്തൽ. എന്നാൽ ലക്ഷ്മിയും ആരുടെയും പേര് പരാമർശിച്ചിട്ടില്ല.
പുതിയ ചിത്രം ‘വരവ്’ പ്രമോഷന്റെ ഭാഗമായി നടത്തിയ ഇൻസ്റ്റഗ്രാം ലൈവിലാണ് ജോജു ജോർജ് ആരോപണങ്ങൾ ഉന്നയിച്ചത്. മലയാള സിനിമയിലെ ഒരു പ്രമുഖ നടനും ഭാര്യയും തനിക്കെതിരെ ആസൂത്രിതമായി പി.ആർ. പ്രവർത്തനങ്ങൾ നടത്തുന്നുവെന്നും, ചിത്രത്തിനെതിരെ നെഗറ്റീവ് ക്യാംപെയ്ൻ നടക്കുകയാണെന്നും അദ്ദേഹം ആരോപിച്ചു. മലയാള സിനിമയിൽ നിരവധി പ്രമുഖ താരങ്ങൾ പെയ്ഡ് പി.ആർ. സംവിധാനങ്ങൾ ഉപയോഗിക്കുന്നുണ്ടെന്നും ജോജു പറഞ്ഞിരുന്നു.
ജോജുവിന്റെയും ലക്ഷ്മി മേനോന്റെയും പ്രതികരണങ്ങൾ പുറത്തുവന്നതോടെ ആരോപണവിധേയരായ താരദമ്പതികൾ ആരാണെന്ന ചർച്ച സോഷ്യൽ മീഡിയയിൽ ശക്തമായി. എന്നാൽ ഇരുവരും പേരുകൾ വെളിപ്പെടുത്താത്തതിനാൽ നിരവധി പേരെ കുറിച്ച് അനുമാനങ്ങൾ ഉയരുന്നുണ്ട്. ഇതിനിടെ, തെളിവുകളില്ലാതെ ഏതെങ്കിലും താരദമ്പതികളുടെ പേര് പ്രചരിപ്പിക്കുന്നത് തെറ്റാണെന്നും, അടിസ്ഥാനരഹിതമായ അഭ്യൂഹങ്ങൾ പ്രചരിപ്പിക്കരുതെന്നും നിരവധി ആരാധകരും സോഷ്യൽ മീഡിയ ഉപയോക്താക്കളും അഭിപ്രായപ്പെടുന്നുണ്ട്.
Summary: Actress Lakshmi Menon’s cryptic Instagram story has gone viral after actor Joju George alleged that a prominent actor and his wife were running a paid PR campaign against him. Neither Joju nor Lakshmi revealed any names, but the remarks have sparked widespread speculation on social media.
