ബെംഗളൂരു: കർണാടക സർക്കാരിന് കീഴിലുള്ള പ്രശസ്തമായ ശ്രീ ജയദേവ ഇൻസ്റ്റിറ്റ്യൂട്ട് ഓഫ് കാർഡിയോ വാസ്കുലാർ സയൻസസ് ആൻഡ് റിസർച്ചിൽ (Jayadeva heart hospital Mysuru patient deaths) 24 മണിക്കൂറിനിടെ 11 രോഗികൾ ദാരുണമായി മരണപ്പെട്ടു. ഹൃദ്രോഗത്തിന് അടിയന്തര ചികിത്സ തേടിയെത്തിയ 77 രോഗികളിൽ 11 പേരാണ് ഇന്നലെ രാവിലെ എട്ടിനും ഇന്ന് രാവിലെ എട്ടിനും ഇടയിലുള്ള സമയത്തിനുള്ളിൽ മരണമടഞ്ഞത്. ആശുപത്രി അധികൃതരുടെ ഭാഗത്തുനിന്നുണ്ടായ ഗുരുതരമായ വീഴ്ചയും നിരുത്തരവാദപരമായ സമീപനവുമാണ് കൂട്ടമരണത്തിന് കാരണമാക്കിയതെന്ന് ആരോപിച്ച് രോഗികളുടെ ബന്ധുക്കളും കൂട്ടിരിപ്പുകാരും പരസ്യമായി രംഗത്തെത്തി.
മൈസൂരു ശാഖയിലെ ആശുപത്രിയിൽ നിന്നുള്ള ദൃശ്യങ്ങൾ സാമൂഹിക മാധ്യമങ്ങൾ വഴി വ്യാപകമായി പ്രചരിച്ചതോടെയാണ് ഈ കൂട്ടമരണ വാർത്ത പുറംലോകം അറിയുന്നത്. ഇന്നലെ രാത്രി അതീവ ഗുരുതരാവസ്ഥയിലുള്ളവർ കഴിയുന്ന തീവ്രപരിചരണ വിഭാഗത്തിൽ (ICU) ഡ്യൂട്ടി ഡോക്ടർമാർ ആരും തന്നെ ഉണ്ടായിരുന്നില്ല എന്ന് കൂട്ടിരിപ്പുകാർ മാധ്യമങ്ങളോട് ആരോപിച്ചു. രോഗികൾക്ക് പെട്ടെന്ന് അസ്വസ്ഥതകൾ കൂടിയപ്പോൾ നേഴ്സുമാരല്ലാതെ അടിയന്തരമായി ഇടപെടാൻ ഡോക്ടർമാർ ലഭ്യമായിരുന്നില്ലെന്നാണ് പ്രധാന ആക്ഷേപം.
സമീപത്തെ അഞ്ച് ജില്ലകളിൽ നിന്നുള്ള ഹൃദ്രോഗികളുടെ ഏക പ്രധാന ആശ്രയമായ ഈ വൻകിട ആശുപത്രിയിൽ നിലവിൽ കടുത്ത ഡോക്ടർമാരുടെ ക്ഷാമം നേരിടുന്നുണ്ട്. അതിഗുരുതരാവസ്ഥയിൽ ഇവിടെ എത്തുന്ന രോഗികളുടെ എണ്ണത്തിന് ആനുപാതികമായി ജീവനക്കാരെ വിന്യസിക്കുന്നതിൽ അധികൃതർ നിരന്തരം വീഴ്ച വരുത്തുകയാണെന്ന് ആരോപണമുണ്ട്. എന്നാൽ, രോഗികളുടെ ബന്ധുക്കൾ ഉന്നയിച്ച മെഡിക്കൽ അനാസ്ഥ എന്ന ആരോപണം ആശുപത്രി സൂപ്രണ്ടന്റ് ഡോ. സദാനന്ദ പൂർണ്ണമായി തള്ളി.
“ഏറ്റവും സങ്കീർണ്ണവും ഗുരുതരവുമായ അവസ്ഥയിലുള്ള ഹൃദ്രോഗികളാണ് അവസാന ഘട്ടത്തിൽ ഈ റഫറൽ ആശുപത്രിയിൽ എത്തുന്നത്. അതുകൊണ്ടുതന്നെ ഇവിടെ മരണനിരക്ക് ഉയരുന്നത് സ്വാഭാവികം മാത്രമാണ്. കഴിഞ്ഞ 17 ദിവസത്തിനിടെ 64 മരണങ്ങൾ ഇവിടെ സംഭവിച്ചിട്ടുണ്ട്. ജൂൺ ഒൻപതിന് മാത്രം എട്ട് പേർ മരണപ്പെട്ടിരുന്നു. ദിവസം ശരാശരി 6 മുതൽ 7 മരണങ്ങൾ വരെ ഇവിടെ പതിവാണ്,” സൂപ്രണ്ടന്റ് വിശദീകരിച്ചു. ആശുപത്രിയുടെ ഭാഗത്തുനിന്ന് മറ്റ് വീഴ്ചകളൊന്നും ഉണ്ടായിട്ടില്ലെന്ന് അധികൃതർ വാദിക്കുമ്പോഴും, ഒരൊറ്റ ദിവസം കൊണ്ട് 11 ജീവനുകൾ ഒന്നിച്ച് പൊലിഞ്ഞതിൽ കൃത്യമായ മറുപടി നൽകാൻ അവർക്ക് സാധിക്കുന്നില്ല. സംസ്ഥാന സർക്കാരിന് കീഴിൽ സ്വയംഭരണ (Autonomous) പദവിയോടെ പ്രവർത്തിക്കുന്ന ഈ സൂപ്പർ സ്പെഷ്യാലിറ്റി ആശുപത്രിയിലെ കൂട്ടമരണം സിദ്ധരാമയ്യ സർക്കാരിനെതിരെ വൻ രാഷ്ട്രീയ ആയുധമാക്കാനൊരുങ്ങുകയാണ് കർണാടകയിലെ പ്രതിപക്ഷം.
Story Summary: In a shocking incident, 11 cardiac patients died within 24 hours at the government-run Sri Jayadeva Institute of Cardiovascular Sciences and Research. The deaths occurred between 8 AM yesterday and 8 AM today among 77 patients admitted for treatment. While relatives alleged medical negligence and a complete absence of doctors in the ICU at night, Hospital Superintendent Dr. Sadananda denied the claims. He stated that since it is a tertiary center handling critical cases, an average of 6 to 7 deaths occur daily, though the opposition is now preparing to weaponize the issue against the state government.
