തിരുവനന്തപുരം: അന്തരിച്ച മുതിർന്ന സിപീഎം നേതാവ് കോടിയേരി ബാലകൃഷ്ണന്റെ മരണശേഷം പാർട്ടി നേതൃത്വം കുടുംബത്തെ അവഗണിച്ചെന്ന ഭാര്യ വിനോദിനി ബാലകൃഷ്ണന്റെ തുറന്നുപറച്ചിലുകൾക്ക് മറുപടിയുമായി പാർട്ടി സംസ്ഥാന സെക്രട്ടറി എം.വി. ഗോവിന്ദൻ (Vinodini Balakrishnan interview MV Govindan response). സിപീഎം ആരെയും അവഗണിക്കുന്ന പ്രസ്ഥാനമല്ലെന്നും താൻ ഇടയ്ക്കിടെ കോടിയേരിയുടെ വീട് സന്ദർശിക്കാറുണ്ടെന്നും അദ്ദേഹം വ്യക്തമാക്കി.
കോടിയേരിയുടെ വിയോഗത്തിന് ശേഷം പാർട്ടി തങ്ങളെ പൂർണ്ണമായും കൈവിട്ടെന്ന രീതിയിലായിരുന്നു വിനോദിനി ബാലകൃഷ്ണൻ കഴിഞ്ഞദിവസം വെളിപ്പെടുത്തൽ നടത്തിയത്. ഒരു പ്രമുഖ മാസികയ്ക്ക് നൽകിയ അഭിമുഖത്തിലായിരുന്നു വിനോദിനിയുടെ ഈ പ്രതികരണം. പാർട്ടിയിൽ ഉന്നത പദവിയിലിരിക്കുന്ന ഒരു പിബി (പോളിറ്റ് ബ്യൂറോ) അംഗത്തെ സഹായത്തിനായി വിളിച്ചാൽ ഫോൺ എടുക്കാൻ പോലും തയാറാകുന്നില്ലെന്ന ഗുരുതര ആരോപണവും അവർ ഉന്നയിച്ചിരുന്നു. എന്നാൽ താൻ ഉദ്ദേശിച്ചത് മുഖ്യമന്ത്രി പിണറായി വിജയനെയല്ലെന്നും അവർ അഭിമുഖത്തിൽ പ്രത്യേകം വ്യക്തമാക്കിയിരുന്നു.
വിനോദിനിയുടെ ഈ പ്രതികരണം രാഷ്ട്രീയ കേന്ദ്രങ്ങളിൽ വലിയ വിവാദമായതോടെയാണ് വിശദീകരണവുമായി എം.വി. ഗോവിന്ദൻ വാർത്താസമ്മേളനത്തിൽ രംഗത്തെത്തിയത്. “കുറച്ചു ദിവസങ്ങൾക്ക് മുൻപും ഞാൻ കോടിയേരിയുടെ വീട് സന്ദർശിച്ചിരുന്നു. പാർട്ടി നേതാക്കൾ ഇടയ്ക്കെല്ലാം ആ വീട്ടിൽ പോകാറുമുണ്ട്. അങ്ങനെ ആരെയെങ്കിലും അവഗണിക്കുന്ന നിലപാട് സിപീഎം സ്വീകരിക്കാറില്ല, വ്യക്തിപരമായി ഞാനും അത്തരം നിലപാടുകൾക്ക് വിരുദ്ധനാണ്,” എം.വി. ഗോവിന്ദൻ പറഞ്ഞു.
പാർട്ടി നേതാക്കളാരും കോടിയേരിയുടെ കുടുംബത്തെ തിരിഞ്ഞുനോക്കാതിരുന്നിട്ടില്ലെന്നും എല്ലാവരുമായും നല്ല ബന്ധം തന്നെയാണ് നിലനിർത്തുന്നതെന്നും അദ്ദേഹം കൂട്ടിച്ചേർത്തു. വിനോദിനിയുടെ ആരോപണം ആരെ ഉദ്ദേശിച്ചാണെന്ന് തനിക്കറിയില്ലെന്നും അവർ പറഞ്ഞതിനെക്കുറിച്ച് കൂടുതൽ വ്യക്തത വരുത്തേണ്ടത് അവർ തന്നെയാണെന്നും എം.വി. ഗോവിന്ദൻ വ്യക്തമാക്കി.
Story Summary: CPM State Secretary MV Govindan refuted allegations made by Vinodini Balakrishnan, wife of the late Kodiyeri Balakrishnan, who claimed the party neglected her family after his demise. Govindan stated that the CPM never ignores its members and that leaders, including himself, visit the family regularly.
