കാഞ്ഞങ്ങാട്: ഓടിക്കൊണ്ടിരുന്ന സ്കൂട്ടറിന് മുകളിലേക്ക് റോഡരികിലെ സംരക്ഷണ മതിൽ ഇടിഞ്ഞുവീണ് യാത്രക്കാരായ രണ്ട് യുവാക്കൾക്ക് പരിക്ക് (Kanhangad road accident). ബളാൽ കല്ലഞ്ചിറ സ്വദേശികളായ പ്രിയേഷ് ജോർജ് (33), വിഷ്ണു (20) എന്നിവർക്കാണ് പരിക്കേറ്റത്. പരിക്കേറ്റ ഇരുവരെയും ഉടൻ തന്നെ കാഞ്ഞങ്ങാട് ജില്ലാ ആശുപത്രിയിൽ പ്രവേശിപ്പിച്ചു.
ശനിയാഴ്ച ഉച്ചയോടെ മാവുങ്കാൽ കല്യാൺ റോഡിന് സമീപം ഇൻഡസ് മോട്ടോഴ്സ് ഷോറൂമിന് തൊട്ടടുത്തായിരുന്നു അപകടം. റോഡരികിലെ സ്വകാര്യ വ്യക്തിയുടെ ചുറ്റുമതിലിന്റെ ഒരു വലിയ ഭാഗം പെട്ടെന്ന് റോഡിലേക്ക് ഇടിഞ്ഞുവീഴുകയായിരുന്നു. ഈ സമയം പ്രിയേഷും വിഷ്ണുവും സ്കൂട്ടറിൽ ഈ വഴി വരികയായിരുന്നു. മതിൽ തകർന്നുവീണതോടെ ഇവർ സഞ്ചരിച്ചിരുന്ന വാഹനത്തിന് മുകളിലേക്ക് വൻതോതിൽ മണ്ണും കല്ലും പതിക്കുകയായിരുന്നു.
കിഴക്ക് ഭാഗത്തേക്ക് പോകുന്ന പോക്കറ്റ് റോഡരികിലെ മതിലാണ് തകർന്നത്. അപകടത്തെത്തുടർന്ന് കല്ലുകളും മണ്ണും സമീപത്തെ ദേശീയപാതയിലേക്കും തെറിച്ചുവീണു. ഇത് പ്രദേശത്ത് ചെറിയ രീതിയിൽ ഗതാഗത തടസ്സത്തിന് കാരണമായി. തുടർന്ന് നാട്ടുകാരും പോലീസും ചേർന്നാണ് റോഡിലെ അവശിഷ്ടങ്ങൾ നീക്കം ചെയ്തത്. കനത്ത മഴയിൽ മതിൽ കുതിർന്നുനിന്നതാണ് അപകടത്തിന് കാരണമെന്ന് സംശയിക്കുന്നു.
Story Summary: Two youth, Priyesh George and Vishnu, were injured after a roadside compound wall collapsed onto their moving scooter near Mavungal Kalyan Road in Kanhangad. The victims have been admitted to the District Hospital, and the debris also caused minor disruptions on the national highway.
