ചെന്നൈ: തമിഴ്നാട് നിയമസഭാ തിരഞ്ഞെടുപ്പ് പൂർത്തിയായി പുതിയ സർക്കാർ അധികാരമേറ്റതിന് പിന്നാലെ, മുൻ ബിജെപി സംസ്ഥാന അധ്യക്ഷൻ കെ. അണ്ണാമലൈ പുതിയ രാഷ്ട്രീയ പാർട്ടി രൂപീകരിച്ചേക്കുമെന്ന അഭ്യൂഹങ്ങൾ തമിഴ് രാഷ്ട്രീയ കേന്ദ്രങ്ങളിൽ ശക്തമാകുന്നു (K Annamalai New Political Party Rumors). തിരഞ്ഞെടുപ്പിന് മുൻപ് തന്നെ പലപ്പോഴായി ഉയർന്നുകേട്ടിരുന്ന ഈ വാർത്തകൾക്ക് അണ്ണാമലൈയുടെ അനുയായികൾ സമൂഹമാധ്യമമായ എക്സിൽ പങ്കുവെക്കുന്ന പോസ്റ്റുകളാണ് ഇപ്പോൾ പുതിയ ഊർജ്ജം നൽകിയിരിക്കുന്നത്. വരാനിരിക്കുന്ന പുതിയ പാർട്ടിയുടെ സാധ്യതാ പേരുകളും പതാകയുടെ ഡിസൈനുകളും വരെ അണ്ണാമലൈ അനുകൂലികൾ സോഷ്യൽ മീഡിയയിൽ സജീവമായി ചർച്ച ചെയ്യുന്നുണ്ട്. ജൂൺ മാസത്തിൽ തന്നെ ഇതുസംബന്ധിച്ച ഔദ്യോഗിക പ്രഖ്യാപനം ഉണ്ടായേക്കുമെന്നാണ് അദ്ദേഹത്തോട് അടുത്ത വൃത്തങ്ങൾ അവകാശപ്പെടുന്നത്.
ഇതിനിടെ ഒമ്പതാം ക്ലാസ് വിദ്യാർത്ഥികൾക്കായി മൂന്ന് ഭാഷാ നയം നടപ്പിലാക്കാനുള്ള സിബിഎസ്ഇയുടെ തീരുമാനത്തെ അണ്ണാമലൈ പരസ്യമായി വിമർശിച്ചതും, കഴിഞ്ഞ ദിവസം പ്രധാനമന്ത്രി നരേന്ദ്ര മോദിയുടെ ‘മൻ കി ബാത്ത്’ പരിപാടിയെക്കുറിച്ച് അദ്ദേഹം സോഷ്യൽ മീഡിയയിൽ യാതൊരു പോസ്റ്റും പങ്കുവെക്കാതിരുന്നതും ഈ സംശയങ്ങൾക്ക് ആക്കം കൂട്ടുന്നു. 2026-ലെ നിയമസഭാ തിരഞ്ഞെടുപ്പിൽ എഐഎഡിഎംകെയുമായി (AIADMK) സഖ്യം പുനഃസ്ഥാപിക്കാനുള്ള ബിജെപി കേന്ദ്ര നേതൃത്വത്തിന്റെ തീരുമാനത്തിൽ അണ്ണാമലൈ അതൃപ്തനായിരുന്നുവെന്ന് റിപ്പോർട്ടുകളുണ്ടായിരുന്നു.
മുൻ ഐപിഎസ് ഉദ്യോഗസ്ഥനായ അണ്ണാമലൈ 2021 ജൂലൈയിൽ തന്റെ മുപ്പത്തിയേഴാം വയസ്സിലാണ് തമിഴ്നാട് ബിജെപിയുടെ ഏറ്റവും പ്രായം കുറഞ്ഞ അധ്യക്ഷനായി ചുമതലയേൽക്കുന്നത്. എന്നാൽ സഖ്യ ചർച്ചകളെ തുടർന്ന് 2025-ൽ അദ്ദേഹം ഈ പദവി ഒഴിഞ്ഞിരുന്നു. അതേസമയം അണ്ണാമലൈ പാർട്ടി വിടുമെന്ന വാർത്തകൾ മുതിർന്ന ബിജെപി നേതാക്കൾ നിഷേധിച്ചതായും അദ്ദേഹത്തിന് ഉടൻ തന്നെ ദേശീയതലത്തിൽ പുതിയ ചുമതലകൾ നൽകിയേക്കുമെന്നാണ് പാർട്ടി വൃത്തങ്ങൾ സൂചിപ്പിക്കുന്നതെന്നും ദേശീയ മാധ്യമങ്ങൾ റിപ്പോർട്ട് ചെയ്യുന്നു.
Summary: Speculation is rife in Tamil Nadu political circles that former BJP state president K. Annamalai might launch a new political party. Rumors gained momentum as his supporters on social media started floating potential party names and flag designs. While political observers point to his recent policy criticisms and calculated social media silence, senior BJP leaders have downplayed the rumors, suggesting he might soon receive a national role within the party.
