വാഷിംഗ്ടൺ: യുഎസിൽ ഉപരിപഠനം നടത്തുന്ന വിദേശ വിദ്യാർത്ഥികൾക്ക് വലിയ സാമ്പത്തിക ബാധ്യതയും ആശങ്കയും സൃഷ്ടിക്കുന്ന പുതിയ വിസ പരിഷ്കരണങ്ങളുമായി യുഎസ് ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി (DHS). പുതിയ നിയമപ്രകാരം ഭൂരിഭാഗം വിദേശ വിദ്യാർത്ഥികൾക്കും (F-1 വിസയുള്ളവർക്ക്) പരമാവധി നാല് വർഷത്തേക്ക് മാത്രമായിരിക്കും യുഎസിൽ തുടരാൻ അനുമതി. നിലവിലെ പഠനം പൂർത്തിയാക്കിയ ശേഷമുള്ള ഗ്രേസ് പിരീഡ് 60 ദിവസത്തിൽ നിന്നും 30 ദിവസമായി വെട്ടിക്കുറച്ചു. പുതിയ നിയമം സെപ്റ്റംബർ 17 മുതൽ പ്രാബല്യത്തിൽ വരും.(US Finalizes Strict Student Visa Rules Limiting Stay For International Students)
നിലവിൽ കോഴ്സ് തീരുന്നത് വരെ എത്ര കാലം വേണമെങ്കിലും വിദ്യാർത്ഥികൾക്ക് യുഎസിൽ തുടരാമായിരുന്നു. എന്നാൽ പുതിയ ഭേദഗതിയിലൂടെ ഈ ആനുകൂല്യം ഇല്ലാതാവുകയാണ്. ഇതോടെ പിഎച്ച്ഡി, മെഡിക്കൽ വിദ്യാർത്ഥികൾ തുടങ്ങിയവർക്ക് വിസാ കാലാവധി നീട്ടാൻ ഇടയ്ക്കിടെ അപേക്ഷിക്കേണ്ടി വരും. ഇതിനായി വലിയ തുക ഫീസ് നൽകേണ്ടി വരുന്നതിനൊപ്പം വലിയ തോതിലുള്ള അനിശ്ചിതത്വവും നേരിടേണ്ടി വരും. വിസ നീട്ടി ലഭിക്കാൻ കൃത്യസമയത്ത് അപേക്ഷിച്ചില്ലെങ്കിൽ രാജ്യത്ത് നിയമവിരുദ്ധമായി താമസിച്ചതിന് മൂന്ന് മുതൽ പത്ത് വർഷം വരെ വിലക്ക് നേരിടേണ്ടി വരുമെന്ന് പ്രമുഖ ഇമിഗ്രേഷൻ വിദഗ്ധർ മുന്നറിയിപ്പ് നൽകുന്നു.
പുതിയ പരിഷ്കാരം വിദ്യാർത്ഥികളുടെ പഠന സ്വാതന്ത്ര്യത്തെയും സാരമായി ബാധിക്കും. ഒന്നാം വർഷ ബിരുദ വിദ്യാർത്ഥികൾക്ക് അവരുടെ കോഴ്സുകളോ സബ്ജക്ടുകളോ മാറ്റുന്നതിന് കർശന നിയന്ത്രണങ്ങളുണ്ടാകും. ബിരുദാനന്തര ബിരുദ വിദ്യാർത്ഥികൾക്കാകട്ടെ പിന്നീട് മറ്റൊരു വിഷയത്തിലേക്ക് മാറാൻ ഒട്ടും അനുവാദമുണ്ടാകില്ല. കൂടാതെ, ഒരു നിശ്ചിത കോഴ്സ് കഴിഞ്ഞാൽ പിന്നീട് അതേ തലത്തിലുള്ളതോ അതിലും താഴെയുള്ളതോ ആയ മറ്റൊരു കോഴ്സ് ചെയ്യാൻ ഇതേ വിസയിൽ അനുവദിക്കില്ല. അതായത് ഒരു ബാച്ചിലർ കോഴ്സ് കഴിഞ്ഞാൽ പിന്നീട് മാസ്റ്റേഴ്സ് കോഴ്സുകൾക്ക് മാത്രമേ പ്രവേശനം ലഭിക്കൂ. യുഎസിലെ വിദേശ വിദ്യാർത്ഥികളിൽ 31 ശതമാനത്തിലധികവും ഇന്ത്യയിൽ നിന്നുള്ളവരാണ്.
Story Summary
The US Department of Homeland Security has finalized strict new regulations for international students, limiting the F-1 visa duration to a fixed four-year period and halving the post-study grace period to 30 days. The rule, which also restricts academic flexibility such as changing majors or pursuing same-level degrees, will heavily impact over 3.6 lakh Indian students in the US.
