ബുക്കാറസ്റ്റ്: യുക്രെയ്നെ ലക്ഷ്യമിട്ട് റഷ്യ നടത്തിയ വ്യോമാക്രമണത്തിനിടെ റഷ്യൻ ഡ്രോൺ നാറ്റോ സഖ്യരാജ്യമായ റൊമാനിയയിലെ ജനവാസ മേഖലയിൽ തകർന്നുവീണു. കിഴക്കൻ റൊമാനിയൻ നഗരമായ ഗലാറ്റിയിലെ ഒരു ബഹുനില പാർപ്പിട സമുച്ചയത്തിന് മുകളിലാണ് ഡ്രോൺ പതിച്ചത് (Russian Drone Crash Romania). അപകടത്തെത്തുടർന്ന് കെട്ടിടത്തിന് തീപിടിക്കുകയും രണ്ട് പേർക്ക് പരിക്കേൽക്കുകയും ചെയ്തു. സംഭവത്തെത്തുടർന്ന് റൊമാനിയൻ വ്യോമസേനയുടെ രണ്ട് എഫ്-16 പോർവിമാനങ്ങളും ഒരു ഹെലികോപ്റ്ററും അടിയന്തിരമായി മേഖലയിൽ വിന്യസിക്കുകയും ജനങ്ങളെ സുരക്ഷിത സ്ഥാനങ്ങളിലേക്ക് മാറ്റുകയും ചെയ്തു. അന്താരാഷ്ട്ര നിയമങ്ങളുടെ ഗുരുതരമായ ലംഘനമാണ് റഷ്യയുടെ ഭാഗത്തുനിന്ന് ഉണ്ടായതെന്നും മോസ്കോയുമായുള്ള നയതന്ത്രബന്ധത്തിൽ ഇതിന്റെ പ്രത്യാഘാതങ്ങൾ ഉണ്ടാകുമെന്നും റൊമാനിയൻ വിദേശകാര്യ മന്ത്രാലയം മുന്നറിയിപ്പ് നൽകി. സംഭവത്തിന് പിന്നാലെ റൊമാനിയയിലെ റഷ്യൻ അംബാസഡറെ വിദേശകാര്യ മന്ത്രാലയം നേരിട്ട് വിളിച്ചുവരുത്തി പ്രതിഷേധം അറിയിച്ചു.
റഷ്യയുടെ യുക്രെയ്ൻ അധിനിവേശം അയൽപക്കത്തുള്ള നാറ്റോ രാജ്യങ്ങളിലേക്ക് പടരുന്നതിലുള്ള ആശങ്ക ഈ സംഭവത്തോടെ ശക്തമായിരിക്കുകയാണ്. സമീപ മാസങ്ങളിൽ ഫിൻലാൻഡ്, എസ്തോണിയ, ലിത്വാനിയ, ലാത്വിയ തുടങ്ങിയ രാജ്യങ്ങളും തങ്ങളുടെ വ്യോമാതിർത്തിയിൽ റഷ്യൻ ഡ്രോണുകളുടെ സാന്നിധ്യം റിപ്പോർട്ട് ചെയ്തിരുന്നു. റൊമാനിയയിൽ ഉണ്ടായ അപകടത്തെ തുടർന്ന് യൂറോപ്യൻ യൂണിയന്റെയും നാറ്റോയുടെയും നേതൃത്വത്തിൽ റഷ്യക്കെതിരെ കടുത്ത ഉപരോധങ്ങൾ ഏർപ്പെടുത്താൻ നീക്കം ആരംഭിച്ചിട്ടുണ്ട്. റഷ്യയുടെ ഈ അപകടകരമായ നീക്കങ്ങൾക്കെതിരെ യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയനും നാറ്റോ ജനറൽ സെക്രട്ടറി മാർക്ക് റൂട്ടയും ശക്തമായ ഭാഷയിൽ അപലപിച്ചു. നാറ്റോ അതിർത്തികൾ പൂർണ്ണമായും സംരക്ഷിക്കുമെന്നും യുക്രെയ്നുള്ള പിന്തുണ തുടരുമെന്നും സഖ്യം വ്യക്തമാക്കി. ഒരൊറ്റ രാത്രികൊണ്ട് 232 ഡ്രോണുകളും ബാലിസ്റ്റിക് മിസൈലുകളും ഉപയോഗിച്ചാണ് റഷ്യ യുക്രെയ്ന് നേരെ ആക്രമണം നടത്തിയത്. ഇതിൽ 217 ഡ്രോണുകളും തങ്ങൾ വെടിവെച്ചിട്ടതായി യുക്രെയ്ൻ വ്യോമസേന അറിയിച്ചു.
Summary: A Russian drone carrying out overnight strikes on Ukraine crashed into a residential building in the Romanian city of Galati, injuring two people and sparking a fire. Romania and its NATO allies reacted with outrage, labeling the incident a serious violation of international law and prompting Bucharest to summon the Russian ambassador. NATO Secretary General Mark Rutte condemned Russia’s reckless behavior and reaffirmed the alliance’s commitment to defending all its member territories.
