തന്റെ പേരിൽ സോഷ്യൽ മീഡിയയിൽ വ്യാജ പ്രചരണം നടത്തുന്ന പേജുകൾക്കെതിരെ ശക്തമായ പ്രതികരണവുമായി നടൻ ആന്റണി വർഗീസ് (പെപ്പെ) രംഗത്ത് ((Antony Varghese). താരത്തിന്റെ പുതിയ ചിത്രമായ ‘കാട്ടാളൻ’ സിനിമയെക്കുറിച്ച്, ആന്റണിയുടെ ആരാധകരുടേതെന്ന വ്യാജേന ഇല്ലാക്കഥകൾ പ്രചരിപ്പിക്കുന്ന ഒരു ഫേസ്ബുക്ക് പേജിനെതിരെയാണ് താരം പരസ്യമായി പ്രതികരിച്ചിരിക്കുന്നത്. ‘ആന്റണി വർഗീസ് ഫാൻസ് ക്ലബ്’ എന്ന ഫേസ്ബുക്ക് പേജിൽ വന്ന കുറിപ്പിന്റെ സ്ക്രീൻഷോട്ട് പങ്കുവെച്ചുകൊണ്ടാണ് പെപ്പെ സത്യാവസ്ഥ വ്യക്തമാക്കിയത്.
‘കാട്ടാളൻ’ എന്ന സിനിമയെ തകർക്കാൻ ‘ദൃശ്യം 3’ എന്ന ചിത്രത്തിന്റെ പി.ആർ ടീം ശ്രമിക്കുന്നുണ്ടെന്നും, മോശം റിവ്യൂകൾ നൽകി സിനിമയെ നശിപ്പിക്കാനാണ് അവരുടെ ഭാവമെന്നുമാണ് ഈ വ്യാജ ഫാൻസ് പേജിൽ വന്ന കുറിപ്പിൽ പറയുന്നത്. മാത്രമല്ല, ദൃശ്യം 3 എന്ന ചിത്രത്തെ കേവലം ഒരു സീരിയൽ നിലവാരം മാത്രമുള്ള സിനിമയെന്നും ഈ പോസ്റ്റിൽ അധിക്ഷേപിക്കുന്നുണ്ട്.
എന്നാൽ, വിവാദമുണ്ടാക്കാൻ ബോധപൂർവ്വം സൃഷ്ടിച്ച ഈ പേജുമായി തനിക്കോ തന്റെ യഥാർത്ഥ ആരാധകർക്കോ യാതൊരുവിധ ബന്ധവുമില്ലെന്ന് ആന്റണി വർഗീസ് വ്യക്തമാക്കി. ഈ വ്യാജ പേജിൽ വരുന്ന വിവരങ്ങൾ ആരും വിശ്വസിക്കുകയോ പങ്കുവെക്കുകയോ ചെയ്യരുതെന്നും താരം അഭ്യർത്ഥിച്ചു.
“എന്റെ ഫാൻ പേജ് എന്ന പേരിൽ ഒരു വ്യാജ ഫെയ്സ്ബുക്ക് പേജിലൂടെ തെറ്റായ വിവരങ്ങൾ പ്രചരിപ്പിക്കുന്നതായി ശ്രദ്ധയിൽപ്പെട്ടിട്ടുണ്ട്. ഈ പേജിന് ഞാനുമായോ എന്റെ ആരാധകരുമായോ യാതൊരു ബന്ധവുമില്ലെന്ന് എല്ലാവരെയും അറിയിക്കുന്നു. അനാവശ്യമായ ആരോപണങ്ങളും നാടകീയതയും സൃഷ്ടിക്കാനായി ബോധപൂർവ്വം വ്യാജ വാർത്ത പ്രചരിപ്പിക്കുകയാണ് ഇവർ ചെയ്യുന്നത്. ഇവിടെ പോസ്റ്റ് ചെയ്യുന്നതൊന്നും ആരും വിശ്വസിക്കുകയോ ഷെയർ ചെയ്യുകയോ ചെയ്യരുത്. ഇക്കാര്യം എന്റെ ശ്രദ്ധയിൽ പെടുത്തിയവർക്ക് നന്ദി,” ആന്റണി വർഗീസ് ഫേസ്ബുക്കിൽ കുറിച്ചു.
Story Summary: Actor Antony Varghese (Pepe) has warned fans against a fake Facebook page operating under his name. The page was falsely accusing the PR team of ‘Drishyam 3’ of deliberately ruining the reviews of Antony’s new movie ‘Kattaalan’.
