കൊച്ചി: മാസപ്പടി കേസുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയന്റെ വസതികളിൽ എൻഫോഴ്സ്മെന്റ് ഡയറക്ടറേറ്റ് (CM VD Satheesan silent ED raid) നടത്തിയ കൂട്ട റെയ്ഡിനെക്കുറിച്ചുള്ള ചോദ്യങ്ങളോട് രണ്ടാം ദിവസവും പ്രതികരിക്കാതെ മുഖ്യമന്ത്രി വി.ഡി. സതീശൻ. പെരുന്നാൾ ദിനത്തിൽ മലപ്പുറം പാണക്കാട് തറവാട് സന്ദർശിക്കാനെത്തിയ മുഖ്യമന്ത്രി അവിടെ വെച്ച് മാധ്യമങ്ങളെ കണ്ടിരുന്നെങ്കിലും, ഇഡി പരിശോധനയെക്കുറിച്ചുള്ള ചോദ്യങ്ങൾ ഉയർന്നതോടെ മറുപടി നൽകാതെ മുഖം തിരിക്കുകയായിരുന്നു.
ഡൽഹിയിലെ ഔദ്യോഗിക സന്ദർശനം പൂർത്തിയാക്കി ബുധനാഴ്ച രാത്രി 10.20-ഓടെ കൊച്ചി അന്താരാഷ്ട്ര വിമാനത്താവളത്തിൽ (CIAL) തിരിച്ചെത്തിയപ്പോഴും മാധ്യമപ്രവർത്തകർ ഇതേക്കുറിച്ച് പലതവണ ആവർത്തിച്ച് ചോദിച്ചെങ്കിലും അദ്ദേഹം മൗനം പാലിച്ചു. നേരത്തെ ഡൽഹിയിൽ വെച്ചും മാധ്യമങ്ങളുടെ ഇഡി സംബന്ധമായ ചോദ്യങ്ങളോട് അദ്ദേഹം ഇതേ നിലപാടാണ് സ്വീകരിച്ചത്.
അതേസമയം, പിണറായി വിജയന്റെ വസതിയിലെ ഇഡി പരിശോധനയ്ക്കെതിരെ സംസ്ഥാനവ്യാപകമായി സിപിഎം കടുത്ത ജനകീയ പ്രതിഷേധം ഉയർത്തുന്ന പശ്ചാത്തലത്തിൽ മുഖ്യമന്ത്രി വി.ഡി. സതീശന്റെ സുരക്ഷ സർക്കാർ വർദ്ധിപ്പിച്ചിട്ടുണ്ട്. ഇതിന് പുറമെ കനത്ത സംഘർഷ സാധ്യത കണക്കിലെടുത്ത് കൊച്ചിയിലെ ഇഡി റീജിയണൽ ഓഫീസിനും സുരക്ഷ കർശനമാക്കി. കൊച്ചി സിറ്റി പൊലീസും കേന്ദ്ര സേനയായ സി.ആർ.പി.എഫും (CRPF) സംയുക്തമായാണ് നിലവിൽ ഇഡി ഓഫീസിന് കൂടുതൽ സുരക്ഷാ വലയം ഒരുക്കിയിരിക്കുന്നത്.
Story Summary: For the second consecutive day, Chief Minister V.D. Satheesan declined to comment on the ongoing ED raids in Kerala, evading media queries even during his Eid visit to Panakkad. Meanwhile, security has been beefed up for both the CM and the Kochi ED office amid rising CPM protests.
