ന്യൂഡൽഹി: ആധുനിക സാങ്കേതികവിദ്യകൾക്കും പ്രതിരോധ ഉൽപ്പാദനത്തിനും അത്യന്താപേക്ഷിതമായ തന്ത്രപ്രധാന ധാതുക്കളുടെയും അപൂർവ്വ മൺധാതുക്കളുടെയും സുരക്ഷിതമായ വിതരണം ഉറപ്പാക്കുന്നതിനായി ഇന്ത്യയും അമേരിക്കയും തമ്മിൽ ചരിത്രപരമായ കരാറിൽ ഒപ്പുവെച്ചു (India US Critical Minerals Agreement Rare). ന്യൂഡൽഹിയിൽ നടന്ന ഉഭയകക്ഷി കൂടിക്കാഴ്ചയിൽ ഇന്ത്യൻ വിദേശകാര്യ മന്ത്രി ഡോ. എസ് ജയശങ്കറും യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമാണ് ഈ തന്ത്രപ്രധാനമായ ധാരണാപത്രത്തിൽ ഒപ്പുവെച്ചത്.
നിലവിൽ ഈ ധാതുക്കളുടെ ആഗോള വിതരണത്തിലും സംസ്കരണത്തിലും വലിയൊരു പങ്ക് നിയന്ത്രിക്കുന്ന ചൈനയുടെ ഏകപക്ഷീയമായ കുത്തക കുറയ്ക്കുക, വിപണിയിലെ ഭീഷണികളിൽ നിന്ന് വിതരണ ശൃംഖലയെ സംരക്ഷിക്കുക എന്നിവയാണ് പുതിയ യുഎസ്-ഇന്ത്യ ഫ്രെയിംവർക്ക് കരാറിന്റെ പ്രധാന ലക്ഷ്യം. ഇതിന് പുറമെ ഇന്ത്യ, യുഎസ്, ജപ്പാൻ, ഓസ്ട്രേലിയ എന്നിവരടങ്ങുന്ന ‘ക്വാഡ്’ സഖ്യരാജ്യങ്ങളും തന്ത്രപ്രധാന ധാതുക്കളുടെ സുരക്ഷയ്ക്കായി പുതിയൊരു ബഹുരാഷ്ട്ര കൂട്ടായ്മ പ്രഖ്യാപിച്ചിട്ടുണ്ട്.
ബാറ്ററികൾ, അർദ്ധചാലകങ്ങൾ, ഇലക്ട്രിക് വാഹനങ്ങളുടെ മോട്ടോറുകൾ, ആർട്ടിഫിഷ്യൽ ഇന്റലിജൻസ് സാങ്കേതികവിദ്യകൾ, സൈനിക ഹാർഡ്വെയറുകൾ എന്നിവയുടെ നിർമ്മാണത്തിന് ആവശ്യമായ ലിഥിയം, കൊബാൾട്ട്, നിക്കൽ, ഗ്രാഫൈറ്റ്, ടൈറ്റാനിയം തുടങ്ങിയ മുപ്പതോളം തന്ത്രപ്രധാന ധാതുക്കൾ ഇന്ത്യ ഇതിനകം കണ്ടെത്തിയിട്ടുണ്ട്.
ഇന്ത്യയിൽ ഒഡീഷ, കേരളം, ആന്ധ്രാപ്രദേശ്, തമിഴ്നാട് എന്നീ സംസ്ഥാനങ്ങളിലായി അപൂർവ്വ മൺധാതുക്കളുടെ ഖനനവും സംസ്കരണവും ലക്ഷ്യമിട്ട് പ്രത്യേക ‘റെയർ എർത്ത് കോറിഡോറുകൾ’ സ്ഥാപിക്കുമെന്ന് പുതിയ ബജറ്റിൽ പ്രഖ്യാപിച്ചിരുന്നു. ഈ ഉദ്യമങ്ങൾക്ക് വേഗത പകരാൻ പുതിയ കരാർ സഹായിക്കും. ഖനനം, സംസ്കരണം, പുനരുപയോഗം എന്നീ മേഖലകളിൽ വൻതോതിൽ സ്വകാര്യ നിക്ഷേപങ്ങൾ ആകർഷിക്കുന്നതിനായി ഏകദേശം 2,000 കോടി ഡോളർ വരെ സമാഹരിക്കാനാണ് ക്വാഡ് രാജ്യങ്ങൾ ലക്ഷ്യമിടുന്നത്. അർജന്റീന, ഫിലിപ്പീൻസ്, യുകെ, യുഎഇ ഉൾപ്പെടെയുള്ള മറ്റ് സൗഹൃദ രാജ്യങ്ങളുമായും അമേരിക്ക ഇത്തരത്തിൽ തന്ത്രപ്രധാന ധാതുക്കൾക്കായുള്ള കരാറുകളിൽ ഏർപ്പെട്ടിട്ടുണ്ട്.
Summary: India and the United States have signed a landmark framework agreement to secure and diversify the supply chains of critical minerals and rare earth elements. The deal was finalized in New Delhi between Indian External Affairs Minister S. Jaishankar and US Secretary of State Marco Rubio to counter China’s global monopoly in processing these materials. Additionally, the Quad nations announced a multilateral initiative aiming to mobilize up to twenty billion dollars for mining, processing, and recycling projects.
