ഇറ്റാനഗർ: ട്രെയിൻ യാത്രയ്ക്കിടെ അജ്ഞാതരുടെ ആക്രമണത്തിന് ഇരയായി ഭയന്നോടിയ അരുണാചൽ പ്രദേശ് സ്വദേശിയായ മധ്യവയസ്കൻ ഒടുവിൽ ശ്മശാനത്തിന് സമീപം മരിച്ച നിലയിൽ (Man Found Dead Ongole Cemetery). അരുണാചലിലെ തിരപ് ജില്ലക്കാരനായ കംലോ മോഫുക്ക് (51) ആണ് മരിച്ചത്. ബെംഗളൂരുവിലുള്ള തന്റെ മക്കളെ കാണാനായി മേയ് 16-ന് ടിൻസുകിയയിൽ നിന്ന് ട്രെയിൻ കയറിയ ഇദ്ദേഹത്തെ മേയ് 18-ന് യാത്രയ്ക്കിടയിൽ ചിലർ ക്രൂരമായി മർദ്ദിക്കുകയായിരുന്നു. ജീവനിൽ ഭയന്ന് ആന്ധ്രാപ്രദേശിലെ ഒംഗോൾ റെയിൽവേ സ്റ്റേഷനിൽ ഇറങ്ങിയ ഇദ്ദേഹം റെയിൽവേ പോലീസിനെയും പ്രാദേശിക പോലീസിനെയും സമീപിച്ചെങ്കിലും യാതൊരുവിധ സഹായവും ലഭിച്ചില്ലെന്ന് കുടുംബം ആരോപിക്കുന്നു. ചിലർ തന്നെ പിന്തുടരുന്നുണ്ടെന്നും കടുത്ത ഭയത്തിലാണെന്നും ഫോൺ ബാറ്ററി തീരാറായെന്നും കാണിച്ച് മോഫുക്ക് മകൾ ങോന മോഫുക്കിനെ വിളിച്ചിരുന്നു. മേയ് 19-ന് രാവിലെ എട്ട് മണിയോടെ മകളുമായി നടത്തിയ അവസാന സംഭാഷണത്തിന് ശേഷം ഇയാളുടെ ഫോൺ സ്വിച്ച് ഓഫ് ആകുകയായിരുന്നു.
ബെംഗളൂരുവിലുള്ള മക്കൾ മേയ് 19 മുതൽ 24 വരെ അച്ഛനായി തിരച്ചിൽ നടത്തിയെങ്കിലും അധികൃതരുടെ ഭാഗത്തുനിന്നും കടുത്ത അവഗണനയാണ് നേരിട്ടത്. തുടർന്ന് അരുണാചൽ മന്ത്രി വാങ്കി ലോവാങ് ഇടപെട്ട് ആന്ധ്രാ അധികൃതരുമായി ബന്ധപ്പെട്ടതിന് ശേഷമാണ് പോലീസും വനംവകുപ്പും തിരച്ചിൽ ഊർജ്ജിതമാക്കിയത്. ഒടുവിൽ മൊബൈൽ ലൊക്കേഷൻ കേന്ദ്രീകരിച്ച് നടത്തിയ തിരച്ചിലിൽ ഒരു ശ്മശാനത്തിന് സമീപത്തുനിന്നും മോഫുക്കിന്റെ മൃതദേഹം കണ്ടെത്തുകയായിരുന്നു. മേയ് 21-ന് തന്നെ മൃതദേഹം കണ്ടെത്തിയിരുന്നെങ്കിലും മെയ് 23-നാണ് അധികൃതർ വിവരം കുടുംബത്തെ അറിയിച്ചത്. പോലീസിന്റെയും പ്രാദേശിക ഭരണകൂടത്തിന്റെയും ഭാഗത്തുനിന്നും കൃത്യമായ സമയത്ത് സഹായവും സഹാനുഭൂതിയും ലഭിച്ചിരുന്നുവെങ്കിൽ ഈ ദുരന്തം ഒഴിവാക്കാമായിരുന്നുവെന്ന് ബന്ധുക്കൾ ആരോപിച്ചു.
Summary: A 51-year-old man from Arunachal Pradesh, Kamlo Mophuk, was found dead near a cemetery in Andhra Pradesh after allegedly being assaulted by unidentified persons during a train journey to Bengaluru. Despite seeking urgent help from the railway and local police after escaping at Ongole station, his family alleges that negligence and lack of cooperation from authorities delayed action. A search operation was intensified only after the intervention of Arunachal Minister Wangki Lowang, but the family faced further distress due to a delayed notification regarding the recovery of his body.
