കാൻസ്: എഴുപത്തിയൊമ്പതാമത് കാൻസ് ചലച്ചിത്രമേളയുടെ റെഡ് കാർപെറ്റിൽ പതിവുപോലെ ചരിത്രം ആവർത്തിച്ച് ബോളിവുഡ് താരം ഐശ്വര്യ റായ് (Aishwarya Rai Cannes Red Carpet Look). ഇത്തവണ മേളയുടെ തുടക്കം മുതൽ ഐശ്വര്യയുടെ അസാന്നിധ്യം ആരാധകർക്കിടയിൽ വലിയ ചർച്ചകൾക്കും ആശങ്കകൾക്കും വഴിമാറിയിരുന്നു. എന്നാൽ മകൾ ആരാധ്യ ബച്ചനൊപ്പം മുംബൈയിൽ നിന്നും കാൻസിലേക്ക് പറന്ന താരം, പ്രമുഖ ഡിസൈനർ അമിത് അഗർവാൾ രൂപകൽപ്പന ചെയ്ത അതിമനോഹരമായ ശിൽപ്പഭംഗിയുള്ള നീല മെർമെയ്ഡ് ഗൗണിൽ റെഡ് കാർപെറ്റിൽ പ്രത്യക്ഷപ്പെട്ടതോടെ എല്ലാവിധ അഭ്യൂഹങ്ങൾക്കും വിരാമമായി.
അമിത് അഗർവാളിന്റെ കാൻസ് അരങ്ങേറ്റം കൂടിയായ ഈ വസ്ത്രത്തിന് ‘ലുമിനാര’ എന്നാണ് പേരിട്ടിരിക്കുന്നത്. ചലിച്ചുകൊണ്ടിരിക്കുന്ന പ്രകാശത്തിന്റെ ഊർജ്ജത്തെയും പരിവർത്തനത്തെയുമാണ് ഈ വസ്ത്രം പ്രതിനിധീകരിക്കുന്നതെന്ന് ഡിസൈനർ വ്യക്തമാക്കി. റെഡ് കാർപെറ്റിൽ എത്തിയ താരം കൈകൾ കൂപ്പി നമസ്തേ പറഞ്ഞും ഫിംഗർ ഹാർട്ടുകൾ സമ്മാനിച്ചും പാപ്പരാസികളെയും ആരാധകരെയും അഭിവാദ്യം ചെയ്തു. തന്റെ അടുത്ത സുഹൃത്തും ലോറിയൽ ബ്രാൻഡ് അംബാസഡറുമായ ഇവാ ലംഗോറിയക്കൊപ്പം പോസ് ചെയ്ത ഐശ്വര്യ, മോണിക്ക ബെലൂച്ചി അഭിനയിച്ച ‘ദി ബർത്ത്ഡേ പാർട്ടി’ എന്ന ചിത്രത്തിന്റെ സ്ക്രീനിംഗിന്റെ ഭാഗമായാണ് റെഡ് കാർപെറ്റിൽ എത്തിയത്. 2002-ൽ ‘ദേവ്ദാസ്’ എന്ന ചിത്രവുമായി കാൻസിലെത്തിയ ഐശ്വര്യ റായ്, കഴിഞ്ഞ രണ്ട് പതിറ്റാണ്ടിലേറെയായി ഇന്ത്യയുടെ ഏറ്റവും പ്രമുഖയായ ആഗോള ഫാഷൻ ഐക്കണായി കാൻസ് ചലച്ചിത്രമേളയിൽ തിളങ്ങിനിൽക്കുകയാണ്.
Summary: Bollywood icon Aishwarya Rai made a stunning red carpet appearance at the 79th Cannes Film Festival, putting all ongoing rumors regarding her absence to rest. Gracing the gala for the 24th time, she turned heads in a sculpted blue mermaid gown named ‘Luminara’, custom-designed by Amit Aggarwal to represent light in motion.
