തിരുവനന്തപുരം: കേരളത്തിൽ വിവിധയിടങ്ങളിൽ വിതരണം ചെയ്യുന്ന ഗുണനിലവാരമില്ലാത്ത ആറ് പ്രമുഖ ആയുർവേദ മരുന്നുകൾക്ക് സംസ്ഥാന ഡ്രഗ്സ് കൺട്രോൾ വകുപ്പ് പൂർണ്ണ നിരോധനം ഏർപ്പെടുത്തി (Kerala Drugs Control Department). സംസ്ഥാനത്തെ സർക്കാർ മരുന്ന് പരിശോധനാ ലബോറട്ടറികളിൽ കഴിഞ്ഞ മേയ്മാസം നടത്തിയ കർശനമായ ഗുണനിലവാര പരിശോധനയിൽ മാനദണ്ഡങ്ങൾ പാലിക്കുന്നില്ലെന്ന് കണ്ടെത്തിയ നിർദ്ദിഷ്ട മരുന്നു ബാച്ചുകളുടെ വിതരണവും വില്പനയുമാണ് അടിയന്തിരമായി സംസ്ഥാനത്ത് വിലക്കിയത്. ഈ നിരോധിച്ച മരുന്നുകളുടെ സ്റ്റോക്കുകൾ കൈവശമുള്ള ഹോൾസെയിൽ-റീട്ടെയിൽ വ്യാപാരികളും സ്വകാര്യ-സർക്കാർ ആശുപത്രികളും അവ എത്രയും വേഗം അതത് വിതരണക്കാർക്ക് തന്നെ തിരികെ നൽകേണ്ടതാണ്. ഇതിന്റെ കൃത്യമായ വിശദാംശങ്ങൾ ബന്ധപ്പെട്ട ജില്ലാ ആയുർവേദ ഡ്രഗ്സ് ഇൻസ്പെക്ടർമാരെ അറിയിക്കണമെന്ന് സംസ്ഥാന ആയുർവേദ ഡ്രഗ് ലൈസൻസിംഗ് അതോറിറ്റിയായ ഡെപ്യുട്ടി ഡ്രഗ്സ് കൺട്രോളർ (ആയുർവേദം) ഔദ്യോഗികമായി അറിയിച്ചു.
നിരോധിച്ച മരുന്നുകളുടെയും അവയുടെ ബാച്ചുകളുടെയും വിശദവിവരങ്ങൾ താഴെ പറയുന്നവയാണ്:
കാസകൽപ കഫ് സിറപ്പ് (Kasakalpa Cough Syrup): ഉല്പാദകർ – മാരുതി ഫാർമ, പത്മ നഗർ, ഫേസ്-II, ഖുതുബുള്ളാപ്പൂർ, ചിന്തൽ, ഹൈദരാബാദ്. ബാച്ച് നമ്പർ: SK-VMP-01, നിർമ്മാണ തീയതി: മെയ് 2026, കാലാവധി: ജനുവരി 01, 2028.
വിശ്വാസസുധാരണം ലിക്വിഡ് (Viswasasudharan a Liquid): ഉല്പാദകർ – മാരുതി ഫാർമ, ഹൈദരാബാദ്. ബാച്ച് നമ്പർ: MP-VSK-18, നിർമ്മാണ തീയതി: മെയ് 2026, കാലാവധി: ഒക്ടോബർ 1, 2027.
ശ്വാസകൽപ ലിക്വിഡ് (Swasakalpa Liquid): ഉല്പാദകർ – മാരുതി ഫാർമ, ഹൈദരാബാദ്. ബാച്ച് നമ്പർ: SK-VMP-01, നിർമ്മാണ തീയതി: മെയ് 2026, കാലാവധി: ജനുവരി 01, 2028.
ശ്വാസ സ്ഫടികാമൃത ലിക്വിഡ് (Swasa spatikaamrutha Liquid): ഉല്പാദകർ – ശ്രീ വെങ്കിടേശ്വര ആയുർ ഫാർമ, യരപ്പനഹള്ളി, ബാംഗ്ലൂർ-560077. ബാച്ച് നമ്പർ: MPD, നിർമ്മാണ തീയതി: മെയ് 2026, കാലാവധി: ജനുവരി 2029.
വിസിൽ സിറപ്പ് – സിദ്ധ പ്രൊപ്രൈറ്ററി മെഡിസിൻ (Vizzle Syrup): ഉല്പാദകർ – സഞ്ജീവി ഫാർമ, കുമാരൻ നഗർ, ചെന്നൈ-600050. ബാച്ച് നമ്പർ: 63, നിർമ്മാണ തീയതി: മെയ് 2026, കാലാവധി: ഡിസംബർ 2026.
പെയിൻ നിവാരൺ ചൂർണം (Pain Niwaran Churna): ഉല്പാദകർ – എം/എസ് രാജസ്ഥാൻ ഹെർബൽ ഇന്റർനാഷണൽ പ്രൈവറ്റ് ലിമിറ്റഡ്, റിക്കോ (RIICO) ഇൻഡസ്ട്രിയൽ ഏരിയ, ജുൻജുനു, രാജസ്ഥാൻ. ബാച്ച് നമ്പർ: PNG 25067, നിർമ്മാണ തീയതി: ജൂൺ 2026, കാലാവധി: സെപ്റ്റംബർ 2027.
സംസ്ഥാനത്തെ ജനങ്ങൾ ആയുർവേദ ഫാർമസികളിൽ നിന്നും ആശുപത്രികളിൽ നിന്നും മരുന്നുകൾ വാങ്ങുമ്പോൾ മുകളിൽ പറഞ്ഞിരിക്കുന്ന നിർദ്ദിഷ്ട ബാച്ച് നമ്പറിലുള്ളവയല്ലെന്ന് ഉറപ്പുവരുത്തണമെന്ന് ഡ്രഗ്സ് കൺട്രോൾ വിഭാഗം നിർദ്ദേശിച്ചു. വരും ദിവസങ്ങളിലും പരിശോധനകൾ തുടരുമെന്ന് അധികൃതർ വ്യക്തമാക്കി.
Story Summary: The Kerala State Drugs Control Department has banned the distribution and sale of six Ayurvedic medicines after they failed quality tests conducted in May. The Deputy Drugs Controller (Ayurveda), who is also the state’s licensing authority, directed all merchants and hospitals to return the stock of these specific batches to the distributors and report to the district Ayurveda drugs inspectors. The banned products include batches of Kasakalpa Cough Syrup, Viswasasudharana Liquid, and Swasakalpa Liquid from Hyderabad-based Maruti Pharma; Swasa Spatikaamrutha Liquid from Bangalore; Vizzle Syrup from Chennai; and Pain Niwaran Churna from Rajasthan.
