ചെന്നൈ: തമിഴ്നാട് സർക്കാർ ഓഫീസുകളിലെയും രാഷ്ട്രീയക്കാരിലെയും വർഷങ്ങൾ പഴക്കമുള്ള ‘വിഐപി സംസ്കാരത്തിന്’ പ്രതീകാത്മകമായ അറുതി വരുത്തി പുതിയ മുഖ്യമന്ത്രി വിജയ്. മുഖ്യമന്ത്രിയുടെ ഔദ്യോഗിക ഓഫീസിലെ കസേരകളിൽ നിന്നും പരമ്പരാഗതമായി വിരിച്ചുവരാറുള്ള വെള്ള ടൗവലുകൾ അദ്ദേഹം ഒഴിവാക്കി. മുഖ്യമന്ത്രിയുടെ ഔദ്യോഗിക ഹാൻഡിൽ പങ്കുവെച്ച പുതിയ ചിത്രങ്ങളിലാണ് ഈ മാറ്റം വ്യക്തമാകുന്നത്.(Tamil Nadu CM Vijay Changes VIP White Towel Tradition From Government Chairs)
തമിഴ്നാട്ടിൽ പുതിയതായി അധികാരമേറ്റ മുഖ്യമന്ത്രി വിജയ്യോട് സർക്കാർ ഓഫീസുകളിലെ വിഐപി കസേരകളിൽ വെള്ളത്തൂവാല വിരിക്കുന്ന ഈ പതിവ് അവസാനിപ്പിക്കണമെന്ന് കാലാവസ്ഥാ പ്രവർത്തക സമൂഹമാധ്യമങ്ങളിലൂടെ അഭ്യർത്ഥിച്ചിരുന്നു. മന്ത്രിമാരും ഉദ്യോഗസ്ഥരും മാത്രമല്ല, താഴേത്തട്ടിലുള്ള ഉദ്യോഗസ്ഥർ വരെ ഈ രീതി പിന്തുടരുന്നുണ്ടെന്നും വിജയ് ഇതിനൊരു മാറ്റം വരുത്തി മാതൃകയാകണമെന്നുമായിരുന്നു എക്സിലെ പോസ്റ്റ്.
ഈ അഭ്യർത്ഥന വന്ന് തൊട്ടടുത്ത ദിവസം തന്നെ മുഖ്യമന്ത്രിയുടെ ഓഫീസിൽ നിന്നും നിശബ്ദവും എന്നാൽ ശ്രദ്ധേയവുമായ മാറ്റമുണ്ടായി. മെയ് 14-ന് സെക്രട്ടേറിയറ്റിൽ നടന്ന വ്യവസായ വകുപ്പിന്റെ അവലോകന യോഗത്തിൽ വിജയ് ഇരുന്ന കസേരയിൽ വെള്ളത്തൂവാല ഉണ്ടായിരുന്നു. എന്നാൽ, വെള്ളിയാഴ്ച പ്രമുഖ വ്യവസായ പ്രമുഖരുമായി നടത്തിയ കൂടിക്കാഴ്ചയുടെ ചിത്രങ്ങൾ പുറത്തുവന്നപ്പോൾ മുഖ്യമന്ത്രിയുടെ കസേരയിൽ നിന്നും ഈ വെള്ളത്തൂവാല പൂർണ്ണമായും അപ്രത്യക്ഷമായി.
ഈ മാറ്റത്തെ വലിയ ആവേശത്തോടെയാണ് സോഷ്യൽ മീഡിയ സ്വീകരിച്ചിരിക്കുന്നത്. സാധാരണക്കാരുടെ ശബ്ദം കേൾക്കുന്ന മുഖ്യമന്ത്രിയാണ് താനെന്ന് വിജയ് തെളിയിച്ചുവെന്ന് ലിസിപ്രിയ കംഗുജം നന്ദി അറിയിച്ചുകൊണ്ട് കുറിച്ചു. മെയ് 10-നാണ് വിജയ്യുടെ നേതൃത്വത്തിലുള്ള പുതിയ സർക്കാർ തമിഴ്നാട്ടിൽ അധികാരമേറ്റത്. നിയമസഭാ തിരഞ്ഞെടുപ്പിൽ വിജയ്യുടെ പാർട്ടിയായ ‘തമിഴക വെട്രി കഴകം’ ഏറ്റവും വലിയ ഒറ്റക്കക്ഷിയാവുകയും കോൺഗ്രസ്, സിപഐഎം, സിപിഐ ഉൾപ്പെടെയുള്ള സഖ്യകക്ഷികളുടെ പിന്തുണയോടെ സർക്കാർ രൂപീകരിക്കുകയുമായിരുന്നു.
Story Summary
Tamil Nadu Chief Minister Vijay has dropped the traditional practice of draping a white towel over the CM’s chair in government offices. The symbolic move towards ending VIP culture came a day after climate activist Licypriya Kangujam appealed to him on social media to abolish the British-era practice.
