ന്യൂഡൽഹി: നീതിന്യായ വ്യവസ്ഥയെ ലക്ഷ്യമിട്ട് സോഷ്യൽ മീഡിയയിലൂടെയും മറ്റും ആക്രമണം നടത്തുന്ന അഭിഭാഷകർക്കും ആക്ടിവിസ്റ്റുകൾക്കുമെതിരെ കടുത്ത വിമർശനവുമായി സുപ്രീം കോടതി ചീഫ് ജസ്റ്റിസ് സൂര്യകാന്ത്. കോടതികളെയും നിയമവ്യവസ്ഥയെയും തകർക്കാൻ ശ്രമിക്കുന്ന ഇത്തരം ആളുകൾ സമൂഹത്തിലെ ‘പരാദങ്ങൾ’ ആണെന്ന് ചീഫ് ജസ്റ്റിസ് രൂക്ഷമായ ഭാഷയിൽ ഓർമ്മിപ്പിച്ചു. ഡൽഹി ഹൈക്കോടതിയിലെ മുതിർന്ന അഭിഭാഷക പദവി നൽകുന്നതുമായി ബന്ധപ്പെട്ട ഹർജി പരിഗണിക്കവെയായിരുന്നു ചീഫ് ജസ്റ്റിസിന്റെ അത്യപൂർവ്വ പ്രതികരണങ്ങൾ.(Chief Justice Surya Kant Criticizes Social Media Activists And Warns Of CBI Probe Into Advocates Law Degrees)
സോഷ്യൽ മീഡിയയിലൂടെ ജുഡീഷ്യറിയെ ലക്ഷ്യമിടുന്നവരുടെ നീക്കങ്ങൾ കോടതി കൃത്യമായി നിരീക്ഷിക്കുന്നുണ്ടെന്ന് ബെഞ്ച് മുന്നറിയിപ്പ് നൽകി. ഫേസ്ബുക്കിലും യൂട്യൂബിലും ഇവർ പങ്കുവെക്കുന്ന കാര്യങ്ങൾ കോടതി കാണുന്നില്ലെന്ന് ആരും കരുതേണ്ടതില്ലെന്നും ചീഫ് ജസ്റ്റിസ് വ്യക്തമാക്കി. തൊഴിലില്ലാത്ത ചില ചെറുപ്പക്കാർ നിയമരംഗത്ത് ഇടംപിടിക്കാനാകാതെ വരുമ്പോൾ പാറ്റകളെപ്പോലെ പെരുകുകയാണെന്ന് ചീഫ് ജസ്റ്റിസ് സൂര്യകാന്ത് നിരീക്ഷിച്ചു. ഇത്തരക്കാർ പിന്നീട് മാധ്യമപ്രവർത്തകരോ, സോഷ്യൽ മീഡിയ ഇൻഫ്ലുവൻസർമാരോ, ആർ.ടി.ഐ പ്രവർത്തകരോ ആയി മാറി എല്ലാവരെയും വ്യക്തിഹത്യ ചെയ്യാൻ ആരംഭിക്കുകയാണെന്ന് അദ്ദേഹം കുറ്റപ്പെടുത്തി.
ഡൽഹി കേന്ദ്രീകരിച്ച് പ്രവർത്തിക്കുന്ന ചില അഭിഭാഷകരുടെ എൽ.എൽ.ബി ബിരുദങ്ങളുടെ ആധികാരികതയിൽ തനിക്ക് കടുത്ത സംശയമുണ്ടെന്ന ഗുരുതരമായ വെളിപ്പെടുത്തലും ചീഫ് ജസ്റ്റിസ് നടത്തി. ഡൽഹിയിലെ പല അഭിഭാഷകരുടെയും നിയമ ബിരുദങ്ങളെക്കുറിച്ച് സി.ബി.ഐ അന്വേഷണത്തിന് ഉത്തരവിടാൻ അനുയോജ്യമായ ഒരു കേസിനായി താൻ കാത്തിരിക്കുകയാണെന്നും ചീഫ് ജസ്റ്റിസ് കൂട്ടിച്ചേർത്തു.
ഹർജിക്കാരനായ അഭിഭാഷകന് സുപ്രീം കോടതിയുടെ രൂക്ഷവിമർശനം
ഡൽഹി ഹൈക്കോടതി തനിക്ക് മുതിർന്ന അഭിഭാഷക പദവി നിഷേധിച്ചതിനെതിരെ ഒരു അഭിഭാഷകൻ നേരിട്ട് സമർപ്പിച്ച ഹർജി പരിഗണിക്കവെയാണ് കോടതി കൂടുതൽ കർശന നിലപാട് സ്വീകരിച്ചത്. ഇതേ ആവശ്യവുമായി മൂന്നാം തവണയാണ് താൻ സുപ്രീം കോടതിയെ സമീപിക്കുന്നതെന്ന് ഹർജിക്കാരൻ വ്യക്തമാക്കിയതോടെ ജസ്റ്റിസ് ജോയ്മാല്യ ബാഗ്ചി അടങ്ങുന്ന ബെഞ്ച് കടുത്ത അതൃപ്തി രേഖപ്പെടുത്തി. “ലോകത്തുള്ള ആർക്കുവേണമെങ്കിലും സീനിയർ പദവി ലഭിച്ചേക്കാം, പക്ഷേ എന്തായാലും നിങ്ങൾക്കത് ലഭിക്കില്ല” എന്ന് ചീഫ് ജസ്റ്റിസ് ചർച്ചയ്ക്കിടെ വ്യക്തമാക്കി. നിങ്ങളുടെ പ്രൊഫഷണൽ പെരുമാറ്റം കണക്കിലെടുത്ത് ഹൈക്കോടതി നിങ്ങൾക്ക് പദവി നൽകിയാൽ പോലും ഞങ്ങൾ അത് റദ്ദാക്കുമെന്നും കോടതി മുന്നറിയിപ്പ് നൽകി.
മുതിർന്ന അഭിഭാഷക പദവി എന്നത് കോടതികൾ ഭരണഘടനാനുസൃതമായി കൽപ്പിച്ചു നൽകേണ്ട ഒന്നാണെന്നും, അതിനായി ലോകത്തിന്റെ അവസാനം വരെ ആരും പിന്നാലെ നടന്ന് കേസ് കൊടുക്കേണ്ടതില്ലെന്നും ജസ്റ്റിസ് ജോയ്മാല്യ ബാഗ്ചി ഓർമ്മിപ്പിച്ചു. തുടർന്ന് ഹർജിക്കാരൻ ക്ഷമാപണം നടത്തുകയും ഹർജി പിൻവലിക്കാൻ അനുവാദം ചോദിക്കുകയും ചെയ്തതിനെ തുടർന്ന് കോടതി ഹർജി തള്ളി.
Story Summary
Chief Justice of India Surya Kant slammed activists and young lawyers targeting the judiciary on social media, terming them as “parasites.” The Supreme Court also expressed serious doubts about the authenticity of law degrees held by several Delhi advocates, hinting at a potential CBI probe.
