ന്യൂഡൽഹി: രണ്ട് മാസത്തിലേറെയായി തുടരുന്ന പശ്ചിമേഷ്യൻ യുദ്ധത്തിന് ശേഷം ആദ്യമായി ഇറാൻ വിദേശകാര്യ മന്ത്രി അബ്ബാസ് അരാഗ്ചി ഔദ്യോഗിക സന്ദർശനത്തിനായി ന്യൂഡൽഹിയിലെത്തി (Abbas Araghchi India Visit). ബ്രിക്സ് വിദേശകാര്യ മന്ത്രിമാരുടെ യോഗത്തിൽ പങ്കെടുക്കാനെത്തിയ അദ്ദേഹം ഇന്ത്യൻ വിദേശകാര്യ മന്ത്രി എസ്. ജയശങ്കറുമായി നിർണ്ണായകമായ ഉഭയകക്ഷി ചർച്ചകൾ നടത്തും.
യുദ്ധത്തിന്റെ തുടക്കത്തിൽ ഇറാാനിലെ മിനാബ് നഗരത്തിലെ സ്കൂളിന് നേരെയുണ്ടായ മിസൈൽ ആക്രമണത്തിൽ കൊല്ലപ്പെട്ട 168 പെൺകുട്ടികളുടെ സ്മരണാർത്ഥം ‘മിനാബ് 168’ (Minab168) എന്ന് പേരിട്ട വിമാനത്തിലാണ് അരാഗ്ചി ഇന്ത്യയിലെത്തിയത്. ഇത് ലോകത്തിന് നൽകുന്ന ശക്തമായ സന്ദേശമായി വിലയിരുത്തപ്പെടുന്നു. ഹോർമുസ് കടലിടുക്ക് ഇറാൻ ഭാഗികമായി അടച്ചതിനെത്തുടർന്നുണ്ടായ ആഗോള എണ്ണ പ്രതിസന്ധിയും കപ്പലുകളുടെ സുരക്ഷിതമായ സഞ്ചാരവുമാണ് ചർച്ചകളിലെ പ്രധാന വിഷയം.
ലോകത്തെ മൊത്തം എണ്ണ വിതരണത്തിന്റെ അഞ്ചിലൊന്ന് കടന്നുപോകുന്ന പാതയായ ഹോർമുസ് കടലിടുക്കിലെ തടസ്സങ്ങൾ നീക്കാൻ ഇന്ത്യ സമ്മർദ്ദം ചെലുത്തിയേക്കും. അതേസമയം, അമേരിക്കയുടെ ഏകപക്ഷീയമായ നടപടികളെ എതിർക്കുന്നതിനും സ്വതന്ത്ര വ്യാപാര ബന്ധങ്ങൾ ശക്തിപ്പെടുത്തുന്നതിനും ബ്രിക്സ് വേദിയെ ഉപയോഗിക്കുമെന്ന് ഇറാൻ വ്യക്തമാക്കി. യുഎഇയും ഇറാനും തമ്മിലുള്ള അഭിപ്രായവ്യത്യാസങ്ങൾ നിലനിൽക്കുന്നതിനാൽ, പശ്ചിമേഷ്യൻ സംഘർഷത്തിൽ ഒരു പൊതു തീരുമാനത്തിലെത്താൻ ബ്രിക്സ് രാജ്യങ്ങൾക്ക് കഴിയുമോ എന്നത് നയതന്ത്ര ലോകം ഉറ്റുനോക്കുന്നു.
Summary: Iranian Foreign Minister Abbas Araghchi arrived in New Delhi on the “Minab168” aircraft for the BRICS meeting. His talks with S. Jaishankar will focus on the closure of the Strait of Hormuz and global energy supply disruptions. Araghchi’s arrival in an aircraft named after 168 schoolgirls killed in the war serves as a symbolic reminder to the world.
