മുംബൈ: തനിക്ക് വ്യക്തിപരമായി താല്പര്യം ഗൗരവമേറിയ സിനിമകൾ സംവിധാനം ചെയ്യാനാണെന്നും എന്നാൽ മറ്റ് നിവൃത്തിയില്ലാത്തതിനാലാണ് കോമഡി സിനിമകൾ ചെയ്യുന്നതെന്നും സംവിധായകൻ പ്രിയദർശൻ (Priyadarshan). കോമഡി സിനിമകൾ ചെയ്യുന്ന സംവിധായകർക്ക് ചലച്ചിത്ര മേഖലയിൽ അർഹിക്കുന്ന ആദരവ് ലഭിക്കുന്നില്ലെന്നും അവരെ വെറും തമാശക്കാരായാണ് ഇൻഡസ്ട്രി കാണുന്നതെന്നും അദ്ദേഹം തുറന്നു പറഞ്ഞു. തന്റെ പുതിയ ചിത്രമായ ‘ഭൂത് ബംഗ്ല’യുടെ റിലീസിനോടനുബന്ധിച്ച് നൽകിയ അഭിമുഖത്തിലാണ് അദ്ദേഹം ഈ വെളിപ്പെടുത്തൽ നടത്തിയത്.
കോമഡി സിനിമകൾ തനിക്ക് വാണിജ്യ വിജയവും വലിയ ജനപ്രീതിയും നൽകിയിട്ടുണ്ടെങ്കിലും ഗൗരവമേറിയ സിനിമകൾ ചെയ്യുമ്പോഴാണ് തനിക്ക് സർഗ്ഗാത്മകമായ സംതൃപ്തി ലഭിക്കുന്നതെന്ന് പ്രിയദർശൻ പറഞ്ഞു.
“ഗൗരവമേറിയ സിനിമകൾ ഷൂട്ട് ചെയ്യാനാണ് എനിക്ക് ഇഷ്ടം. കോമഡി സിനിമകൾ ചെയ്യാൻ താല്പര്യമില്ല. പക്ഷേ എനിക്ക് മറ്റ് വഴികളില്ല. നിങ്ങൾ കോമഡി സിനിമകൾ ചെയ്യുമ്പോൾ നിങ്ങളെ ഒരിക്കലും ഒരു മികച്ച സംവിധായകനായി സിനിമാ ലോകം അംഗീകരിക്കില്ല. എന്നാൽ ഗൗരവമേറിയ സിനിമകൾ ചെയ്യുമ്പോൾ നിങ്ങൾക്ക് ആദരവ് ലഭിക്കുന്നു. എന്തുകൊണ്ടാണ് ഒരു കോമഡി സംവിധായകനെ മികച്ച ചലച്ചിത്രകാരനായി അംഗീകരിക്കാത്തത് എന്നത് എന്നെ സംബന്ധിച്ച് വേദനാജനകമാണ്.” – പ്രിയദർശൻ പറഞ്ഞു.
ഓസ്കാർ പോലുള്ള വലിയ പുരസ്കാര വേദികളിൽ പോലും കോമഡി സിനിമകൾക്ക് അർഹിക്കുന്ന സ്ഥാനം ലഭിക്കാറില്ലെന്നും ഇത് ആഗോളതലത്തിലുള്ള ഒരു യാഥാർത്ഥ്യമാണെന്നും അദ്ദേഹം കൂട്ടിച്ചേർത്തു.
1982-ൽ സിനിമാ ജീവിതം തുടങ്ങിയ പ്രിയദർശൻ മലയാളം, ഹിന്ദി ഉൾപ്പെടെയുള്ള ഭാഷകളിൽ 98-ഓളം ചിത്രങ്ങൾ സംവിധാനം ചെയ്തിട്ടുണ്ട്. ‘കാലാപാനി’, ‘കാഞ്ചീവരം’ തുടങ്ങിയ ഗൗരവമേറിയ സിനിമകളിലൂടെ അദ്ദേഹം ദേശീയ പുരസ്കാരങ്ങൾ നേടിയിട്ടുണ്ടെങ്കിലും, കോമഡി ഹിറ്റുകളുടെ പേരിലാണ് അദ്ദേഹം വ്യാപകമായി അറിയപ്പെടുന്നത്. സെയ്ഫ് അലി ഖാൻ നായകനാകുന്ന ‘ഹൈവാൻ’ ആണ് അദ്ദേഹത്തിന്റെ വരാനിരിക്കുന്ന മറ്റൊരു ചിത്രം.
