ന്യൂയോർക്ക്: വെനീസിൽ നിന്ന് ന്യൂയോർക്കിലേക്ക് വന്ന യുണൈറ്റഡ് എയർലൈൻസ് വിമാനം ലാൻഡിങ്ങിനിടെ ഹൈവേയിലെ പോസ്റ്റിലും ട്രക്കിലും ഇടിച്ചു. ന്യൂജേഴ്സിയിലെ നെവാർക്ക് ലിബർട്ടി അന്താരാഷ്ട്ര വിമാനത്താവളത്തിന് സമീപമുള്ള ഹൈവേയിലാണ് ഞായറാഴ്ച ഉച്ചയോടെ സിനിമാ സ്റ്റൈലിനെ അനുസ്മരിപ്പിക്കുന്ന അപകടം നടന്നത്. 200-ലധികം യാത്രക്കാരും 10 ജീവനക്കാരുമുണ്ടായിരുന്ന ബോയിംഗ് 767 വിമാനം തലനാരിഴയ്ക്കാണ് വലിയൊരു ദുരന്തത്തിൽ നിന്ന് രക്ഷപ്പെട്ടത്.(United Airlines Flight Hits Truck During Landing At Newark Airport)
റൺവേയിലേക്ക് താഴ്ന്നിറങ്ങുന്നതിനിടെ വിമാനത്തിന്റെ ലാൻഡിങ് ഗിയറിലെ ടയറും വിമാനത്തിന്റെ അടിഭാഗവും സമീപത്തെ ഹൈവേയിലെ വൈദ്യുതി പോസ്റ്റിലും പിന്നാലെ അതുവഴി പോയ ചരക്ക് ലോറിയിലും ഇടിക്കുകയായിരുന്നു. വിമാനം തട്ടിയ പോസ്റ്റ് തെറിച്ച് സമീപത്തെ ഒരു ജീപ്പിലേക്കും വീണു.
ലോറി ഡ്രൈവർ പാട്ട് പാടി വാഹനം ഓടിക്കുന്നതിനിടെയാണ് വിമാനത്തിന്റെ ലാൻഡിങ് ടയർ ഗ്ലാസ് തകർത്ത് ഉള്ളിലേക്ക് വരുന്നത്. ഇതിന്റെ ഞെട്ടിക്കുന്ന ദൃശ്യങ്ങൾ ലോറിയിലെ ഡാഷ്ബോർഡ് ക്യാമറയിൽ പതിഞ്ഞിട്ടുണ്ട്. ബാൾട്ടിമോർ സ്വദേശിയായ വാറൻ ബോർഡ്ലിയാണ് ലോറി ഓടിച്ചിരുന്നത്. വിമാനത്തിന്റെ എൻജിൻ ശബ്ദം പെട്ടെന്ന് വർദ്ധിക്കുന്നത് കേട്ട് ഡ്രൈവർ പരിഭ്രമിക്കുന്നതും അടുത്ത നിമിഷം ഗ്ലാസ് ചില്ലുകൾ തകർന്നു തെറിക്കുന്നതും വീഡിയോയിലുണ്ട്. പരിക്കേറ്റ ഇദ്ദേഹത്തെ ഉടൻ ആശുപത്രിയിൽ പ്രവേശിപ്പിച്ചു.
ട്രക്കിലും പോസ്റ്റിലും ഇടിച്ചത് വിമാനത്തിലുണ്ടായിരുന്ന പൈലറ്റുമാരോ എയർ ട്രാഫിക് കൺട്രോൾ റൂമിലോ ഉള്ളവർ അറിഞ്ഞില്ല എന്നതാണ് അമ്പരപ്പിക്കുന്ന വസ്തുത. വിമാനം സാധാരണ നിലയിൽ ലാൻഡ് ചെയ്യുകയും യാത്രക്കാർ സുരക്ഷിതമായി പുറത്തിറങ്ങുകയും ചെയ്തു. ലാൻഡിങ്ങിന് അരമണിക്കൂറിന് ശേഷം റൺവേ പരിശോധിക്കുന്നതിനിടെയാണ് വിമാനത്തിന്റെ വശത്ത് ഒരു വലിയ സുഷിരം കണ്ടെത്തിയത്. ഇതോടെയാണ് ഗൗരവകരമായ അപകടം നടന്ന കാര്യം പുറത്തറിയുന്നത്. അപകടത്തെ തുടർന്ന് വിമാനത്തിലെ ജീവനക്കാരെ അന്വേഷണം കഴിയുന്നത് വരെ സർവീസിൽ നിന്ന് നീക്കി. സംഭവത്തിൽ ഫെഡറൽ ഏവിയേഷൻ അഡ്മിനിസ്ട്രേഷനും നാഷണൽ ട്രാൻസ്പോർട്ടേഷൻ സേഫ്റ്റി ബോർഡും അന്വേഷണം ആരംഭിച്ചിട്ടുണ്ട്.
Story Summary
A United Airlines Boeing 767 landing at Newark Airport struck a streetlight and a tractor-trailer on a nearby highway. While the truck driver sustained non-life-threatening injuries, all 210 people on board the aircraft landed safely without realizing the collision had occurred.
