ബൊഗോട്ട: കൊളംബിയൻ ലഹരിമരുന്ന് രാജാവ് പാബ്ലോ എസ്കോബാർ 1980-കളിൽ തന്റെ സ്വകാര്യ മൃഗശാലയ്ക്കായി നിയമവിരുദ്ധമായി രാജ്യത്ത് എത്തിച്ച ‘കൊക്കെയ്ൻ ഹിപ്പോകളുടെ’ എണ്ണം അനിയന്ത്രിതമായി വർധിക്കുന്നത് വലിയ പ്രതിസന്ധി സൃഷ്ടിക്കുന്നു ( Pablo Escobar Cocaine Hippos). മഗ്ദലീന നദീതീരത്ത് ഏകദേശം 200-ഓളം എണ്ണമുള്ള ഇവയിൽ 80 ഹിപ്പോകളെ ദയാവധം ചെയ്യാൻ കൊളംബിയൻ സർക്കാർ പദ്ധതിയിടുന്നതായാണ് റിപ്പോർട്ടുകൾ. ഈ തീരുമാനം പരിസ്ഥിതി പ്രവർത്തകർക്കിടയിലും പ്രാദേശിക ജനവിഭാഗങ്ങൾക്കിടയിലും വലിയ രീതിയിലുള്ള ഭിന്നതയ്ക്ക് കാരണമായിട്ടുണ്ട്.
കൺട്രോൾ നടപടികൾ സ്വീകരിച്ചില്ലെങ്കിൽ 2035-ഓടെ ഇവയുടെ എണ്ണം ആയിരത്തിലെത്തുമെന്ന് പരിസ്ഥിതി മന്ത്രാലയം മുന്നറിയിപ്പ് നൽകുന്നു. നദിയിൽ മത്സ്യബന്ധനം നടത്തുന്നവർക്കും പ്രദേശവാസികൾക്കും ഇവ വലിയ ഭീഷണിയാണ് ഉയർത്തുന്നത്. എന്നാൽ, അക്രമത്തിന്റെ ചരിത്രമുള്ള കൊളംബിയ ലഹരിമാഫിയയുടെ പരാജയങ്ങളിൽ നിന്ന് ഉടലെടുത്ത ഈ പ്രശ്നത്തെ ജീവനെടുത്തല്ല, മറിച്ച് ധാർമ്മികവും അഹിംസാത്മകവുമായ മാർഗ്ഗങ്ങളിലൂടെയാണ് പരിഹരിക്കേണ്ടതെന്ന് ഗ്രീൻ പാർട്ടി സെനറ്റർ ആൻഡ്രിയ പഡില്ല ഉൾപ്പെടെയുള്ള പരിസ്ഥിതി നേതാക്കൾ വാദിക്കുന്നു.
ഇതിനിടെ, ഏഷ്യയിലെ ഏറ്റവും വലിയ ധനികനായ മുകേഷ് അംബാനിയുടെ മകൻ അനന്ത് അംബാനിയുടെ ഉടമസ്ഥതയിലുള്ള ‘വന്താര’ വൈൽഡ് ലൈഫ് സെന്ററിൽ നിന്നുള്ള വിദഗ്ധരും മൃഗഡോക്ടർമാരും കൊളംബിയ സന്ദർശിക്കുമെന്ന് പരിസ്ഥിതി മന്ത്രാലയം സ്ഥിരീകരിച്ചു. ഇതിൽ 80 ഹിപ്പോകളെ ഇന്ത്യയിലേക്ക് മാറ്റുന്നതിനുള്ള സാധ്യതകൾ വിലയിരുത്താനാണ് വന്താര സംഘത്തിന്റെ സന്ദർശനം. പ്രാദേശികമായി ടൂറിസം മേഖലയ്ക്ക് ഹിപ്പോകൾ സഹായകരമാകുന്നുണ്ടെങ്കിലും ജനങ്ങളുടെ സുരക്ഷ മുൻനിർത്തി ദയാവധം അനിവാര്യമാണെന്നാണ് ഒരു വിഭാഗം ജനങ്ങളുടെ നിലപാട്.
Summary: Colombia plans to euthanize 80 hippopotamuses descended from animals illegally imported by drug lord Pablo Escobar in the 1980s. The soaring population of about 200 hippos near the Magdalena River has caused severe safety concerns among local fishermen and residents. While environmentalists urge non-lethal solutions, experts from Anant Ambani’s Vantara wildlife center are set to visit Colombia to assess transferring 80 hippos to India.
