ഓസ്ലോ: നോർവേ കിരീടാവകാശി മെറ്റ്-മാരിറ്റിന്റെ മകൻ മരിയസ് ബോർഗ് ഹോയിബിക്ക് നാല് വർഷം തടവ് ശിക്ഷ വിധിച്ച് ഓസ്ലോയിലെ കോടതി. ബലാത്സംഗം ഉൾപ്പെടെയുള്ള ഗുരുതരമായ കുറ്റകൃത്യങ്ങളിൽ കുറ്റക്കാരനാണെന്ന് കണ്ടെത്തിയതിനെത്തുടർന്നാണ് വിധി. ശിക്ഷാവിധിക്ക് പുറമെ, ഇരകളിൽ ഒരാളോട് രണ്ട് വർഷത്തേക്ക് അടുക്കാൻ പാടില്ലെന്നും കോടതി ഉത്തരവിട്ടു.(Marius Borg Hoiby son of Norwegian Crown Princess sentenced to four years in prison)
നാല് വ്യത്യസ്ത ബലാത്സംഗ കേസുകൾ ഉൾപ്പെടെ 40 ഓളം കുറ്റങ്ങളാണ് ഹോയിബിക്കെതിരെ ചുമത്തിയിരുന്നത്. ഇതിൽ രണ്ട് ബലാത്സംഗ കേസുകളിൽ അദ്ദേഹം കുറ്റക്കാരനാണെന്ന് കോടതി കണ്ടെത്തി. മുൻ കാമുകി നോറ ഹോക്ക്ലാൻഡിനെ ആക്രമിച്ചതും ഇതിൽ ഉൾപ്പെടുന്നു. മറ്റ് രണ്ട് ബലാത്സംഗ കേസുകളിൽ നിന്ന് അദ്ദേഹത്തെ കോടതി വെറുതെ വിട്ടു.
തനിക്കെതിരെയുള്ള ഏറ്റവും ഗുരുതരമായ ആരോപണങ്ങൾ ഹോയിബി നിഷേധിച്ചിരുന്നു. ചെറിയ കുറ്റങ്ങൾ മാത്രമാണ് അദ്ദേഹം സമ്മതിച്ചത്. പ്രോസിക്യൂഷൻ ഏഴ് വർഷത്തിലധികം തടവ് ആവശ്യപ്പെട്ടപ്പോൾ, പ്രതിഭാഗം 18 മാസത്തിൽ താഴെ മാത്രം ശിക്ഷ മതിയെന്നാണ് വാദിച്ചത്. ആരോഗ്യകാരണങ്ങളാൽ വീഡിയോ ലിങ്ക് വഴിയാണ് ഹോയിബി കോടതി നടപടികളിൽ പങ്കെടുത്തത്. ഈ വിധിയിൽ അപ്പീൽ നൽകാൻ അദ്ദേഹത്തിന് അവസരമുണ്ട്.
കിരീടാവകാശി മെറ്റ്-മാരിറ്റിന്റെ ഗുരുതരമായ ആരോഗ്യപ്രശ്നങ്ങളും ശ്വാസകോശ മാറ്റിവെക്കൽ ശസ്ത്രക്രിയയ്ക്കായുള്ള കാത്തിരിപ്പും അടക്കം വലിയ പ്രതിസന്ധികളിലൂടെയാണ് നിലവിൽ നോർവീജിയൻ രാജകുടുംബം കടന്നുപോകുന്നത്. ഈ സാഹചര്യത്തിൽ നടന്ന വിചാരണ അന്താരാഷ്ട്ര തലത്തിൽ വലിയ ശ്രദ്ധയാകർഷിച്ചിരുന്നു.
Story Summary
Marius Borg Høiby, the son of Norway’s Crown Princess Mette-Marit, has been sentenced to four years in prison by an Oslo court for offenses including two counts of rape and assault. The high-profile trial concluded with the conviction, although Høiby was acquitted of two other rape charges and can still appeal the verdict.
