വിദേശ രാജ്യങ്ങളിൽ നിന്നുള്ള കുറ്റവാളികളെ വേഗത്തിൽ നാടുകടത്തുന്നതിനും, അവരുടെ പൗരത്വം എളുപ്പത്തിൽ റദ്ദാക്കുന്നതിനുമുള്ള കരട് ബിൽ ഇറ്റലിയിൽ അവതരിപ്പിച്ചു. പ്രധാനമന്ത്രി ജോർജിയ മെലോനിയുടെ നേതൃത്വത്തിലുള്ള ‘ബ്രദേഴ്സ് ഓഫ് ഇറ്റലി’ പാർട്ടി ബുധനാഴ്ച പാർലമെന്റിലാണ് പുതിയ നിർദ്ദേശം സമർപ്പിച്ചത് (Italy Deportation Bill). യൂറോപ്യൻ യൂണിയനിൽ പെടാത്തവരും ഒരു വർഷത്തിലധികം തടവുശിക്ഷ ലഭിച്ചവരുമായ മുഴുവൻ വിദേശ പൗരന്മാരെയും അവരുടെ മാതൃരാജ്യങ്ങളിലേക്ക് തിരിച്ചയക്കാനാണ് ബിൽ ലക്ഷ്യമിടുന്നത്.
ഇക്കാര്യത്തിൽ കുറ്റവാളികളുടെ സമ്മതം ആവശ്യമില്ലെന്നും, വിവിധ രാജ്യങ്ങളുമായി ഉഭയകക്ഷി കരാറുകൾ ഉണ്ടാക്കി നാടുകടത്തൽ നടപടികൾ വേഗത്തിലാക്കുമെന്നും പാർട്ടി അംഗങ്ങൾ വാർത്താസമ്മേളനത്തിൽ വ്യക്തമാക്കി. സ്വന്തം നാട്ടിലേക്ക് മടക്കിയാൽ പീഡനമോ വധശിക്ഷയോ നേരിടേണ്ടി വരുമെന്ന് തെളിയിക്കുന്നവർക്ക് മാത്രമായിരിക്കും നാടുകടത്തലിനെതിരെ അപ്പീൽ നൽകാൻ അനുവാദമുണ്ടാവുക. ഒരിക്കൽ നാടുകടത്തപ്പെട്ടാൽ ഇവർക്ക് പിന്നീട് ഇറ്റലിയിലേക്ക് മടങ്ങാൻ സാധിക്കില്ല. കൂടാതെ, വിദേശത്ത് ജനിച്ച കുറ്റവാളികളുടെ ഇറ്റാലിയൻ പൗരത്വം റദ്ദാക്കുന്നതിനുള്ള കുറ്റകൃത്യങ്ങളുടെ പരിധിയും ഈ ബില്ലിലൂടെ വിപുലീകരിക്കുന്നുണ്ട്.
അടുത്ത വർഷം നടക്കാനിരിക്കുന്ന പാർലമെന്റ് തിരഞ്ഞെടുപ്പിന് മുന്നോടിയായി, കുടിയേറ്റ വിരുദ്ധ നിലപാട് കൂടുതൽ കർശനമാക്കാനാണ് ഭരണസഖ്യത്തിന്റെ നീക്കം. സഖ്യകക്ഷിയായ ‘ലീഗ്’ പാർട്ടിയും പൗരത്വ നിയമങ്ങൾ കൂടുതൽ കർശനമാക്കുന്നതിനുള്ള നിർദ്ദേശങ്ങൾ പാർലമെന്റിൽ ചർച്ച ചെയ്യുന്നുണ്ട്. ഇറ്റലിയിലെ ജനങ്ങൾക്കിടയിൽ സ്വാധീനം ചെലുത്തുന്ന പുതിയ തീവ്ര-വലതുപക്ഷ പ്രസ്ഥാനമായ ‘ഫ്യൂച്ചുറോ നാഷനാലെ’ ഉയർത്തുന്ന വെല്ലുവിളികൾ നേരിടാൻ കൂടിയാണ് മെലോനി സർക്കാർ ഇത്തരമൊരു കടുത്ത തീരുമാനത്തിലേക്ക് എത്തിയിരിക്കുന്നത്.
Summary: Italian Prime Minister Giorgia Meloni’s Brothers of Italy party has introduced a draft bill aimed at the swift deportation of non-EU foreign offenders sentenced to over one year in prison. The proposal, which also seeks to make it easier to revoke the Italian citizenship of foreign-born offenders, comes as the government faces increasing pressure from emerging far-right movements ahead of next year’s parliamentary elections.
