ടെഹ്റാൻ: അമേരിക്ക ഇറാനെതിരായ വ്യോമാക്രമണങ്ങൾ നിർത്തുന്നിടത്തോളം കാലം തങ്ങളും തിരിച്ചടികൾ അവസാനിപ്പിക്കുമെന്ന് ഇറാൻ. മുതിർന്ന ഇറാനിയൻ ഉദ്യോഗസ്ഥനെ ഉദ്ധരിച്ച് റോയിട്ടേഴ്സാണ് ഇക്കാര്യം റിപ്പോർട്ട് ചെയ്തത് (Iran US conflict). അമേരിക്കൻ പ്രസിഡന്റ് ഡൊണാൾഡ് ട്രംപ് നയതന്ത്ര ചർച്ചകൾക്ക് കൂടുതൽ സമയം നൽകാനായി ആക്രമണങ്ങൾ താൽക്കാലികമായി നിർത്തിവെച്ചതിന് പിന്നാലെയാണ് ഇറാന്റെ പ്രതികരണം. കഴിഞ്ഞ 13 ദിവസമായി തുടർച്ചയായി നടന്ന അമേരിക്കൻ വ്യോമാക്രമണങ്ങൾക്കൊടുവിൽ വെള്ളിയാഴ്ച രാത്രിയോടെയാണ് പെന്റഗൺ ആക്രമണങ്ങൾ നിർത്തിവെച്ചത്. ശനിയാഴ്ചയും ഞായറാഴ്ചയും അമേരിക്കയുടെ ഭാഗത്ത് നിന്ന് പുതിയ ആക്രമണങ്ങൾ റിപ്പോർട്ട് ചെയ്തിട്ടില്ല. ഇതേ കാലയളവിൽ, അമേരിക്കൻ സൈനിക താവളങ്ങളുള്ള സമീപ ഗൾഫ് രാജ്യങ്ങളെ ലക്ഷ്യമിട്ട് നടത്തിയിരുന്ന ഇറാന്റെ ആക്രമണങ്ങളും രണ്ട് ദിവസമായി നിലച്ചിരിക്കുകയാണ്.
“ആക്രമണത്തിന് ആക്രമണം” എന്ന നിലപാടിൽ യാതൊരു മാറ്റവുമില്ലെന്ന് പേര് വെളിപ്പെടുത്താത്ത ഇറാനിയൻ ഉദ്യോഗസ്ഥൻ പറഞ്ഞു. അമേരിക്ക ആക്രമണം അവസാനിപ്പിച്ചാൽ ഇറാനും സൈനിക നടപടികൾ അവസാനിപ്പിക്കുമെന്നും ഈ സന്ദേശം ഇതിനകം തന്നെ അമേരിക്കയെ അറിയിച്ചിട്ടുണ്ടെന്നും അദ്ദേഹം വ്യക്തമാക്കി.
അതേസമയം, ഐക്യരാഷ്ട്രസഭയിലെ അമേരിക്കൻ അംബാസഡർ മൈക്ക് വാൾട്സ്, നയതന്ത്ര ചർച്ചകൾക്ക് കൂടുതൽ അവസരം നൽകാനാണ് ട്രംപ് സൈനിക നടപടികൾ താൽക്കാലികമായി നിർത്തിവെച്ചതെന്ന് പ്രതികരിച്ചു. ചർച്ചകൾക്ക് ആവശ്യമായ ഇടം നൽകുകയാണ് ലക്ഷ്യമെന്നും അദ്ദേഹം അമേരിക്കൻ മാധ്യമങ്ങളോട് പറഞ്ഞു.
അമേരിക്കൻ സൈനിക വൃത്തങ്ങൾ പറയുന്നതനുസരിച്ച്, ഹോർമുസ് കടലിടുക്കിൽ കപ്പൽ ഗതാഗതത്തിന് നേരെയുള്ള ഭീഷണികളെ ചെറുക്കാനായി കഴിഞ്ഞ രണ്ടാഴ്ചയായി നടത്തിയ വ്യോമാക്രമണങ്ങളിൽ മുൻകൂട്ടി നിശ്ചയിച്ചിരുന്ന ഭൂരിഭാഗം ലക്ഷ്യങ്ങളും ആക്രമിക്കപ്പെട്ടിട്ടുണ്ട്. കൂടാതെ മധ്യപൂർവേഷ്യയിലെ അമേരിക്കൻ വ്യോമ പ്രതിരോധ സംവിധാനങ്ങൾ ഉപയോഗിക്കുന്ന മിസൈലുകളുടെ ശേഖരം കുറയുന്നതും ആശങ്കയുണ്ടാക്കിയെന്നാണ് റിപ്പോർട്ടുകൾ.
ജോയിന്റ് ചീഫ്സ് ഓഫ് സ്റ്റാഫ് ചെയർമാൻ ജനറൽ ഡാൻ കെയ്ൻ, ആക്രമണങ്ങൾ പുനരാരംഭിച്ചാൽ ആയുധശേഖരത്തെ അത് കൂടുതൽ ബാധിക്കാമെന്ന് ട്രംപിനെ സ്വകാര്യമായി അറിയിച്ചതായും അമേരിക്കൻ ഉദ്യോഗസ്ഥർ സൂചിപ്പിച്ചു. എന്നാൽ അമേരിക്കൻ സൈന്യത്തിന് ആവശ്യമായ സൈനിക ശേഷി ഇപ്പോഴും ലഭ്യമാണെന്ന് മൈക്ക് വാൾട്സ് അവകാശപ്പെട്ടു. ഇതിനിടെ, നിലവിലെ ശാന്താവസ്ഥയെക്കുറിച്ച് ഇറാനിൽ വലിയ പ്രതീക്ഷയില്ലെന്നാണ് മറ്റൊരു മുതിർന്ന ഇറാനിയൻ വൃത്തത്തിന്റെ പ്രതികരണം. ആക്രമണം താൽക്കാലികമായി നിർത്തിയത് യഥാർഥ സമാധാന ശ്രമത്തിന്റെ ഭാഗമല്ലെന്നും തന്ത്രപരമായ നീക്കമായിരിക്കാമെന്നുമാണ് തെഹ്റാനിലെ വിലയിരുത്തൽ. അമേരിക്കയുടെ മുൻകാല നിലപാടുകളെ തുടർന്ന് വിശ്വാസത്തേക്കാൾ സംശയമാണ് നിലവിലുള്ളതെന്നും അദ്ദേഹം പറഞ്ഞു.
ഹോർമുസ് കടലിടുക്ക് ആഗോള എണ്ണവ്യാപാരത്തിലെ ഏറ്റവും നിർണായകമായ സമുദ്രപാതകളിലൊന്നാണ്. യുദ്ധം രൂക്ഷമായതോടെ ആ പാതയിലൂടെയുള്ള കപ്പൽഗതാഗതം വലിയ തിരിച്ചടിയാണ് നേരിട്ടത്. നിലവിലെ ആക്രമണവിരാമം എത്രകാലം തുടരുമെന്നത് വ്യക്തമല്ലെങ്കിലും, അമേരിക്കയും ഇറാനും തമ്മിലുള്ള നയതന്ത്ര ചർച്ചകൾക്ക് ഇത് പുതിയ അവസരം ഒരുക്കുമോയെന്നാണ് അന്താരാഷ്ട്ര സമൂഹം ഉറ്റുനോക്കുന്നത്.
Summary: Iran has said it will suspend its retaliatory attacks as long as the United States maintains its pause in airstrikes. While Washington says the halt is intended to create space for diplomacy, Tehran remains cautious and views the pause with skepticism.
