കോപ്പൻഹേഗൻ: ഡെന്മാർക്കിൽ മാസങ്ങൾ നീണ്ടുനിന്ന രാഷ്ട്രീയ അനിശ്ചിതത്വങ്ങൾക്കൊടുവിൽ സോഷ്യൽ ഡെമോക്രാറ്റിക് പാർട്ടി നേതാവ് മെറ്റെ ഫ്രെഡറിക്സൺ പുതിയ മധ്യ-ഇടതുപക്ഷ സഖ്യ സർക്കാർ രൂപീകരിക്കാൻ ഔദ്യോഗികമായി ധാരണയിലെത്തി (Denmark Prime Minister Mette Frederiksen). ഗ്രീൻലാൻഡിന്റെ ഭാവിയെച്ചൊല്ലി അമേരിക്കൻ പ്രസിഡന്റ് ഡൊണാൾഡ് ട്രംപുമായി നയതന്ത്ര തർക്കങ്ങൾ നിലനിൽക്കുന്ന പശ്ചാത്തലത്തിലാണ് 48-കാരിയായ ഫ്രെഡറിക്സൺ ഡെന്മാർക്കിന്റെ പ്രധാനമന്ത്രിയായി തുടർച്ചയായ മൂന്നാമത്തെ തവണയും അധികാരം നിലനിർത്തുന്നത്.
കടുത്ത സാമ്പത്തിക പ്രതിസന്ധിയും വിലക്കയറ്റവും മുൻനിർത്തി കഴിഞ്ഞ മാർച്ച് 24-ന് നടന്ന പൊതുതിരഞ്ഞെടുപ്പിൽ ഭരണകക്ഷിയായ മധ്യപക്ഷ സഖ്യത്തിന് ഭൂരിപക്ഷം നഷ്ടപ്പെട്ടിരുന്നു. എങ്കിലും 179 അംഗ പാർലമെന്റിൽ 38 സീറ്റുകൾ നേടി സോഷ്യൽ ഡെമോക്രാറ്റിക് പാർട്ടി തന്നെയായിരുന്നു ഏറ്റവും വലിയ ഒറ്റക്കക്ഷി. പുതിയ മന്ത്രിസഭ രൂപീകരിക്കുന്നതുമായി ബന്ധപ്പെട്ട് ഡെന്മാർക്ക് രാജാവുമായി കൂടിക്കാഴ്ച നടത്തിയ ശേഷമാണ് നീണ്ട ചർച്ചകൾക്കൊടുവിൽ സർക്കാർ രൂപീകരണം സാധ്യമായതായി ഫ്രെഡറിക്സൺ മാധ്യമങ്ങളെ അറിയിച്ചത്. തിരഞ്ഞെടുപ്പിന് ശേഷം സോഷ്യൽ ഡെമോക്രാറ്റുകളും വലതുപക്ഷ ലിബറലുകളും പുതിയ സർക്കാരിനെ നയിക്കാൻ രണ്ട് മാസത്തിലേറെയായി കടുത്ത അവകാശവാദങ്ങൾ ഉന്നയിച്ചിരുന്നെങ്കിലും, ഒടുവിൽ ഫ്രെഡറിക്സൺ മറ്റ് ചെറുപാർട്ടികളുടെ പിന്തുണ വിജയകരമായി ഉറപ്പാക്കുകയായിരുന്നു.
സോഷ്യൽ ഡെമോക്രാറ്റുകൾക്ക് പുറമെ സോഷ്യൽ ലിബറൽസ്, ലെഫ്റ്റ് ഗ്രീൻസ്, മോഡറേറ്റ്സ് എന്നീ പാർട്ടികൾ ഉൾപ്പെടുന്നതാണ് പുതിയ ന്യൂനപക്ഷ സഖ്യ സർക്കാർ. പാർലമെന്റിൽ ഭൂരിപക്ഷം തെളിയിക്കാൻ ഇവർ പ്രധാനമായും തീവ്ര ഇടതുപക്ഷ കൂട്ടായ്മയായ റെഡ്-ഗ്രീൻ അലയൻസിന്റെ പിന്തുണയെയാണ് ആശ്രയിക്കുന്നത്. കഴിഞ്ഞ നാല് വർഷമായി വലതുപക്ഷ ലിബറലുകളുമായി ചേർന്ന് രൂപീകരിച്ച അസാധാരണമായ ഇടത്-വലത് സഖ്യ സർക്കാരിൽ നിന്നും പൂർണ്ണമായും മാറി, ഫ്രെഡറിക്സന്റെ രാഷ്ട്രീയ നയങ്ങൾ ഇനി കൂടുതൽ ഇടതുപക്ഷത്തേക്ക് ചായുന്നതിന്റെ സൂചനയാണ് പുതിയ മന്ത്രിസഭാ രൂപീകരണം വ്യക്തമാക്കുന്നത്.
ഡെന്മാർക്കിലെ ജനങ്ങൾക്കും വരുംതലമുറയ്ക്കും ഒപ്പം മൃഗങ്ങളുടെ ക്ഷേമത്തിനും മുൻഗണന നൽകുന്ന മികച്ചൊരു ഭരണഘടനയായിരിക്കും പുതിയ സർക്കാരിന്റേതെന്ന് മെറ്റെ ഫ്രെഡറിക്സൺ വ്യക്തമാക്കി. ഇക്കഴിഞ്ഞ തിരഞ്ഞെടുപ്പ് പ്രചാരണ വേളയിൽ മൃഗസംരക്ഷണവും വലിയൊരു ചർച്ചാവിഷയമായിരുന്നു. പുതിയ സർക്കാരിന്റെ ഔദ്യോഗിക നയപ്രഖ്യാപനം ചൊവ്വാഴ്ചയും മന്ത്രിമാരുടെ പേരുകൾ ബുധനാഴ്ചയും പ്രഖ്യാപിക്കും. ഗ്രീൻലാൻഡ് കൂട്ടിച്ചേർക്കുമെന്ന ഡൊണാൾഡ് ട്രംപിന്റെ ഭീഷണിയെ പ്രതിരോധിക്കാനുള്ള നയതന്ത്ര ചർച്ചകൾക്ക് പുറമെ, യുക്രെയ്ൻ-റഷ്യ യുദ്ധത്തിന്റെ പശ്ചാത്തലത്തിൽ യൂറോപ്പിലെ സുരക്ഷാ ഭീഷണികൾ കണക്കിലെടുത്ത് ഡെന്മാർക്കിന്റെ സൈനിക ശക്തി അതിവേഗം വർദ്ധിപ്പിക്കുക എന്നതുമാണ് പുതിയ സർക്കാരിന് മുന്നിലുള്ള അടിയന്തിര കടമകൾ.
Summary: Denmark’s Social Democratic leader Mette Frederiksen has secured a third consecutive term as prime minister after agreeing to form a new centre-left minority coalition government. The deal ends months of political uncertainty following the March 24 election, in which her previous centrist coalition lost its majority due to a cost-of-living crisis. The new government, pivoting further to the left, faces immediate challenges including diplomatic talks regarding Greenland with US President Donald Trump and boosting Denmark’s military defenses amid regional tensions.
