കുട്ടികൾക്കും മുതിർന്നവർക്കും ഒരുപോലെ പ്രിയപ്പെട്ട ഒരു ഏഷ്യൻ വിഭവമാണ് ചിക്കൻ മോമോസ്. പുറത്തുനിന്നു വാങ്ങി കഴിക്കുന്നതിനേക്കാൾ ആരോഗ്യകരമായ രീതിയിൽ ഇത് എളുപ്പത്തിൽ വീട്ടിൽ തന്നെ തയ്യാറാക്കാൻ സാധിക്കും. (Homemade Chicken Momos)
ആവശ്യമായ ചേരുവകൾ
മൈദ – ഒന്നര കപ്പ്
എണ്ണ – 1 ടീസ്പൂൺ (ആവശ്യമെങ്കിൽ)
ഉപ്പ് – ആവശ്യത്തിന്
വെള്ളം – ആവശ്യത്തിന് (അര മുതൽ മുക്കാൽ കപ്പ് വരെ)
ചിക്കൻ ഫില്ലിംഗ് തയ്യാറാക്കാൻ :
എല്ലില്ലാത്ത ചിക്കൻ ബ്രെസ്റ്റ് – 250 ഗ്രാം
സവാള – 1 വലുത് (പൊടിയായി അരിഞ്ഞത്)
കാരറ്റ് – 1 ചെറുത് (പൊടിയായി അരിഞ്ഞത്)
പച്ചമുളക് – 2 അല്ലെങ്കിൽ 3 എണ്ണം (പൊടിയായി അരിഞ്ഞത്)
ഇഞ്ചി – ഒരു ചെറിയ കഷണം (പൊടിയായി അരിഞ്ഞത്)
വെളുത്തുള്ളി – 4 മുതൽ 6 അല്ലി (പൊടിയായി അരിഞ്ഞത്)
മല്ലിയില – ഒരു പിടി (പൊടിയായി അരിഞ്ഞത്)
സ്പ്രിങ് ഒണിയൻ – 5 അല്ലെങ്കിൽ 6 തണ്ട് (പൊടിയായി അരിഞ്ഞത്)
കുരുമുളക് പൊടി– അര ടീസ്പൂൺ
സോയ സോസ് – 1 ടീസ്പൂൺ
വിനാഗിരി– 1 ടീസ്പൂൺ
എണ്ണ– 1 ടീസ്പൂൺ
ഉപ്പ് – ആവശ്യത്തിന്
സ്പൈസി തക്കാളി ചട്ണിക്ക് :
തക്കാളി – 2 വലുത്
കാശ്മീരി വറ്റൽമുളക് – 10 മുതൽ 12 എണ്ണം
വെളുത്തുള്ളി – 5 അല്ലി
ഇഞ്ചി – ഒരു ചെറിയ കഷണം
വിനാഗിരി – 1 ടീസ്പൂൺ
സോയ സോസ് – 1 ടീസ്പൂൺ
പഞ്ചസാര – 2 നുള്ള്
ചാറ്റ് മസാല– 1 നുള്ള് (ആവശ്യമെങ്കിൽ മാത്രം)
ഉപ്പ് – ആവശ്യത്തിന്
തയ്യാറാക്കുന്ന വിധം
മാവ് തയ്യാറാക്കുന്ന വിധം:
ഒരു പാത്രത്തിൽ മൈദയും ആവശ്യത്തിന് ഉപ്പും ഒന്നിച്ച് ചേർത്ത് നന്നായി ഇളക്കുക.
ഇതിലേക്ക് വെള്ളം കുറേശ്ശെയായി ഒഴിച്ച് മൃദുവായ രീതിയിൽ കുഴച്ചെടുക്കുക (മാവ് ഒട്ടും കട്ടിയുള്ളതോ അല്ലെങ്കിൽ ഒരുപാട് അയഞ്ഞതോ ആകരുത്).
മാവ് കയ്യിൽ ഒട്ടിപ്പിടിക്കാതിരിക്കാൻ അല്പം എണ്ണ കയ്യിൽ പുരട്ടി നന്നായി ഒന്നുകൂടി കുഴച്ച ശേഷം അര മണിക്കൂർ അടച്ചുവെക്കുക.
ചിക്കൻ ഫില്ലിംഗ് തയ്യാറാക്കുന്ന വിധം:
ചിക്കൻ ബ്രെസ്റ്റ് ചെറിയ കഷണങ്ങളാക്കി മുറിച്ച് മിക്സിയിലോ ഗ്രൈൻഡറിലോ ഇട്ട് നന്നായി കൊത്തിയരിഞ്ഞ പരുവത്തിൽ (Mince) അരച്ചെടുക്കുക.
പൊടിയായി അരിഞ്ഞു വെച്ചിരിക്കുന്ന സവാള, കാരറ്റ്, ഇഞ്ചി, വെളുത്തുള്ളി, പച്ചമുളക്, മല്ലിയില, സ്പ്രിങ് ഒണിയൻ എന്നിവ കൊത്തിയരിഞ്ഞ ചിക്കനിലേക്ക് ചേർക്കുക.
ഇതിലേക്ക് ആവശ്യത്തിന് ഉപ്പ്, കുരുമുളക് പൊടി, സോയ സോസ്, വിനാഗിരി, ഒരു ടീസ്പൂൺ എണ്ണ എന്നിവ ചേർത്ത് കൈകൊണ്ട് നന്നായി യോജിപ്പിക്കുക (എണ്ണ ചേർക്കുന്നത് ചിക്കൻ കൂടുതൽ സോഫ്റ്റും ജ്യൂസിയുമാകാൻ സഹായിക്കും).
മോമോസ് ഷേപ്പ് ചെയ്ത് വേവിച്ചെടുക്കുന്ന വിധം:
കുഴച്ചുവെച്ചിരിക്കുന്ന മാവിൽ നിന്ന് ചെറിയ ഉരുളകൾ ഉണ്ടാക്കുക.
അല്പം പൊടി തൂവി ഈ ഉരുളകളെ മൂന്ന് ഇഞ്ച് വ്യാസമുള്ള നേർത്ത വട്ടത്തിൽ പരത്തിയെടുക്കുക (പരത്താൻ പത്തിരിപ്പൊടി ഉപയോഗിച്ചാൽ കൂടുതൽ എളുപ്പമായിരിക്കും).
പരത്തിയ മാവിന്റെ നടുവിലായി രണ്ട് ടീസ്പൂൺ ചിക്കൻ കൂട്ട് വെക്കുക.
മാവിന്റെ വശങ്ങൾ മുകളിലേക്ക് ഉയർത്തി ഒന്നിനു പുറകെ ഒന്നായി മടക്കുകൾ ഇട്ട് മുകൾഭാഗം നന്നായി ഒട്ടിച്ച് ‘പൊട്ട്ലി’ (Potli) ആകൃതിയിലോ അല്ലെങ്കിൽ നിങ്ങൾക്ക് സൗകര്യപ്രദമായ മറ്റ് ആകൃതിയിലോ മാറ്റുക.
സ്റ്റീമറിൽ വെള്ളം തിളപ്പിക്കുക. മോമോസ് വെക്കുന്ന തട്ടിൽ അല്പം എണ്ണ പുരട്ടിയ ശേഷം മോമോസുകൾ പരസ്പരം മുട്ടാത്ത രീതിയിൽ അടുക്കി വെക്കുക.
പാത്രം അടച്ചുവെച്ച് ഇടത്തരം ഉയർന്ന തീയിൽ 10 മുതൽ 12 മിനിറ്റ് വരെ ആവിയിൽ വേവിച്ചെടുക്കുക (കൂടുതൽ വെന്താൽ മാവ് കട്ടിയാവുകയും ഉള്ളിലെ ചിക്കൻ ഉണങ്ങിപ്പോവുകയും ചെയ്യും).
സ്പൈസി തക്കാളി ചട്ണി തയ്യാറാക്കുന്ന വിധം:
ഒരു പാത്രത്തിൽ വെള്ളം തിളപ്പിച്ച് കാശ്മീരി വറ്റൽമുളകും തക്കാളിയും ഇട്ട് 3 മിനിറ്റ് നന്നായി തിളപ്പിച്ച ശേഷം തീ അണച്ച് 5 മിനിറ്റ് അടച്ചുവെക്കുക.
ശേഷം വെള്ളം ഊറ്റിക്കളഞ്ഞ് തക്കാളിയുടെ തൊലി കളഞ്ഞെടുക്കുക.
ഈ തക്കാളിയും മുളകും വെളുത്തുള്ളി, ഇഞ്ചി, വിനാഗിരി, സോയ സോസ്, പഞ്ചസാര, ഉപ്പ്, ചാറ്റ് മസാല എന്നിവയ്ക്കൊപ്പം മിക്സിയിലിട്ട് നന്നായി അരച്ചെടുക്കുക.
ആവി പറക്കുന്ന ചൂടുള്ള ചിക്കൻ മോമോസ് തയ്യാർ! ഇത് സ്വാദിഷ്ടമായ ചുവന്ന തക്കാളി ചട്ണിക്കൊപ്പം ചൂടോടെ വിളമ്പാം.
