ലഖ്നൗ: ഉത്തർപ്രദേശിലെ പ്രയാഗ്രാജിൽ പച്ദേവ്ര ഹാൾട്ട് ഓവർബ്രിഡ്ജിന് സമീപമുണ്ടായ ട്രെയിൻ അപകടങ്ങളിൽ അഞ്ചുപേർ മരിച്ചു. ബുധനാഴ്ച വൈകുന്നേരമായിരുന്നു നാടിനെ നടുക്കിയ ഈ സംഭവം. കൽക്ക എക്സ്പ്രസ് തട്ടി ഒരാൾ മരിച്ചതിന് പിന്നാലെ, വിവരമറിയാൻ പാളത്തിലേക്ക് ഇറങ്ങിയവർക്കിടയിലേക്ക് മറ്റൊരു ട്രെയിൻ പാഞ്ഞുകയറിയതാണ് മരണസംഖ്യ ഉയർത്തിയത്.(Train accident in Prayagraj, 5 people dead)
ആദ്യം കൽക്ക എക്സ്പ്രസ് തട്ടി ഒരാൾ മരിച്ചതിനെത്തുടർന്ന് ട്രെയിൻ പാളത്തിൽ നിർത്തിയിട്ടു. ഈ സമയം എന്താണ് സംഭവിച്ചതെന്നറിയാൻ ജനറൽ കോച്ചുകളിൽ നിന്നുള്ള യാത്രക്കാർ പുറത്തിറങ്ങി പാളത്തിൽ നിൽക്കുകയായിരുന്നു. ഈ സമയം തൊട്ടടുത്ത ട്രാക്കിലൂടെ വന്ന പുരുഷോത്തം എക്സ്പ്രസ് ഇവർക്കിടയിലേക്ക് പാഞ്ഞുകയറുകയായിരുന്നു.
രണ്ടാമത്തെ അപകടത്തിൽ നാല് പേരാണ് സംഭവസ്ഥലത്ത് വെച്ച് തന്നെ മരിച്ചത്. മരിച്ചവരിൽ മൂന്ന് പേരെ തിരിച്ചറിഞ്ഞിട്ടുണ്ട്. ബലിറാം ഭഗത് (36) – ബിഹാർ സ്വദേശി, സുനിൽ കുമാർ – മിർസാപുർ സ്വദേശി, ആകാശ് – ഫിറോസാബാദ് സ്വദേശി എന്നിവരാണിവർ. മറ്റ് രണ്ടുപേരെ തിരിച്ചറിയാനുള്ള നടപടികൾ തുടരുകയാണ്.
