ചെന്നൈ: തമിഴ്നാട് നിയമസഭയിലേക്കുള്ള 234 മണ്ഡലങ്ങളിലെ വോട്ടെണ്ണൽ ഇന്ന് (മെയ് 4) രാവിലെ 8 മണിയോടെ ആരംഭിച്ചു. മുഖ്യമന്ത്രി എം.കെ. സ്റ്റാലിന്റെ നേതൃത്വത്തിലുള്ള ഡിഎംകെ സഖ്യവും എടപ്പാടി പളനിസ്വാമിയുടെ എഐഎഡിഎംകെയും തമ്മിലുള്ള പോരാട്ടത്തിനപ്പുറം, നടൻ വിജയിന്റെ തമിഴക വെട്രി കഴകം എന്ന പുതിയ പാർട്ടി സൃഷ്ടിക്കുന്ന സ്വാധീനത്തിലേക്കാണ് രാഷ്ട്രീയ ലോകം ഉറ്റുനോക്കുന്നത് ( Tamil Nadu Assembly Election Results)
ഏപ്രിൽ 23-ന് നടന്ന വോട്ടെടുപ്പിൽ സംസ്ഥാന ചരിത്രത്തിലെ തന്നെ ഏറ്റവും ഉയർന്ന പോളിംഗാണ് (85.1%) രേഖപ്പെടുത്തിയത്. വോട്ടർമാരുടെ ഈ വലിയ പങ്കാളിത്തം ആർക്ക് ഗുണകരമാകുമെന്ന ആകാംക്ഷയിലാണ് രാഷ്ട്രീയ കേന്ദ്രങ്ങൾ.
ഡിഎംകെ+, എഐഎഡിഎംകെ+ സഖ്യങ്ങൾക്കൊപ്പം വിജയിന്റെ ടിവികെ കൂടി എത്തിയതോടെ പലയിടത്തും ശക്തമായ ത്രികോണ മത്സരമാണ് നടക്കുന്നത്. സീമാന്റെ നാം തമിഴർ കക്ഷിയും മത്സരരംഗത്തുണ്ട്. മിക്ക എക്സിറ്റ് പോളുകളും ഡിഎംകെ ഭരണത്തുടർച്ച പ്രവചിക്കുമ്പോൾ, ആക്സിസ് മൈ ഇന്ത്യ പുറത്തുവിട്ട പ്രവചനം വിജയിന്റെ ടിവികെ 98 മുതൽ 120 വരെ സീറ്റുകൾ നേടി അധികാരത്തിനടുത്തെത്തുമെന്നാണ്. ഇത് ശരിയായാൽ തമിഴ് രാഷ്ട്രീയം വലിയൊരു മാറ്റത്തിന് സാക്ഷ്യം വഹിക്കും. സംസ്ഥാനത്തുടനീളം 62 വോട്ടെണ്ണൽ കേന്ദ്രങ്ങളിലായി 1.25 ലക്ഷം സുരക്ഷാ ഉദ്യോഗസ്ഥരെയാണ് വിന്യസിച്ചിരിക്കുന്നത്. തപാൽ വോട്ടുകളാണ് ആദ്യം എണ്ണുന്നത്.
തമിഴ്നാടിനൊപ്പം കേരളം, പുതുച്ചേരി, അസം, പശ്ചിമ ബംഗാൾ എന്നീ സംസ്ഥാനങ്ങളിലെയും തിരഞ്ഞെടുപ്പ് ഫലങ്ങൾ ഇന്നറിയാം. ഉച്ചയോടെ തമിഴ് മണ്ണിൽ വിജയിയുടെ ‘വിജയം’ തരംഗമാകുമോ അതോ സ്റ്റാലിൻ കരുത്ത് നിലനിർത്തുമോ എന്ന് വ്യക്തമാകും.
Summary: Counting of votes for the 234-member Tamil Nadu Assembly began on May 4 at 8:00 am. Following a record 85.1% voter turnout, the state is witnessing an intense battle between the ruling DMK-led alliance and the AIADMK. However, the spotlight remains on actor Vijay’s TVK, with some exit polls like Axis My India predicting a massive upset of up to 120 seats for the debutant party. While most pollsters favor a second term for MK Stalin, the strong participation of young voters has introduced a high degree of uncertainty. Early trends are expected shortly.
