മുംബൈ: മഹാരാഷ്ട്ര ഉപമുഖ്യമന്ത്രി ഏക്നാഥ് ഷിൻഡെയുമായി എൻസിപി (എസ്പി) അധ്യക്ഷൻ ശരദ് പവാർ നടത്തിയ കൂടിക്കാഴ്ചയെച്ചൊല്ലിയുള്ള രാഷ്ട്രീയ വിവാദങ്ങൾ തള്ളി സുപ്രിയ സുലെ. ഇത് കേവലം ഒരു സൗഹൃദ സന്ദർശനം മാത്രമാണെന്നും, അതിനെ രാഷ്ട്രീയമായി വ്യാഖ്യാനിക്കേണ്ടതില്ലെന്നും അവർ വ്യക്തമാക്കി. ‘ചായക്കപ്പിലെ കൊടുങ്കാറ്റ്’ മാത്രമാണിതെന്ന് മാധ്യമങ്ങളോട് സംസാരിക്കവെ സുപ്രിയ സുലെ പറഞ്ഞു. (Sharad Pawar Eknath Shinde meeting)
കൂടിക്കാഴ്ചയ്ക്കെതിരെ ശിവസേന (യുബിടി) നേതാവ് സഞ്ജയ് റാവത്ത് ഉൾപ്പെടെയുള്ളവർ ശക്തമായ വിമർശനം ഉന്നയിച്ചിരുന്നു. എന്നാൽ, താൻ സഞ്ജയ് റാവത്തുമായി സംസാരിച്ചുവെന്നും ഇപ്പോൾ തെറ്റിദ്ധാരണകൾ എല്ലാം നീങ്ങിയെന്നും സുപ്രിയ സുലെ അറിയിച്ചു. എൻസിപി (എസ്പി) എൻഡിഎയിലേക്ക് മാറാൻ ആലോചിക്കുന്നു എന്ന തരത്തിൽ പുറത്തുവരുന്ന വാർത്തകൾ അവർ തള്ളിക്കളഞ്ഞു. തന്റെ പാർട്ടിയിലെ എട്ട് എംപിമാരും ഒറ്റക്കെട്ടാണെന്നും സുപ്രിയ സുലെ വ്യക്തമാക്കി.
മഹാരാഷ്ട്ര നിയമസഭാ മന്ദിരത്തിലെ ഉപമുഖ്യമന്ത്രിയുടെ ഓഫീസിൽ വെച്ച് പവാർ ഷിൻഡെയെ കണ്ടതും, അവിടെ വെച്ച് പാർട്ടി യോഗം ചേർന്നതുമാണ് സഖ്യകക്ഷികൾക്കിടയിൽ അതൃപ്തിയുണ്ടാക്കിയത്. ഷിൻഡെയെ ‘വഞ്ചകൻ’ എന്ന് വിശേഷിപ്പിച്ച സഞ്ജയ് റാവത്ത്, അദ്ദേഹവുമായുള്ള കൂടിക്കാഴ്ച ശരദ് പവാറിന്റെ വിശ്വാസ്യതയെ ബാധിക്കുമെന്ന് വിമർശിച്ചിരുന്നു. എന്നാൽ പിന്നീട്, താൻ പാർട്ടി പ്രവർത്തകരുടെ വികാരം മാത്രമാണ് പ്രകടിപ്പിച്ചതെന്നും പവാറിനോട് തങ്ങൾക്ക് അതൃപ്തിയില്ലെന്നും റാവത്ത് വിശദീകരിച്ചു.
എൻസിപി (എസ്പി) എംപിമാർ എൻഡിഎയിലേക്ക് മാറാൻ ആലോചിക്കുന്നുണ്ടെന്ന് മുതിർന്ന കോൺഗ്രസ് നേതാവ് പൃഥ്വിരാജ് ചവാൻ കഴിഞ്ഞ ദിവസം ആരോപിച്ചിരുന്നു. എന്നാൽ ഈ ആരോപണങ്ങൾ എൻസിപി നേതൃത്വം ശക്തമായി നിഷേധിച്ചു. സഖ്യകക്ഷികൾക്കിടയിലെ ഈ സംഭവവികാസങ്ങൾ മഹാ വികാസ് അഘാഡി (MVA) സഖ്യത്തിനുള്ളിലെ ആഭ്യന്തര ഭിന്നതകളുടെ തെളിവാണെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
Summary: Supriya Sule, NCP (SP) MP, has dismissed the controversy surrounding Sharad Pawar’s meeting with Maharashtra Deputy Chief Minister Eknath Shinde as a “storm in a tea cup.” The meeting had sparked friction within the Maha Vikas Aghadi (MVA) coalition, with Shiv Sena (UBT) leader Sanjay Raut labeling Shinde a “traitor.” Sule clarified that it was a courtesy call, reaffirmed the unity of NCP (SP) MPs, and confirmed that misunderstandings with alliance partners have been resolved.
